Haroro Gaukara Karaia Namonamo Totona Diba Idia Abia

“Lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”​—⁠KARA 1:⁠8.

1, 2. Petero ena gaukara be dahaka, bona daika ese ia dekenai ia henia?

“IESU, Nasareta tauna, . . . be . . . ai dekenai ia hadibaia, taunimanima ibounai dekenai do ai haroro, bona do ai gwauraia hedinarai, Dirava ese inai Tau ia abia hidi vadaeni, mauri taudia bona mase taudia edia kota biaguna gaukara do ia karaia totona.” (Kara 10:​38, 42) Aposetolo Paulo ese unai hereva amo, ia abia sivarai namona harorolaia gaukarana be Korenelio bona ena ruma bese taudia dekenai ia gwauraia hedinarai.

² Iesu be edena negai unai gaukara ia henia? Reana, Petero be Iesu ia toreisi lou bona guba dekenai kahirakahira do ia daekau neganai ia gwauraia herevana ia laloa. Unai nega ai, Iesu ese ena abidadama hahediba taudia ia hamaorodia: “Lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:⁠8) To, nega daudau vadaeni, Petero be ia diba ia be Iesu ena hahediba tauna ta dainai, iena abidadama Iesu dekenai be ma haida dekenai do ia gwauraia hedinarai.

Lagani Toi Lalonai Diba Idia Abia

3. Iesu be dahaka hoa gauna ia karaia, bona Petero bona Andrea ia boiria dahaka idia karaia totona?

³ Iesu be lagani 29 C.E. ai, ia bapatiso bena hua haida murinai, haoda taudia Petero bona ena tadina Andrea edia gaukara gabuna, Galilea Gohuna dekenai ia haroro. Idia be hanuaboi ibounai idia haoda vadaeni, to gwarume ta idia abia lasi. Iesu ese ia hamaorodia: “Dobu kahana dekenai ita lao, emui reke do umui atoa diho, gwarume do umui abia totona.” Iesu ena hereva hegeregerena idia karaia neganai, “gwarume momo herea idia abia. Edia reke be kahirakahira ia darea.” Petero be unai hoa karana ia itaia neganai, ia gari bada to Iesu ese ena lalona ia hagoadaia, ia gwau: “Oi gari lasi, inai murinai be do oi haoda, taunimanima do oi abia.”​—⁠Luka 5:​4-10.

4. (a) Iesu ese ena hahediba taudia be edena bamona ia hegaegaelaidia haroro gaukara idia karaia totona? (b) Iesu ena hahediba taudia edia haroro gaukara be edena dala ai Iesu ena amo ia idau?

⁴ Karaharaga, Petero bona Andrea​—⁠Sebedeo ena natuna memerodia Iamesi bona Ioane danu​—⁠be edia bouti idia rakatania bona Iesu murinai idia raka. Lagani toi bamona, Iesu idia bamoa ena haroro gaukara lalonai bona Iesu ese idia ia hadibaia haroro taudia ai do idia lao totona. (Mataio 10:7; Mareko 1:​16, 18, 20, 38; Luka 4:43; 10:⁠9) Nisan 14, 33 C.E. ai, unai hadibaia negana ena dokonai, Iesu ese ia hamaorodia: “Umui lau hamaoroa, lau dekenai ia abidadama henia tauna ese lau karaia karadia ibounai be do ia karaia, bona inai kara do idia hereaia karadia danu do ia karaia.” (Ioane 14:12) Iesu ena hahediba taudia be Iesu bamona haroro gaukara do idia karaia namonamo, to idia be gabu momo dekenai do idia haroro. Nega sisina murinai idia lalo-parara, idia bona gabeai do idia noho hahediba taudia ibounai be “bese ibounai” dekenai do idia haroro “ela bona tanobada dokona.”​—⁠Mataio 28:​19, 20.

5. Edena dala ai Iesu ese iena hahediba taudia dekenai ia hadibaia gaudia amo diba ita abia diba?

⁵ Ita be “tanobada dokona” ai ita noho. (Mataio 24:⁠3) Ita be Iesu ita bamoa lasi bona taunimanima dekenai ia haroro dalana ita itaia lasi, hahediba taudia ginigunadia idia karaia bamona. To, Baibel ita duahia neganai, Iesu ena haroro dalana bona iena hahediba taudia dekenai ia henia sisiba amo diba ita abia diba. (Luka 10:​1-11) To, inai stadi lalonai Iesu ese iena hahediba taudia dekenai ia hahedinaraia mai anina bada gauna ma ta​—⁠lalohadai maorona haroro gaukara dekenai​—⁠do ita herevalaia.

Taunimanima Laloa Bada

6, 7. Edena kara ese Iesu ia durua ena haroro gaukara lalonai taunimanima ia durudia totona, bona edena bamona unai kara ita tohotohoa diba?

⁶ Dahaka dainai Iesu ia haroro neganai taunimanima ia durua? Badina ta be, ia ese taunimanima ia laloa bada. Salamo torea tauna ia peroveta, Iesu “ese manoka taudia, bona ogogami taudia dekenai do ia bogahisihisi.” (Salamo 72:13) Ia ese unai peroveta herevana ia hamomokania. Baibel ese ia vara gauna ta ia herevalaia: “Taunimanima momo Iesu ese ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Kara dika rohoroho idia karaia taudia danu be Iesu ese idia ia laloa bada karana idia mamia bona ia dekenai idia lao.​—⁠Mataio 9:​9-13; Luka 7:​36-38; 19:​1-10.

⁷ Hari inai negai danu, taunimanima ita durudia diba bema idia ita laloa bada. Haroro gaukara oi do hamatamaia lasi neganai, namona be oi laloa, dahaka dainai taunimanima ese oi harorolaia sivaraina idia kamonaia haraga be gau badana? Mani oi laloa, reana idia davaria hekwakwanai be Basileia sibona ese do ia hamaoromaoroa diba. Namona be oi gwau taunimanima ibounai do idia kamonai, badina oi diba lasi daika ese sivarai namona do ia abia dae. Reana gabeai, ma tau ta do oi davaria, ia be tau ta do ia mai bona ia do ia durua totona ia guriguri!

Lalokau Dainai

8. Iesu ena murinai idia raka taudia be Iesu idia tohotohoa dainai, dahaka kara ese idia ia doria sivarai namona idia harorolaia totona?

⁸ Iesu ese ia harorolaia sivarai namona be Iehova ena ura do ia hagugurua, Iena ladana do ia hahelagaia, bona Iena lohia siahuna do ia hamomokania karadia ia herevalaia​—⁠idia be mai anina bada herevadia taunimanima dekenai. (Mataio 6:​9, 10) Iesu ese ena Tamana ia lalokau henia dainai, Dirava ia badinaia ela bona dokona, bona unai mai anina bada herevadia do ia hamomokania Basileiana ia harorolaia namonamo. (Ioane 14:31) Hari inai negai, Iesu ena murinai idia raka taudia danu be Iehova idia lalokau henia dainai, edia haroro gaukara idia karaia namonamo. Aposetolo Ioane ia gwau: “Dirava ita lalokau henia ena anina be inai: Dirava ena taravatu [eiava “hahegani,” Buka Helağa] do ita badinaia,” bona unai hahegani ta be sivarai namona ita harorolaia bona hahediba taudia halaoa gaukarana ita karaia.​—⁠1 Ioane 5:3; Mataio 28:​19, 20.

9, 10. Dirava lalokau henia karana sibona lasi, to edena lalokau karana danu ese ita ia doria sivarai namona ita harorolaia namonamo totona?

⁹ Iesu ese ena murinai idia raka taudia ia hamaorodia: “Bema lau dekenai umui lalokau henia, be lauegu taravatu do umui badinaia. Lauegu taravatu ia abia dae bona ia badinaia tauna, inai tau ese lau ia lalokau henia.” (Ioane 14:​15, 21) Unai dainai, Iesu ita lalokau henia karana ese ita do ia doria hereva momokani ita harorolaia bona ia herevalaia gaudia ma haida ita badinaia totona. Ia toreisi lou murinai, Iesu ese Petero ia hagania: “Lauegu mamoe do oi ubua. . . . Lauegu mamoe do oi naria. . . . Egu mamoe do oi ubua.” Dahaka kara ese Petero do ia doria, unai ia karaia totona? Iesu ese Petero ia nanadaia loulou karana ese haere ia henia, ia gwau: “Oi ese lau oi lalokau henia bada, a? . . . Lau oi lalokau henia, a? . . . Oi ura henia lau dekenai, a?” Oibe, Petero ena lalokau Iesu dekenai ese do ia doria, sivarai namona do ia harorolaia namonamo, Iesu ena “mamoe” do ia tahua bona lauma dalanai do ia regudia.​—⁠Ioane 21:​15-17.

¹⁰ Hari, ita be Iesu ida ita gaukara hebou lasi, Petero ia karaia bamona. To, Iesu ese ita totona ia karaia gauna ita lalo-pararalaia goevagoeva. Ita ia lalokau henia bada dainai ‘taunimanima ibounai dainai ia mase,’ unai ese iseda kudouna ia hamarerea. (Heberu 2:9; Ioane 15:13) Paulo ena laloa hegeregerena ita laloa be namo, ia gwau: “Keriso ena lalokau ese ai ia biagua noho, . . . Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase . . . tauna . . . iena ura gaudia do ita laloa bona karaia.” (2 Korinto 5:​14, 15) Sivarai namona harorolaia namonamo karana amo ita hahedinaraia, Iesu ita lalokau henia bona ita ia lalokau henia karana ita laloa bada. (1 Ioane 2:​3-5) Namo lasi haroro gaukara ita laloa maragi, bona Iesu ena boubou gauna be anina lasi gauna bamona ita laloa.​—⁠Heberu 10:⁠29.

Mai Anina Bada Gaudia Laloa Bada

11, 12. Iesu be tanobada dekenai ia mai ena badina be dahaka, bona edena dala ai unai ia laloa bada?

¹¹ Iesu be Pontio Pilato vairanai ia gini neganai, ia gwau: “Hereva momokani gwauraia hedinarai totona lau vara, bona lau mai inai tanobada dekenai.” (Ioane 18:37) Gau ta ese Iesu ia koua lasi hereva momokani ia harorolaia totona. Dirava ena ura Iesu dekenai be unai gaukara do ia karaia.

¹² Satani ese Iesu ia tohoa badina ia ura lasi Iesu ese unai gaukara do ia karaia. Iesu ia bapatiso murinai, Satani ia ura “tanobada edia basileia ibounai mai edia hairaina” be Iesu dekenai do ia henia bona tanobada ai tau badana ta ai ia halaoa. (Mataio 4:​8, 9) Gabeai, Iuda taudia idia ura Iesu be king ai idia halaoa. (Ioane 6:15) Haida idia laloa bema Iesu be unai gaudia ia abia dae, hegeregere tanobada ena king ta ai ia lao, reana taunimanima totona gau namodia momo ia karaia diba. To, Iesu be unai bamona lalohadai ia dadaraia. Ia laloa bada gauna be hereva momokani do ia harorolaia.

13, 14. (a) Dahaka gaudia ese Iesu ena gaukara badana idia koua lasi? (b) Ena be Iesu be taga tauna lasi, to dahaka ia karaia?

¹³ Danu, kohu momo tahua karana ese Iesu ena lalona ia veria lasi. Unai dainai, ia be taga tauna bamona ia noho lasi bona ia be ruma lasi. Nega ta ia gwau: “Uda sisia be mai edia nadi matuna, bona ataiai manudia danu mai edia ruma, to Taunimanima ena Natuna be mai ena mahuta gabuna lasi.” (Mataio 8:20) Baibel ena sivarai hegeregerena, Iesu ia mase neganai ena dabua sibona be dava bada gauna, bona Roma tuari taudia be unai dabua abia totona laki gadara idia karaia. (Ioane 19:​23, 24) Unai anina be Iesu be ena mauri lalonai ia kwalimu lasi, a? Lasi!

¹⁴ Iesu ese ia karaia gaudia be taga tauna ta mai ena hariharibada ese ia karaia gaudia ibounai ia hereaia. Paulo ia gwau: “Iseda Lohiabada Iesu Keriso ena hariharibada umui diba vadaeni. Ia be kohu momo tauna, to umui durua totona ogogami tauna bamona ia lao, iena ogogami dekena amo umui ese kohu momo do umui abia totona.” (2 Korinto 8:9; Filipi 2:​5-8) Ena be Iesu be ogogami tauna ai ia lao, to dala ia kehoa manau taudia idia goevadae bona mauri hanaihanai idia moalelaia diba totona. Iesu dekenai ita tanikiu bada! Bona ita moale badina, Dirava ena ura karaia karana ia laloa bada dainai ahuna namona ia abia!​—⁠Salamo 40:8; Kara 2:​32, 33, 36.

15. Kohu ia hereaia gauna be dahaka?

¹⁵ Hari inai negai, Iesu idia tohotohoa Keristani taudia idia ura lasi kohu momo tahua karana ese edia lalona ia veria. (1 Timoteo 6:​9, 10) Idia lalo-parara kohu ese edia mauri ia hanamoa diba, to idia diba unai gaudia ese mauri hanaihanai idia dekenai do ia henia lasi. Iesu ia mase neganai iena dabua be anina lasi ia dekenai, unai hegeregerena, Keristani tauna ia mase neganai, iena kohu be anina lasi ia dekenai danu. (Hadibaia Tauna 2:​10, 11, 17-19; 7:12) Keristani tauna ia mase neganai, mai anina bada gauna tamona sibona be Iehova bona Iesu Keriso ia tura henidia karana.​—⁠Mataio 6:​19-21; Luka 16:⁠9.

Dagedage Dainai Lalo-Manoka Lasi

16. Iesu be edena dala ai dagedage karana ia haheaukalaia?

¹⁶ Dagedage dainai Iesu be hereva momokani harorolaia gaukarana ia rakatania lasi. Ena be ia diba ia be boubou gauna ta bamona do ia mase bona tanobada ai ia karaia haroro gaukarana do ia doko, to unai dainai ia lalo-manoka lasi. Paulo ese inai dala ai Iesu ia herevalaia: “Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” (Heberu 12:⁠2) Ita itaia Iesu be ‘satauro ena hemarai ia laloa lasi.’ Iena inai taudia edia lalohadai ia lalo-hekwarahilaia lasi. Ia laloa bada gauna be Dirava ena ura do ia karaia.

17. Iesu ena haheauka karana amo dahaka ita dibaia diba?

¹⁷ Paulo be Keristani taudia ia hagoadaia totona, Iesu ena haheauka karana ia herevalaia, ia gwau: “Iesu ena hisihisi do umui laloa namonamo: Kara dika taudia ese mai badu danu ia idia dagedage henia. To ia goada noho. Unai dainai do umui hesiku lasi, bona do umui manoka lasi.” (Heberu 12:⁠3) Momokani, dina ta ta ibounai haida ese ita idia dagedage henia eiava kirikirilaia dainai, ita manoka diba. Reana iseda varavara ese ita idia doria ladana bada ita abia totona, to unai bamona tanobada ena lalona veria gaudia ita do dadaraia noho. Vaia, unai haheauka karana dekenai ita hesiku diba. To Iesu hegeregerena, Iehova ena heduru do ita tahua, bona ita gaukara goada Basileia be iseda mauri lalonai ita atoa guna totona.​—⁠Mataio 6:33; Roma 15:13; 1 Korinto 2:⁠4.

18. Iesu ese Petero dekenai ia gwauraia herevana amo dahaka ita dibaia?

¹⁸ Iesu ese ena hahediba taudia dekenai ena mase negana ia herevalaia neganai, ia ura lasi gau ta ese ena lalona ia veria karana ia hedinarai. Petero ese Iesu ia hamaoroa ena mase negana do ia herevalaia lasi bona ia hadibaia ia dekenai “unai bamona do idia karaia lasi.” Iesu ia ura lasi, Iehova ena gaukara karaia urana do ia hamanokaia herevana ta do ia kamonai. Iesu be Petero dekenai ena doruna ia henia, bona ia gwau: “Satani e, lauegu murina kahana oi lao. Lau hamorua totona oi hereva, badina oiemu laloa be Dirava ena lasi, to taunimanima edia.” (Mataio 16:​21-23) Unai hegeregerena, namona be iseda lalona ita hadaia nega ibounai taunimanima edia lalohadai ita dadaraia totona. To, nega ibounai Dirava ena lalohadai ita badinaia.

Hahenamo Momokani Do Ia Mailaia

19. Ena be Iesu ese hoa karadia ia karaia, to ena hesiai gaukara ai dahaka be mai anina bada?

¹⁹ Iesu ia ura ia hahedinaraia ia be Mesia dainai, hoa karadia momo ia karaia. Mase taudia ia hatoredia isi lou danu. Unai kara ese hutuma ia veridia, to Iesu be unai bamona gaukara sibona ia karaia totona tanobada dekenai ia mai lasi. Ia mai badina be hereva momokani ia harorolaia totona. Ia diba tauanina dalanai ia durudia karana ena namo be nega sisina sibona gauna. Ia hatoredia isi lou taudia be do idia mase lou. To hereva momokani ia harorolaia gaukarana sibona amo haida ia durua diba, mauri hanaihanai idia abia totona.​—⁠Luka 18:​28-30.

20, 21. Keristani taudia momokanidia be kara namodia idia karaia, to dahaka idia laloa bada?

²⁰ Hari inai negai, taunimanima haida idia ura Iesu ena kara namodia idia tohotohoa dainai, hospital idia haginidia bona tanobada ena ogogami taudia durua gaudia ma haida idia karaia. Ita hanamodia badina, nega momo sibodia edia moni bada idia halusia, bona mai edia momokani ida taunimanima idia durua, to idia mailaia heduru ena namo be nega sisina sibona gauna. Basileia sibona ese namo momokani ia mailaia diba. Unai dainai, Iehova ena Witnes taudia be Iesu hegeregerena, Basileia ena sivarai namona harorolaia gaukarana idia karaia noho.

²¹ Oibe, Keristani taudia momokanidia be kara namodia idia karaia danu. Paulo ia gwau: “Dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:10) Iseda dekena taudia eiava Keristani tadikaka be dika eiava hekwakwanai idia davaria neganai, karaharaga “kara namodia” ita karaia idia dekenai. To, ita laloa bada gauna be, hereva momokani ita harorolaia be namo.

Iesu Ena Haheitalai amo Diba Ita Abia

22. Dahaka dainai Keristani taudia ese edia dekena taudia idia haroro henidia?

²² Paulo ia gwau: “Bema Sivarai Namona lau harorolaia lasi neganai, madi, lau be dika momokani!” (1 Korinto 9:16) Paulo be sivarai namona ia laloa maragi lasi, badina ia diba ia harorolaia sivarai namona ese ia bona ma haida dekenai hahemauri do ia mailaia. (1 Timoteo 4:16) Iseda haroro gaukara be unai bamona ita laloa danu. Ita ura iseda dekena taudia ita durua. Ita ura iseda lalokau Iehova dekenai ita hahedinaraia. Ita ura ita hahedinaraia ita be Iesu ita lalokau henia bona ita ia lalokau henia bada karana ita laloa bada. Unai dainai, sivarai namona ita harorolaia bona ‘iseda tauanina ena ura dikadia do ita karaia lasi, to Dirava ena ura sibona do ita badinaia.’​—⁠1 Petero 4:​1, 2.

23, 24. (a) Hoa karana ai gwarume momo idia abia karana amo dahaka ita dibaia? (b) Hari inai negai daidia be haroro gaukara idia karaia namonamo?

²³ Ena be haida ese ita idia kirikirilaia eiava mai badu ida iseda sivarai idia dadaraia, to Iesu hegeregerena, iseda gaukara badana ita laloaboio lasi. Iesu ese Petero bona Andrea ia boiria ia murinai do idia raka neganai, ia karaia hoa karana amo gau ta ita dibaia. Ita itaia, bema Iesu ena hereva ita badinaia, bona laulau dalanai, gwarume momo lasi davarana lalonai iseda reke ita negea, reana gwarume momo do ita abia diba. Keristani haoda taudia momo be guna lagani daudau lalonai gwarume idia abia lasi davarana amo, hari gwarume momo idia abia noho. Haida be gwarume momo idia abia gabuna dekenai idia lao, bona unuseniai gwarume momo idia abia vadaeni. Herevana dahaka ita karaia, iseda reke negea gaukarana do ita hadokoa lasi. Ita diba Iesu be tanobada ena kahana ta dekenai haroro gaukara ia do koua lasi.​—⁠Mataio 24:⁠14.

²⁴ Hari, tano 230 mai kahana dekenai, Iehova ena Witnes taudia milioni 6 mai kahana be idia gaukara goada noho. February 1, 2005 Gima Kohorona ese tanobada hegegemadai ena hesiai laganina 2004 ena ripoti do ia hahedinaraia. Unai ripoti ese do ia hahedinaraia Iehova be haroro gaukarana ia hanamoa bada. Inai nega kwadogina lalonai, namona be Paulo ena hagoadaia herevana ita badinaia: “Sivarai Namona do oi harorolaia goadagoada.” (2 Timoteo 4:⁠2) Namona be iseda haroro gaukarana ita karaia namonamo ela bona Iehova ia gwau, gaukara ia ore.

Inai lagani amo, Iehova ena Witnes taudia edia Hesiai Laganina ena Ripoti be January 1 ena Gima Kohorona ai do ia hedinarai lasi. Ia be February 1 ena Gima Kohorona lalonai do ia hedinarai.

Oi Haere Diba, A?

• Iesu ese iena hahediba taudia ia hadibaia karana amo dahaka namo ita davaria diba?

• Iesu ese ia haroro henia taudia be edena bamona ia lalodia?

• Dahaka kara ese ita ia doria ita haroro namonamo totona?

• Iesu bamona, edena dala ai Iehova ena ura karaia gaukarana do ita laloa bada noho?

[Picture on page 23]

Bema Iesu bamona taunimanima ita laloa bada, iseda haroro gaukara amo taunimanima do ita durudia

[Picture on page 24, 25]

Iesu be tanobada dekenai ia mai ena badina badana be hereva momokani do ia harorolaia

[Pictures on page 25]

Iehova ena Witnes taudia idia ura bada haroro gaukara do idia karaia namonamo