Kara Maoromaoro Dainai Dagedage Idia Abia
“Dirava ena kara maoromaoro idia karaia dekena amo hisihisi idia abia taudia be idia namo.”—MATAIO 5:10.
1. Dahaka dainai Iesu be Pontio Pilato vairanai ia gini, bona Iesu be dahaka ia gwau?
“HEREVA momokani gwauraia hedinarai totona lau vara, bona lau mai inai tanobada dekenai.” (Ioane 18:37) Iesu be unai hereva ia gwauraia neganai, ia be Iuda ena gavana, Pontio Pilato vairanai ia gini. Iesu be unuseniai ia noho sibona ena ura dainai lasi, eiava Pilato ese ia boiria dainai lasi. To, unuseniai ia noho badina, Iuda tomadiho gunalaia taudia ese idia samania koikoi, idia gwau ia be mai ena kara dika dainai idia hamasea be namo.—Ioane 18:29-31.
2. Iesu be dahaka ia karaia, unai dainai dahaka ia vara?
2 Iesu ia diba Pilato be mai ena siahu ia do ia ruhaia eiava hamasea totona. (Ioane 19:10) To unai ese ia koua lasi Pilato dekenai mai gari lasi ida Basileia ia herevalaia totona. Ena be Iesu ese ena mauri ia haboioa diba, to unai nega ia gaukaralaia unai hanua ena gavamani ena siahu tauna badana ia haroro henia totona. Ena be ia haroro henia, Iesu idia gwauraia dika bona idia hamasea, iena abidadama dainai au ta dekenai mai ena hisihisi danu ia mase.—Mataio 27:24-26; Mareko 15:15; Luka 23:24, 25; Ioane 19:13-16.
Witnes Tauna Eiava Martyr Tauna
3. Baibel negadiai inai hereva “martyr” ena anina be dahaka, to hari inai negai ena anina be dahaka?
3 Hari inai negai taunimanima momo idia laloa inai hereva martyr be ena tomadiho ena lalohadai ia goadalaia kava tauna, eiava gavamani ia tuari henia tauna. Unai bamona taudia be idia abia dae tomadiho ena hahediba herevadia dainai idia ura idia mase, nega momo idia be terorist eiava taunimanima edia noho namo idia hadikaia taudia. To unai hereva be Greek herevana (marʹtys) amo idia abia, Baibel negadiai ena anina be “witnes tauna,” reana ia abidadama henia gaudia be kota ai ia hamomokania tauna. Gabeai unai hereva ese “ia abidadama henia gaudia ia gwauraia hedinarai dainai ia mase,” eiava ena mauri ia henia karana amo gau ta ia gwauraia hedinarai tauna ena anina ia abia.
4. Edena dala ai Iesu ia hahedinaraia ia be martyr tauna?
4 Iesu be Greek herevana ena anina ginigunana ia hahedinaraia tauna. Pilato ia hamaoroa hegeregerena, ia be “hereva momokani gwauraia hedinarai totona” ia mai. Iena haroro herevana dekenai taunimanima edia lalohadai be idauidau. Ladana maragi taudia haida be idia kamonai bona itaia gaudia ese edia lalona idia veria bona Iesu idia abidadama henia. (Ioane 2:23; 8:30) Hutuma ibounai bona tomadiho gunalaia taudia be mai goada ida edia lalohadai idia hahedinaraia danu—idia badu. Iesu be ena abidadama lasi varavara taudia dekenai ia gwau: “Tanobada be do ia badu henia diba lasi umui dekenai, to lau dekenai be ia badu henia, badina be tanobada ena kara lau ese lau hedinaraia vadaeni ia be dika.” (Ioane 7:7) Hereva momokani ia gwauraia hedinarai dainai, hakaua taudia ese Iesu idia badu henia, bena idia hamasea. Momokani, ia be “hereva momokani tauna, bona Dirava ena hereva ia gwauraia maoromaoro tauna (marʹtys).”—Apokalupo 3:14.
“Taunimanima Ibounai ese Do Idia Badu Henia Umui Dekenai”
5. Iesu ena hesiai gaukara ena matamanai dagedage ia herevalaia neganai, dahaka ia gwau?
5 Iesu sibona ese hisihisi bada dagedage ia davaria lasi, to ena murinai idia raka taudia ia hamaorodia guna, idia danu be dagedage do idia davaria. Ena hesiai gaukara ena matamanai, Iesu ena Haroro Herevana Badana lalonai ena kamonai taudia ia hamaoroa: “Dirava ena kara maoromaoro idia karaia dekena amo hisihisi idia abia taudia be idia namo, Guba Basileia be idia edia. Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo. Umui moale bada momokani, badina emui davana guba dekenai ia bada.”—Mataio 5:10-12.
6. Iesu ese aposetolo 12 ia siaia neganai, dahaka sisiba ia henia?
6 Gabeai, Iesu be aposetolo 12 ia siaia neganai, idia ia hamaoroa: “To taunimanima dekenai do umui naria namonamo. Badina be idia ese kaunsolo edia vairana dekenai do idia hakaua umui, bona idia edia dubu lalonai do idia botaia umui. Lohia bona king edia vairana dekenai do idia hakaua umui, lau dainai. Inai dala dekenai umui ese lau do umui gwauraia hedinarai idia dekenai, bona bese idauidau ibounai dekenai.” To tomadiho gunalaia taudia sibodia ese hahediba taudia do idia dagedage henia lasi. Iesu ia gwau: “Kakana ese iena tadina do ia samania, do ia mase totona. Tamana ese iena natuna do ia samania, do ia mase totona. Memero do idia toreisi, edia tamana bona sinana do idia alaia mase. Lauegu ladana dainai taunimanima ibounai ese do idia badu henia umui dekenai. To do ia haheauka lao ela bona dokona tauna be do ia mauri.” (Mataio 10:17, 18, 21, 22) Keristani taudia ginigunadia edia sivarai ese unai hereva ia hamomokania.
Mai Edia Abidadama ida Idia Haheauka Taudia Edia Sivarai
7. Dahaka ia vara bena Stefano be gau ta ia gwauraia hedinarai totona ia mase?
7 Iesu ena mase murinai, Stefano be hereva momokani ia gwauraia hedinarai dainai ia mase Keristani tauna ginigunana ai ia lao. Ia be “abidadama bona siahu dekenai ia honu, bona ia ese hoa kara bona toa kara badadia taunimanima edia vairanai ia karaia.” Tomadiho dalanai ia idia inai henia taudia idia “hegeregere lasi Stefano idia koua, badina be ia hereva neganai, Lauma Helaga ese aonega bada ia henia.” (Kara 6:8, 10) Mama karana dainai Stefano idia veria lao Iuda taudia edia kota badana, Sanhedrin dekenai, bona unuseniai ia idia samania koikoi taudia vairanai ia gini bona haroro goadana ia henia. To dokonai, ena inai taudia ese abidadama witnes tauna, Stefano idia hamasea.—Kara 7:59, 60.
8. Stefano ena mase murinai, hahediba taudia Ierusalema dekenai be dagedage idia davaria neganai, edena bamona idia kara?
8 Stefano idia hamasea murinai, “dagedage bada ia vara hamatamaia, Ierusalema noho ekalesia taudia idia dagedage henidia, bona Keriso ena taudia idia lulua, vadaeni ibounai idia heau lao Iudea bona Samaria tano ibounai, aposetolo sibodia idia noho Ierusalema dekenai.” (Kara 8:1) Dagedage ese Keristani haroro gaukara ia koua, a? To, inai sivarai ese ita ia hamaoroa, “ia lulua taudia be gabu idauidau dekenai idia lao, Sivarai Namona idia harorolaia.” (Kara 8:4) Reana edia hemami be aposetolo Paulo ena hemami hegeregerena, guna ia gwau: “Dirava ai kamonai henia be namo, taunimanima ai kamonai henia be dika.” (Kara 5:29) Herevana dagedage idia davaria, unai abidadama bona gari lasi hahediba taudia ese hereva momokani idia harorolaia noho, ena be idia diba unai ese edia hisihisi do ia habadaia.—Kara 11:19-21.
9. Dahaka dagedage karadia be Iesu ena murinai idia raka taudia ese idia davaria?
9 Oibe, hisihisi be ia doko lasi. Ita dibaia guna gauna be Saulo—nadi amo Stefano idia hodoa mase karana ia abia dae tauna—“be Lohiabada ena diba tahua taudia hagaria bona alaia hereva momo ia gwauraia noho. Bona ia lao Hahelagaia Tauna Badana dekenai, ia noia, revareva do ia henia, Damaseko dubudia dekenai, revareva be inai bamona ia torea: Bema Saulo ese Iesu ena taudia ia davaria neganai, tatau o hahine do ia kwatua, bona mailaia Ierusalema dekenai. Vadaeni Hahelagaia Tauna Badana ese inai revareva Saulo dekenai ia henia.” (Kara 9:1, 2) Bena, lagani 44 C.E. bamona ai, “King Heroda ese ekalesia taudia haida ia dogoatao, hadikaia totona. Iamesi, Ioane ena kakana be kaia dekenai Heroda ese ia alaia mase.”—Kara 12:1, 2.
10. Kara bona Apokalupo buka lalonai dahaka dagedage karadia edia sivarai ita davaria?
10 Kara bukana ena kahana ma haida lalonai abidadama taudia ese idia haheaukalaia hahetoho, dibura, bona dagedage ena sivarai momokani ia herevalaia. Hegeregere Paulo—dagedage tauna bena gabeai aposetolo tauna ai ia lao be lagani 65 C.E. ai, Roma ena Pavapava Nero ena oda hegeregerena ai ia abidadama henia gaudia dainai idia hamasea. (2 Korinto 11:23-27; 2 Timoteo 4:6-8) Gabeai, Apokalupo bukana ai, lagani 96 C.E. ai idia torea bukana, ese ia buruka aposetolo Ioane be ‘Dirava ena hereva, bona ena abidadama Iesu dekenai ia gwauraia hedinarai’ dainai, Patamo motumotu dekenai idia hadiburaia ena sivarai ita davaria. Apokalupo bukana ese Peregamo dekenai “lau ia gwauraia hedinarai momokani tauna, Anetipa idia alaia mase” ena sivarai ia gwauraia danu.—Apokalupo 1:9; 2:13.
11. Edena dala ai Keristani ginigunadia edia kara ese Iesu ena hereva dagedage karana dekenai ia hamomokania?
11 Unai ibounai ese Iesu ena hereva ena aposetolo taudia dekenai ia hamomokania: “Bema idia ese lau dekenai idia dagedage henia, umui dekenai danu do idia dagedage henia.” (Ioane 15:20) Abidadama Keristani taudia ginigunadia be Lohiabada Iesu Keriso ese ia henia gaukarana: “Lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai,” idia karaia totona idia hegaegae edia hahetoho badana, mase—reana ia be hisihisi dekenai amo, dagedage animal dekenai idia negea, eiava dala ma haida amo idia hadikaia karana idia haheaukalaia totona.—Kara 1:8.
12. Dahaka dainai Keristani taudia dagedage henia karana be guna ia vara sivaraina ta sibona lasi?
12 Bema ta ia laloa Iesu ena murinai idia raka taudia ese idia davaria dagedage karadia be idaunega sibona ia vara gauna, ia kerere bada. Paulo, hisihisi bada ia haheaukalaia tauna, ia gwau: “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:12) Petero ese dagedage karana ia herevalaia neganai, ia gwau: “Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” (1 Petero 2:21) Unai nega amo ema bona inai “dina gabedia” ai, Iehova ena taunimanima idia inai henia bona dagedage henia noho. (2 Timoteo 3:1, NW ) Tanobada hegegemadai, Iehova ena Witnes taudia ta ta eiava edia orea be gavamani aukadia bona demokratik tanodia ai nega ta ta ai dagedage idia davaria.
Dahaka Dainai Idia Inai Henia Bona Dagedage Henia?
13. Hari inai negai Iehova ena hesiai taudia ese dagedage karana be edena bamona idia laloa be namo?
13 Ena be hari inai negai ita momo be ita haroro diba bona maino dekenai ita hebou diba, Baibel ese ita ia hadibaia lou hari inai tanobada ena toana ia idau ia lao noho. (1 Korinto 7:31) Gau be haraga herea idia idau diba, to bema iseda lalona, hemami bona lauma dalanai ita hegaegae, do ita moru lasi. Vadaeni, ita sibona ita gimaia totona dahaka ita karaia diba? Ita sibona ita gimaia dalana ta be, maino idia lalokau henia bona taravatu idia badinaia Keristani taudia idia inai henia bona dagedage henia ena badina do ita laloatao.
14. Keristani taudia idia dagedage henia ena badina be Petero ese edena bamona ia herevalaia?
14 Aposetolo Petero ena revareva ginigunana, lagani 62-64 C.E. bamona ai ia torea neganai, unai ia herevalaia. Unai nega ai Keristani taudia Roma Basileia ena gabu ibounai be hahetoho bona dagedage idia davaria noho. Ia gwau: “Lauegu lalokau taudia e, inai hisihisi bada, umui ia hisihisi henia noho gauna, be umui tohoa totona ia vara noho. Unai dainai do umui hoa lasi, do umui laloa lasi idau gauna ta be umui dekenai ia ginidae vadaeni.” Ia herevalaia gauna ia hahedinaraia totona, Petero ma ia gwau: “Ia namo lasi bema umui ta ia hisihisi, sibona ena kerere dainai. Tau ta sedira ia ala-ala, o ia henaoa, o ia kara dika, o haida edia kara ia herevalaia kerere, bona unai kara dainai ia hisihisi. Unai bamona hisihisi be mai ena hanamoa ta lasi. To tau ta, bema ia be Keristani tauna dainai ia hisihisi, unai tau be do ia hemarai lasi. Lasi momokani, to ia ese Dirava do ia tanikiu henia, Keriso ena ladana ia abia dainai.” Petero ese ia hahedinaraia hisihisi idia abia, kerere idia karaia dainai lasi, to badina idia be Keristani taudia. Bema edia dekena taudia ese idia karaia “lebulebu karadia” idia karaia, idia do idia abia dae bona hanamoa. To momokani hisihisi idia ania badina idia ura Keriso ena murinai idia raka taudia edia maduna idia hagugurua. Hari inai negai Keristani momokani taudia danu be unai bamona.—1 Petero 4:4, 12, 15, 16.
15. Hari inai negai Iehova ena Witnes taudia be edena dala idauidau ai idia kara henidia?
15 Tanobada ena kahana momo dekenai, taunimanima ese Iehova ena Witnes taudia edia ladana idia hanamoa badina edia hebouhebou bona ruma haginia gaukara lalonai lalo-tamona bona gaukara hebou karadia idia hahedinaraia. Danu edia kara momokani bona goeva, gaukara goada, bona edia ruma bese maurina namona, bona edia toana bona kara be namo dainai idia hanamodia.a To, inai hereva idia torea neganai tano 28 dekenai edia gaukara be gavamani ese ia taravatua, bona Witnes taudia momo edia abidadama dainai hisihisi idia davaria bona edia kohu idia haboioa. Dahaka dainai edia kara namo dainai idia hanamodia taudia be ma idia hahisidia? Bona dahaka dainai Dirava ese ia koua lasi?
16. Dahaka mai anina bada gauna dainai, Dirava ese ena taunimanima dekenai idia vara dagedage karadia ia koua lasi?
16 Mai anina bada gauna ginigunana be, Aonega Herevadia 27:11 ena hereva ita laloatao, ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” Oibe, unai be idaunegai ia vara guba bona tanobada ena lohia siahuna ena hepapahuahu dainai. Ena be lagani momo lalodiai Iehova ena Witnes taudia edia sivarai momo ese ia hamomokania idia be edia Iehova abidadama henia karana dekenai idia gini goada, Satani be Iobu ena negai Iehova ia samania karana ia do hadokoa lasi. (Iobu 1:9-11; 2:4, 5) Ita daradara lasi, Satani ia hekwarahi bada herea noho ena hereva ia hamomokania totona, badina hari Dirava ena Basileia be ia gini vadaeni, tanobada hegegemadai ia be mai ena badinaia taudia bona makaia taudia. Ena be dika bona hekwakwanai idia davaria Dirava do idia abidadama henia noho, a? Unai henanadai be Dirava ena hesiai taudia ta ta sibona ese do idia haerelaia.—Apokalupo 12:12, 17.
17. Iesu ena hereva, “to unai neganai umui be mai emui dala Sivarai Namona do umui gwauraia hedinarai,” ena anina be dahaka?
17 Iesu ese ena hahediba taudia dekenai “tanobada dokona” dekenai do idia vara gaudia ia herevalaia neganai, Dirava ese ena hesiai taudia ese idia davaria dagedage ia koua lasi ena badina ma ta ia hahedinaraia. Idia ia hamaoroa: “King bona gavana edia vairana dekenai umui do idia hakaua lao, lauegu ladana dainai. To unai neganai umui be mai emui dala Sivarai Namona do umui gwauraia hedinarai.” (Mataio 24:3, 9; Luka 21:12, 13) Iesu be Heroda bona Pontio Pilato vairanai ia haroro. Aposetolo Paulo danu be “king bona gavana edia vairana dekenai . . . idia hakaua lao.” Lohiabada Iesu Keriso ese ia hakaua dainai, Paulo ia ura unai nega ena siahu bada tauna ia haroro henia, ia gwau: “Kaisara dekenai lau noinoi.” (Kara 23:11; 25:8-12) Hari inai negai danu, nega aukadia dainai gavamani taudia bona taunimanima vairanai haroro namona idia henia.b
18, 19. (a) Edena dala ai hahetoho haheaukalaia karana ese ita ia durua? (b) Hereva gabena lalonai edena henanadai do ita herevalaidia?
18 Dokonai, hahetoho bona hekwakwanai haheaukalaia karana ese ita ta ta ia durua diba. Edena dala ai? Hahediba tauna Iamesi ese ena Keristani bamodia ia hadibaia lou: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho.” Oibe, dagedage ese iseda abidadama ia hagoevaia bona iseda haheauka karana ia hagoadaia diba. Unai dainai, dagedage karana ita gari henia lasi, bona Baibel ena taravatu ia utua dalana ta amo ita koua lasi. To, Iamesi ena sisiba ita badinaia, ia gwau: “Nega ibounai metau bona hisihisi lalonai do umui haheauka noho, ela bona inai haheauka emui lalona dekenai ia goada momokani. Unai neganai emui kara be namo, bona Dirava ena dala hegeregerena do umui raka, kerere ta lasi.”—Iamesi 1:2-4.
19 Ena be Dirava ena Hereva ese ita ia durua Dirava ena abidadama hesiai taudia idia dagedage henia ena badina bona Dirava ese ia koua lasi ena badina ita lalo-pararalaia totona, to unai ese dagedage ena hisihisi ia hamaragia lasi. Dahaka ese ita ia hagoadaia diba ita haheaukalaia totona? Dagedage ita davaria neganai, dahaka ita karaia diba? Inai mai anina bada henanadai be hereva gabena lalonai do ita herevalaidia.
[Footnotes]
a Gima Kohorona, December 15, 1995, rau 27-9; April 15, 1994, rau 16-17; bona Awake! December 22, 1993, rau 6-13 itaia.
b Awake! January 8, 2003, rau 3-11 itaia.
Anina Oi Gwauraia Diba, A?
• Edena dala ai Iesu ia hahedinaraia ia be martyr tauna?
• Dagedage karana ese Keristani taudia ginigunadia edia mauri dekenai dahaka ia havaraia?
• Petero ese ia hahedinaraia bamona, dahaka dainai Keristani taudia ginigunadia idia dagedage henia?
• Dahaka dainai Iehova be iena hesiai taudia ese idia davaria dagedage karana ia koua lasi?
[Pictures on page 22, 23]
Keristani ginigunadia ese hisihisi idia ania, kerere ta idia karaia dainai lasi, to badina idia be Keristani taudia
PAULO
IOANE
ANETIPA
IAMESI
STEFANO