Ma Haida Durua Baibel Ena Hahediba Hereva Idia Badinaia
“Tano namona dekenai idia moru gaudia, be taunimanima ese hereva idia kamonai mai edia lalona maoromaoro bona goevagoeva danu, bona idia dogoatao auka momokani, idia hesiku lasi, ela bona edia huahuana idia havaraia.”—LUKA 8:15.
1, 2. (a) Dahaka dainai Baibel be Dahaka Ia Hadibaia? bukana idia karaia? (b) Vanegai laganidia ai, hahediba taudia halaoa gaukarana dekenai, Iehova ese edena dala ai ena taunimanima edia hekwarahi ia hanamoa?
REGULA PAINIA ta ese inai buka, Baibel be Dahaka Ia Hadibaia? a ia herevalaia neganai, ia gwau: “Unai buka be namo herea. Lau stadi henia taudia ese idia ura henia bada. Bona lau ura henia danu. Unai buka ese dala ia kehoa taunimanima edia iduara dekenai Baibel stadi oi hamatamaia totona.” Basileia ia harorolaia tadikaka burukana ta ese unai buka ia herevalaia neganai, ia gwau: “Lagani 50 lalonai haroro gaukara amo taunimanima momo lau durua Iehova idia dibaia totona. To, unai buka be Baibel stadi buka namo hereana. Ia lalonai idia noho haheitalai bona laulau do oi moalelaia.” Baibel Hadibaia bukana be unai bamona oi laloa danu, a? Unai Baibel stadi bukana ese oi ia durua Iesu ena hahegani oi hagugurua totona, ia gwau: “Unai dainai do umui lao, bese ibounai be diba tahua taudia do umui halaoa, . . . bona idia dekenai do umui hadibaia, umui dekenai lau henia hereva ibounai be do idia badinaia.”—Mataio 28:19, 20.
2 Unai dainai, Iehova ia itaia iena Witnes taudia 6.6 milioni ese Iesu ena hahegani idia badinaia bona taunimanima be hahediba taudia ai idia halaoa neganai, ia moale bada. (Aonega Herevadia 27:11) Bona Iehova ese edia hekwarahi ia hanamoa noho. Hegeregere lagani 2005 ai, sivarai namona be tano 235 dekenai idia harorolaia bona Baibel stadi 6,061,500 idia karaia. Unai dainai taunimanima momo be, ‘Dirava ena hereva idia kamonai henia, bona idia abia dae. Oibe, idia abia dae momokani. Idia dekenai ia be taunimanima edia hereva lasi, to ia be Dirava ena hereva momokani.’ (1 Tesalonika 2:13) Idia hanaia lagani rua lalonai, hahediba taudia matamatadia 500,000 bamona be Iehova ena taravatu hegeregerena edia mauri idia haidaua vadaeni, bona Dirava dekenai edia mauri idia gwauhamatalaia.
3. Baibel Hadibaia bukana gaukaralaia dalana dekenai, dahaka henanadai idia vara?
3 Vanegai ta ida Baibel stadi oi hamatamaia dainai oi moale, a? Tanobada hegegemadai, kudou-maoro taudia haida idia do noho, idia ese Dirava ena Hereva idia kamonai neganai, ‘idia dogoatao auka momokani ela bona huahua idia havaraia.’ (Luka 8:11-15) Hahediba taudia halaoa gaukarana lalonai, Baibel Hadibaia bukana oi gaukaralaia diba dalana mani ita laloa. Bona inai stadi lalonai henanadai toi do ita herevalaia: (1) Edena dala ai Baibel stadi ta oi hamatamaia diba? (2) Edena hadibaia daladia ese anina namona do idia havaraia? (3) Edena dala ai ta oi stadi henia sibona lasi, to ia oi durua Dirava ena Hereva hadibaia tauna ai ia lao totona?
Baibel Stadi Hamatamaia Dalana
4. Dahaka dainai haida idia ura lasi Baibel idia stadilaia, bona edena bamona idia oi durua diba?
4 Bema ta ese oi ia hamaoroa sinavai ta oi roho hanaia totona, reana do oi karaia lasi. To bema nadi haida idia atoa oi raka hanaia totona, reana do oi ura oi hanaia. Unai hegeregerena, ia bisi tauna do ia ura lasi Baibel ia stadilaia. Reana ia laloa stadi be mai ena hekwarahi bona ena nega bada do ia haorea. Edena bamona ia oi durua diba? Baibel Hadibaia bukana oi gaukaralaia diba, nega kwadogina lalonai mai anina bada gaudia oi herevalaia totona, unai amo stadi oi hamatamaia diba. Bema oi hegaegae namonamo, unai tauna oi lou henia negadia ta ta ai ia do oi durua Iehova ia tura henia totona.
5. Dahaka dainai Baibel Hadibaia bukana oi duahia be namo?
5 To, Baibel Hadibaia bukana amo ta oi do durua lasi neganai, namona be unai buka oi dibaia namonamo guna. Unai buka ena karoa ginigunana amo ela bona dokona oi duahia haorea vadaeni, a? Headava tau bona hahine be holide totona idia lao neganai, unai buka idia abia lao bona kone dekenai idia laga-ani neganai, idia duahia. Turist taudia dekenai gau haida ia hoihoilaia hahine ta be unai tau bona hahine dekenai ia lao neganai, Baibel be Dahaka Ia Hadibaia? bukana ia itaia. Ia ese idia ia hamaoroa hora haida gunanai, unai henanadai ena haere totona Dirava ia guriguri henia. Idia ese unai hahine dekenai unai buka ta idia henia. Nega oi atoa unai buka be nega iharuana oi duahia totona, reana hospital dekenai doketa oi naria eiava gaukara o sikuli ena laga-ani negana lalonai oi duahia, a? (Efeso 5:15, 16) Bema unai bamona oi karaia, unai buka do oi dibaia namonamo bona dala do ia kehoa ma haida dekenai oi herevalaia totona.
6, 7. Edena dala ai Baibel Hadibaia bukana oi gaukaralaia diba Baibel stadi oi hamatamaia totona?
6 Unai buka be haroro gaukara lalonai oi gaukaralaia neganai, namona be rau 4, 5, bona 6 ai idia noho laulau, siri bona henanadai oi gaukaralaia namonamo. Hegeregere, herevahereva oi hamatamaia totona oi henanadai, “Hari taunimanima momo ese hekwakwanai idia davaria dainai, oi laloa hakaua dalana be edeseniai ita davaria diba?” Unai tauna ena haere oi kamonai namonamo murinai, 2 Timoteo 3:16, 17 oi duahia, bena oi hahedinaraia Baibel ese taunimanima edia hekwakwanai hanaia dalana ia gwauraia. Bena, rau 4 bona 5 oi kehoa bona ruma tauna oi nanadaia: “Inai rau dekenai idia noho laulau amo, edena laulau ese emu lalona ia hametaua?” Ruma tauna ese laulau ta ia poinia neganai, namona be buka oi henia ia dogoatao totona, bena unai laulau badinai ia noho sirina be emu Baibel amo oi duahia. Bena rau 6 oi duahia bona ruma tauna oi nanadaia, “Inai rau ena henunai idia noho henanadai siks amo, oi ura edena henanadai ena haere oi diba?” Ruma tauna ese ta ia abia hidi neganai, unai henanadai ia haerelaia karoa oi hahedinaraia. Bona buka be ia dekenai oi rakatania, bena dala oi karaia oi lou henia unai henanadai umui herevalaia totona.
7 Paragraf 6 lalonai ita herevalaia kiki herevana be miniti 5 lalonai do oi karaia. Bona unai miniti 5 lalonai do oi diba ruma tauna be dahaka ia laloa bada, siri rua oi duahia bona herevalaia, bona dala oi karaia oi lou henia totona. Reana unai nega kwadogina lalonai ia danu oi herevahereva karana ese ia do ia hagoadaia bada. Unai dainai herevana ta ia bisi bada, to do ia ura miniti haida lalonai umui kiki, unai amo ia oi durua ‘mauri ia lao henia dalana’ ia badinaia totona. (Mataio 7:14) Gabeai ruma tauna be ena ura ia habadaia neganai, namona be stadi negana oi halataia diba.
Hadibaia Dala Namodia
8, 9. (a) Edena bamona emu Baibel stiuden oi hahegaegaea diba hekwakwanai ia haheaukalaia totona? (b) Iseda abidadama hagoadaia kara namodia be edeseniai ita davaria diba?
8 Ta ese Baibel ena hadibaia herevadia ia badinaia matamaia neganai, hekwakwanai haida idia vara diba, bona unai ese ena tubu lauma dalanai do ia koua. Aposetolo Paulo ia gwau: “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:12) Paulo ese unai hahetoho be lahi ese ruma ta ia araia karana ida ia hahegeregerea, bema ruma be au bona biri amo idia karaia, lahi ese ia hadikaia haraga, to golo, siliva bona nadi amo idia karaia rumana be lahi ese do ia hadikaia lasi. (1 Korinto 3:10-13; 1 Petero 1:6, 7) Unai hegeregerena, namona be emu Baibel stiuden oi durua abidadama goadana ia hahedinaraia totona, unai amo hahetoho negadia lalonai ia gini goada diba. Unai be hegeregere lahi ese idia hadikaia lasi gaudia amo ruma oi haginia.
9 Salamo torea tauna ese Iehova ena hereva be “lahi dekena amo, idia hagoevaia nega 7 siliva” ida ia hahegeregerea. (Salamo 12:6) Oibe, Baibel ese kara namodia idauidau ia gwauraia, unai ese ita ia durua diba iseda abidadama ia goada totona. (Salamo 19:7-11; Aonega Herevadia 2:1-6) Bona Baibel Hadibaia bukana amo Baibel ita gaukaralaia namonamo dalana ia hahedinaraia.
10. Edena dala ai stiuden tauna oi durua diba Baibel ia laloa bada totona?
10 Stadi lalonai, namona be stiuden tauna oi durua karoa ta ta lalonai idia noho siri ia laloa bada totona. Namona be henanadai amo stiuden tauna oi durua Baibel ena siri ia lalopararalaia, bona ena mauri lalonai ia badinaia totona. Namona be ita naria namonamo, ia totona abia hidi ita karaia lasi. To, Iesu ena haheitalai ita tohotohoa. Taravatu ia diba momo tauna ta ese Iesu ia henanadai henia neganai, ia gwau: “Taravatu ena buka lalonai edena bamona ia torea? Edena bamona oi duahia?” Unai tauna be Baibel amo ia haere, bona Iesu ese ia durua edena bamona unai hakaua herevadia be iena mauri lalonai ia badinaia diba. Iesu ese haheitalai ta ia gaukaralaia, unai amo unai tauna ia durua ia hadibaia herevana ena namo ia lalopararalaia totona. (Luka 10:25-37) Baibel Hadibaia bukana lalonai, auka lasi haheitalai momo idia noho, bona oi gaukaralaia diba emu stadi tauna oi durua Baibel ena hakaua herevadia ia badinaia totona.
11. Stadi negadia ta ta ai, paragraf hida umui karaia be namo?
11 Iesu ese auka lasi dalanai hereva aukadia ia herevalaia hegeregerena, unai buka ese auka lasi dalanai Baibel ia herevalaia. (Mataio 7:28, 29) Unai dainai, ma haida oi hadibaia neganai, namona be auka lasi dalanai hereva oi hahedinaraia goevagoeva. Stadi oi karaia haraga lasi. To stiuden ena noho dalana bona ena diba oi laloa, unai amo oi diba paragraf hida do umui karaia. Iesu be ena hahediba taudia edia diba ena hetoana ia lalopararalaia, bona unai negai idia dekenai hereva momo ia gwauraia lasi.—Ioane 16:12.
12. Apendiks be edena bamona ita gaukaralaia be namo?
12 Baibel Hadibaia bukana ena apendiks lalonai, hereva idauidau 14 idia noho. Stadi naria tauna be ena stiuden ena diba hegeregerena do ia abia hidi paragraf hida do idia stadilaia. Hegeregere, bema stiuden ta be guna ia abia dae hahediba herevadia dainai, stadi herevana ia lalopararalaia lasi eiava ia be mai ena henanadai ta, namona be iena henanadai ia haerelaia apendiks ena kahana oi kehoa bona ia sibona ese ia duahia. To bema oi diba emu stiuden ese unai kahana do ia lalopararalaia lasi, namona be umui herevalaia hebou. Apendiks dekenai mai anina bada Baibel ena hereva idauidau idia noho, hegeregere “Taunimanima be mai Edia Mase Diba Lasi Laumana, A?” bona “ ‘Babulonia Badana Dibaia Dalana.’ ” Reana do oi ura emu stiuden ida unai umui herevalaia hebou. Apendiks dekenai idia noho hereva totona henanadai be lasi, unai dainai apendiks ena kahana ta ta edia hereva oi dibaia be namo, unai amo mai anina bada henanadai oi hegaegaelaia diba.
13. Guriguri karana ese edena bamona ta ena abidadama ia hagoadaia diba?
13 Salamo 127:1 ia gwau: “Bema Lohiabada ese ruma ia haginia lasi neganai, unai ruma idia haginia taudia idia hekwarahi kava noho.” Unai dainai, Baibel stadi karaia totona oi hegaegae neganai, namona be Iehova ena heduru totona oi guriguri. Stadi oi hamatamaia bona oi hadokoa negadia ai oi gwauraia guriguridia ese emu hetura karana namona Iehova ida ia hahedinaraia be namo. Stiuden oi hagoadaia Iehova ia noia ia dekenai aonega ia henia, unai amo Iena Hereva do ia lalopararalaia, bona ena mauri lalonai ia badinaia diba. (Iamesi 1:5) Bema unai bamona ia karaia, do ia hegeregere hahetoho idauidau ia haheaukalaia bona ena abidadama ia goada.
Baibel Stiuden Durua Hadibaia Taudia ai Idia Lao
14. Baibel stiuden taudia be edena bamona idia goada idia lao diba?
14 Baibel stiuden taudia idia goada bona Dirava ena Hereva hadibaia taudia ai idia lao totona, namona be Iesu ese ena hahediba taudia dekenai ia gwauraia “hereva ibounai” idia badinaia. (Mataio 28:19, 20; Kara 1:6-8) Stiuden ta oi durua Dirava ida ena hetura karana ia hagoadaia totona, dahaka oi karaia be namo?
15. Dahaka dainai emu Baibel stiuden tauna oi hagoadaia Keristani heboudia dekenai ia lao totona?
15 Stadi oi hamatamaia negana amo, stiuden tauna oi boiria oi ida kongrigeisen ena hebou dekenai umui lao totona. Ia oi hadibaia, hebou ese ia do ia durua Dirava ena Hereva hadibaia tauna ai ia lao totona. Wiki haida lalonai, stadi ta ta ena murinai, miniti haida oi gaukaralaia kongrigeisen ena hebou bona hebouhebou badadia amo ita abia lauma aniani ena program idauidau oi herevalaia totona. Unai hebou amo oi abia namo idauidau oi herevalaia. (Heberu 10:24, 25) Stiuden tauna be hebou ia lao henia hanaihanai neganai, ia be Dirava ena Hereva hadibaia tauna ai ia lao diba.
16, 17. Baibel stiuden tauna be edena tahua gaudia haida ia atoa diba?
16 Stiuden tauna oi durua ia hagugurua diba tahua gaudia ia atoa totona. Hegeregere, ia oi hagoadaia ia dibaia noho gaudia be ena turana eiava varavara taudia dekenai ia herevalaia. Danu, ia oi hamaoroa, tahua gauna ia atoa Baibel ibounai ia duahia haorea totona. Bema ia oi durua Baibel duahia hanaihanai karana ia manadalaia totona, ia bapatiso murinai unai kara ese ia do ia durua bada. Ma danu, namona be stiuden tauna oi durua Baibel Hadibaia bukana ena karoa ta ta ena henanadai badana ia haerelaia siri ta ia laloatao totona. Bema unai bamona ia karaia, ‘gaukara namona momokani tauna ai do ia lao, Dirava ese ia dainai do ia moale bada. Vadaeni ia ese hereva momokani do ia hadibaia maoromaoro, bona Dirava ena vairanai do ia hemarai lasi.’—2 Timoteo 2:15.
17 Namo lasi stiuden tauna oi hadibaia Baibel ena siri be ena kwarana amo ia gwauraia sibona, eiava unai siri ena hereva badadia sibona ia gwauraia. To namona be ia oi hagoadaia bema haida ese iena abidadama dainai idia henanadai, unai siri amo edia henanadai ia haerelaia dalana ia dibaia. Namona be kiki hereva kwadogidia umui tohoa hebou, oi be varavara eiava gaukara turana ta, bona ia dekenai henanadai haida oi henia. Bena stiuden be ena abidadama ena badina ia gwauraia neganai, namona be ia oi hadibaia unai do ia karaia ‘mai ena hemataurai bona manau danu.’—1 Petero 3:15.
18. Baibel stiuden tauna be bapatiso lasi pablisa ai ia lao murinai, edena bamona oi durua noho diba?
18 Gabeai, stiuden tauna do ia hegeregere haroro gaukara ia karaia totona. Ia oi hamaoroa unai gaukara ita karaia be hahenamo badana. (2 Korinto 4:1, 7) Bema elda taudia idia itaia stiuden tauna be ia hegeregere bapatiso lasi pablisa ai do ia lao, namona be ia oi durua kiki hereva kwadogina ia hegaegaelaia bona haroro gaukara lalonai umui gaukara hebou. Namona be hanaihanai hesiai gaukara ena kahana idauidau lalonai umui gaukara hebou, bona lou henia karaia dalana be ia dekenai oi hadibaia. Emu haheitalai namona ese ia do ia hagoadaia bada.—Luka 6:40.
‘Oi Bona Oi Idia Kamonai Taudia Danu ese Mauri Do Umui Davaria’
19, 20. Dahaka tahua gaudia ita atoa be namo, bona dahaka dainai?
19 Oibe, ta ita durua ‘hereva momokani do ia diba’ totona be gaukara badana. (1 Timoteo 2:4) Bema ta ita durua Baibel ena hadibaia hereva ia badinaia totona, unai ese moale bada ia havaraia. (1 Tesalonika 2:19, 20) Oibe, inai tanobada hegegemadai hadibaia gaukarana lalonai Dirava ida ita gaukara hebou, be hahenamo badana!—1 Korinto 3:9.
20 Iehova ese Iesu Keriso bona aneru goadadia do ia gaukaralaia, “sivarai namona idia abia dae lasi taudia dekenai davana metau do ia henidia.” (2 Tesalonika 1:6-8) Taunimanima be edia mauri idia haboioa diba. Tahua gauna oi atoa Baibel be Dahaka Ia Hadibaia? bukana amo Baibel stadi ta oi hamatamaia totona, a? Unai gaukara oi karaia neganai, dala oi kehoa ‘oi bona oi idia kamonai taudia danu ese mauri do umui davaria’ totona. (1 Timoteo 4:16) Unai dainai, gau badana be hari inai nega lalonai ma haida ita durua Baibel ena hadibaia hereva idia abia dae totona.
[Footnote]
a Iehova ena Witnes taudia ese idia karaia.
Dahaka Oi Dibaia?
• Dahaka dainai Baibel Hadibaia bukana idia karaia?
• Edena dala ai Baibel Hadibaia bukana amo stadi oi hamatamaia diba?
• Edena hadibaia daladia ese anina namona idia havaraia?
• Edena dala ai stiuden tauna oi durua diba Dirava ena Hereva hadibaia tauna ai ia lao totona?
[Picture on page 8]
Inai buka oi gaukaralaia namonamo, a?
[Picture on page 9]
Nega kwadogina ai ta ida unai buka oi herevalaia neganai, unai ese ia do ia durua Baibel amo diba ma haida ia tahua totona
[Picture on page 11]
Stiuden tauna be Baibel ia laloa bada totona, dahaka oi karaia be namo?
[Picture on page 12]
Baibel stiuden tauna oi durua ia goada ia lao totona