Taunimanima Hagoadaia Lauma Gaudia Idia Tahua Totona

¹ Hari, memero kekeni momo herea ese Basileia ena sivarai namona idia harorolaia, guna be unai bamona lasi. Idia tausen tausen momo ese Kohelete 12:1 ena hereva idia badinaia, ia gwau: “Oi ia Havaraia Diravana be emu tauhau negana lalonai oi laloatao.” Dahaka ese unai memero kekeni ia hasiahudia haroro gaukara idia karaia noho totona, bona dahaka dainai idia momo be pioneer gaukara idia karaia?

² Edena bamona memero kekeni ma haida ita hagoadaia diba lauma gaudia idia tahua totona? Edena bamona idia ita hadibaia diba? Tamana bona sinana be edena bamona edia natudia idia durudia diba idia be hereva momokani idia moalelaia totona, bona edia lalona idia hadaia gabeai lauma gaudia do idia tahudia totona?

³ Reana idia momo be mero namona Timoteo ena kara idia tohotohoa. Ia maragi negana amo iena sinana bona tubuna be ia dekenai lauma gaudia idia hadibaia, bona ia idia hagoadaia lauma gaudia do ia tahudia totona. (2 Tim. 3:​14, 15) Unai dainai, dala ia kehoa ena hesiai gaukara ia habadaia totona, ena diba be ia hegeregere bona ia ura unai gaukara ia karaia.​—Kara 16:​1-3.

⁴ Lauma Ena Badina Oi Atoa: Namona be tamana bona sinana ese natudia idia hadibaia herevadia be Iehova ena hereva amo, badina unai ese edia natudia dekenai ‘aonega ia henia diba hahemauri do idia davaria totona.’ (2 Tim. 3:15) Namona be tamana bona sinana ese edia natudia idia hadibaia namonamo idia ese Bible, Dirava ena Hereva, do idia ura henia bada totona. Unai ia vara totona, anina be hanaihanai idia dekenai Bible stadi idia karaia ta ta edia lagani ena bada hegeregerena, bona hebou dekenai idia lao. Memero kekeni ese abidadama bada do idia abia totona bona goada idia abia lauma gaudia do idia tahua totona, gau badana be sibodia do idia stadi bona edia turana karana Iehova dekenai do idia habadaia.​—1 Tes. 5:21; Heb. 11:1.

⁵ Keristen memero kekeni do idia ura lauma gaudia idia tahua bema idia itaia edia tamana, sinana, bona kongregesen lo taudia edia haheitalai be ia namo bona idia be “Iehova moalelaia” karana idia hahedinaraia. (Neh. 8:10) Moale idia hahedinaraia neganai, ita ibounai ese memero kekeni dekenai ita hahedinaraia Keristen momokani kara ena maduna be ia metau lasi.​—1 Ioane 5:3.

⁶ Pioneer, misinari, sekit bona distrik naria taudia ese memero kekeni danu idia haroro hebou neganai eiava edia heduru hereva amo memero kekeni momo herea idia hagoadaia. Tamana bona sinana edia heduru ta be nega ibounai hesiai gaukara idia karaia taudia be edia ruma dekenai idia boiridia idia aniani hebou totona, eiava ma nega haida idia danu Keristen moale karana idia karaia diba. Memero kekeni durua namonamo karana dekenai Iesu Keriso be haheitalai namona ita tohotohoa totona.​—Mar. 10:​13-16.

⁷ Tahua Gaudia Idia Atoa: Tamana bona sinana idia durudia namonamo dainai, nega momo idia do maragi neganai, memero kekeni be sibodia edia ura dainai lauma gaudia do idia tahua. Memero kekeni ese edia lalona idia hadaia dahaka kara namodia do idia ura tahua neganai, hegeregere pioneer gaukara, Witness momo lasi gabuna ta lao henia haroro gaukara karaia totona, Betele gaukara, misinari gaukara, eiava unai bamona gaukara ta idia ura do idia karaia, namona be mai moale danu tamana, sinana, bona lo taudia haida ese do idia hagoadaia, nega ta ta heduru hereva idia henidia diba idia ura karaia gaudia do idia karaia momokani totona.

⁸ Kongregesen ta ta iboudiai be ruma bese bamona, unai dainai namona be ita ura memero kekeni ita durudia hereva momokani lalonai idia raka noho totona bona lauma dalanai idia goada idia lao totona. Unai ita karaia diba iseda lalokau idia dekenai ita hahedinaraia neganai, bona idia ita hagoadaia lauma gaudia idia tahua noho totona.

[Questions]

1-3. (a) Hari, Kohelete 12:1 ena hereva be edena bamona ia guguru? (b) Timoteo Iharuana 3:​14, 15 oi duahia. Unai siri bona Kara 16:​1-3 ena hereva be dahaka gau tamona idia herevalaia? (c) Hari, tamana bona sinana be edena henanadai do idia laloa be namo?

4. (a) Tamana bona sinana be 2 Timoteo 3:15 ena hereva idia badinaia totona dahaka do idia karaia? (b) Iseda memero kekeni be Keristen goada taudia ai idia lao totona, dahaka gau toi idia karaia be namo?

5. Nehemia 8:10 oi duahia. Tamana bona sinana be edena bamona idia hahedinaraia diba Dirava ena ura badinaia karana be ia metau lasi?

6. Tamana bona sinana be dahaka idia karaia diba edia natudia be hebamo namodia idia abia totona?

7, 8. Kongregesen ta ta iboudiai be dahaka idia karaia diba memero kekeni idia durudia totona?