Mauri Hanaihanai Bukana amo Baibel Stadi Hamatamaia Dalana
1 Taunimanima ita lalokau henidia dainai, lauma dalanai idia hitolo bona idia ranu mase taudia ita ura lou henidia haraga, hereva momokani amo do ita durudia totona. (Mat. 5:6) Kamonai tauna ta ita davaria neganai, ena kamonai karana ia bodo garina, namona be ia ita laloatao bona karaharaga ita lou henia, durua totona. Gaukara dekenai do ita kwalimu totona, ita hegaegae be gau badana.
2 Namona be ita ura Baibel stadi ita hamatamaia. (Mat. 28:20) Nega ginigunana English gado dekenai Mauri Hanaihanai bukana idia halasia neganai, hamatamaia herevana lalonai ia gwau: “Inai be buka namona taunimanima iboudiai stadi henidia totona, matamata bona buruka taudia, herevana edia edukeisini ia bada eiava ia bada lasi.” Idia torea dalana ese ita ia durua stadi ita karaia namonamo totona, bona pablisa matamata taudia idia karaia diba danu. Bema lou-henia gaukara ita karaia namonamo, Baibel stadi hamatamaia gaukara dekenai do ita kwalimu.
3 Baibel Stadi be Edena Bamona Do Ita Hamatamaia Diba? Taunimanima ita lou henidia neganai, namona be guna ita hereva henia sivaraina, eiava ita henia henanadai dekenai hereva ma ta do ita atoa kau. Reana guna ia dekenai mase taudia be edena bamona ena sivarai oi kikilaia, bona inai henanadai oi henia, “Iseda lalokau taudia idia mase neganai idia totona helaro ia noho, a?” Oi hadibaia toreisi lou ena helaro be momokani do ia vara; Baibel lalonai idia vara vadaeni toreisi lou haida edia sivarai idia noho. Buka ena rau 167-9 dekenai idia noho laulaudia oi kikilaidia. Bena murinai rau 166 paragraf 1 bona 2 edia sivarai oi kikilaia. Bema ia ura kamonai noho, oi hamaoroa do oi giroa mai sivarai ma haida do umui kikilaia totona.
4 Reana tamana o sinana ta oi hereva henia bona ia gwau natudia naridia be ia auka badina hekwakwanai momo idia vara. Reana, inai bamona do oi hereva diba:
◼ “Tama sina iboudiai ese edia natudia edia namo idia tahua. Baibel lalonai tama sina totona heduru hereva idia noho edia natudia idia hadibaia namonamo totona, bena mauri namona mai ena badina bona mai ena gaukara do idia abia. Unai dainai, ruma bese ai hagoadadia Baibel idia stadilaia hebou totona. [Rau 246 paragraf 23 ena hereva oi gwauraia.] Diba do idia abia neganai, ruma bese taudia iboudiai be hahenamo do idia davaria diba ela bona hanaihanai.” Ioane 17:3 oi duahia. Oi hamaoroa oi ura oi giroa mai, edia ruma bese stadi dalana do oi hahedinaraia totona.
5 Bema oi be mero o kekeni eiava oi be pablisa matamatana ta, bona nega ginigunana ruma tauna oi hereva henia neganai Paradaiso ena helaro oi kikilaia sisina, oi lou henia neganai buka oi kehoa rau 3 dekenai, bona inai bamona do oi hereva:
◼ “Baibel lalonai gwauhamata ta ia gwau Dirava ena ura idia karaia taudia be tanobada namona dekenai do idia noho diba, bona unuseniai moale bona maino do idia davaria, inai laulau ia hahedinaraia hegeregerena. Inai buka ese ia hahedinaraia dahaka do ita karaia unai hahenamo do ita moalelaia diba totona.” Nega sisina lalonai stadi dalana oi herevalaia, bona oi noia karaia dalana do oi hahedinaraia totona.
6 Ita be Iesu ena hahediba taudia dainai, iseda maduna ia noho taunimanima ita durudia totona. (Roma 10:14) Bema ruma tauna dekenai magasin eiava buka ita hariharilaia eiava ia danu ita kiki namonamo sibona, iseda maduna ia noho do ita lou henia bona ita durua noho totona. (Mat. 9:37, 38) Bema unai gaukara do ita karaia namonamo, iboudiai ese do idia vara hahenamo idia moalelaia diba.—1 Tim. 4:16.
This article is repeated in km 8/95.