‘Lohiabada Ena Gaukara Karaia Goadagoada’
1 April bona May lalonai tiokratik gaukara bada herea do ita karaia be mai eda ura ida ita naria noho! April 14 ai Iesu ena mase laloatao hebouna do ita karaia. Taunimanima momo herea ita hagoadadia unai mai anina bada hebouna dekenai idia mai: gaukara turadia, murimuri varavara, sikuli turadia, kamonai matamaia taudia, bona Baibel stadi taudia. Do oi boiridia taudia edia ladana ena lista oi torea, ta oi reaia lasi totona.
2 Vairana wiki ai Memorial idia lao henia taudia ibounai do ita hagoadaia April 23 ai, pablik tok badana ladana, “Tomadiho Koikoi Ena Dokona be Kahirakahira” kamonaia totona do idia mai. Ita ura bada unai hereva idia kamonaia taudia do idia diba kongregesen idia bamoa hanaihanai, hebou badadia dekenai sibona lasi, be mai anina bada.
3 Basileia Sivarai Do Idia Halasia: April 23 hebouna ai, iseda lalona do ia veria gauna ta be nega korikori ai idia halasia rau hani Basileia Sivarai pepana namba 34 do ita abia, bona do ita hariharilaia momo ela bona May 14. Umui itaia diba Memorial hebouna ena vairana bona murina negana ai “Lohiabada ena gaukara do umui karaia goadagoada,” ani?—1 Kor. 15:58.
4 Basileia Sivarai ena kopi momo be kongregesen ta ta do idia henia. Unai Basileia Sivarai idia udaia maua idia atoa namonamo be namo bona idia kehodia lasi ela bona April 23 ena hebou ia ore murinai. Unai neganai pablisa ese idia abia diba bona taunimanima dekenai idia hariharilaia diba. April 23 ai, kongregesen hebouna, sekit hebouhebou ai, eiava dina tamona hebouhebouna murinai, idia hebou taudia iboudiai ta ta be kopi ta do idia abia, ena hereva do idia dibaia namonamo totona bona hariharilaia totona do idia hegaegae.
5 Elda Do Idia Gaukara Goadagoada: Inai hua ena matamana ai elda idia hebou be namo unai gaukara ena kahana idauidau herevalaia totona. Kongregesen iboudiai ese idia abia teritori ibounai idia karaia be namo. Unai pepa hariharilaia negana ia do ore lasi neganai, ita gaukara goada bona hua 6 gunanai ita lao henia lasi teritori ita karadia. Unai gaukara be mai anina bada dainai, do ita ura nega bada ita atoa unai hesiai gaukara karaia totona. Ita diba pablisa momo be heduru painia totona edia ladana do idia henia. Reana Baibel stadi idia abia noho taudia momo be ita do idia bamoa, bapatiso lasi pablisa ai do idia lao dainai. Lohiabada ena gaukara do ita karaia hebou be moale bada negana!
6 Namona be Kongregesen Buka Stadi naria taudia be dala idia karaia, edia grup be Saturday bona Sunday ai idia haroro totona. Iboudiai do ia hagoadaia unai gaukara ai do idia vareai. Saturday bona Sunday sibona lasi, to unai pepa hariharilaia negana ena wiki lalodiai adorahi ta o ma haida ai haroro grup umui karaia danu be namo. Idia ura idia haroro noho sikuli taudia dainai haida do idia ura sikuli murinai haroro totona idia hebou.
7 Pablisa bona painia be dina ta ta ai hesiai gaukara do idia hamatamaia haraga dalana ai haroro gaukara heboudia umui hegaegaelaia. Unai hebou idia kwadogi be namo. Idia ta ta ai Basileia Sivarai henia dalana haragana gwauraia. Adorahi ena haroro gaukara heboudia ai Basileia Sivarai idia abia taudia dekenai lou henia karaia daladia ta o rua oi gwauraia diba. To, pablisa haida do idia ura dabai bona adorahi ai unai pepa hariharilaia gaukarana do idia karaia. Unai neganai, namona be haroro naria tauna be do ia itaia teritori be ia hegeregere. Kamonai toana idia hahedinaraia taudia ibounai edia ladana bona adres be ruma-ta-ruma-ta rekodi pepana dekenai oi torea. Umui kikilaia hereva badadia be unai pepa dekenai oi torea diba. Unai ese dala do ia kehoa wiki eiava hua lalonai oi lou henia totona.
8 Bema kongregesen ta ese ma kongregesen ta ia durua, ena teritori idia karaia totona, namona be kamonai taudia edia ladana bona adres be teritori ia naria kongregesen idia henia.
9 Tama bona sina, emui natudia be bapatiso lasi pablisa ai idia lao totona idia gaukara goada, a? Kongregesen momo lalodiai, idia kara namo natudia momo, ena be idia do pablisa lasi, be lagani haida lalodiai edia tama sina goadadia idia bamoa haroro gaukarana ai. Tama sina ese edia natudia be pablisa ai idia lao diba eiava lasi idia laloa bada be namo. Elda rua be ruma bese kwarana ida kahana idauidau idia herevalaia diba bena unai amo do idia diba natuna be bapatiso lasi pablisa ai ia lao diba, eiava.—om-MO rau 100-101.
10 Oiemu kongregesen ena teritori lalonai pablisa ta be Iehova hanamoa boubouna ia henia noho lasi, a? (Heb. 13:15) Idia haroro bona hebou noho lasi taudia momo, ena be Baibel ena taravatu maorodia idia do badinaia noho, be reana idia lalo-manoka eiava mauri ena lalo-hekwarahi ese idia hametaudia. Elda ta ese ia vadivadi henia neganai, reana unai ese ena lalona do ia hamarerea bena kongregesen do ia bamoa hanaihanai lou, bena nega maorona ai, haroro gaukara do ia karaia lou.
11 Idia Hegeregere Taudia Ibounai ese Inai Gaukara mai Moalena Idia Karaia Diba: Umui memero kekeni haida dekenai ruma-ta-ruma-ta gaukara karaia be ia auka, a? Vanegai sibona haroro gaukara umui matamaia taudia danu, emui hemami be edena bamona? Inai Basileia Sivarai pepana namona umui gaukaralaia neganai do umui moale! Karaia totona herevalaia dalana haragana oi diba sibona be hegeregere.
Reana inai bamona do oi hereva:
◼ “Inai hua lalonai mai anina bada pepapepana ta ai hariharilaia noho, bona tano 232 ai idia karaia noho. Ena sivarai be mai anina bada badina ita dekenai badina aukana ta ia henia, unai dainai ita abia dae diba hari ita abia hekwakwanaidia be do idia ore. Ai ura oi sibona emu kopi ta oi abia.”
Eiava inai oi tohoa:
◼ “Inai hua lalonai ura-kwalimu taudia milioni 5 bamona be gado idauidau momo ai mai anina bada pepapepana ta idia hariharilaia noho. Ia be hari ita abia noho hekwakwanaidia do idia ore urana idia abia taudia totona idia hegaegaelaia. Inai be oiemu kopi.”
Reana inai auka lasi henia dalana be namo oi dekenai:
◼ “Ai be taunimanima ibounai ai hagoadaia noho inai mai anina bada pepapepana ladana [Basileia Sivarai ena hereva kwarana duahia] idia duahia totona. Mani rau 2 dekenai idia bada noho hekwakwanaidia edia sivarai oi itaia. Hegeregere . . . [oi abia hidi kahana oi duahia]. Ai laloa inai nega korikori ai idia halasia sivaraina do oi moalelaia. Inai be oiemu kopi.”
12 Basileia Sivarai pepapepana idia abia taudia ta ta oi lalodia bada. Oi hereva metaira bona emu hereva hahedinaraia namonamo; oi haragaharaga lasi. Ita ura eda teritori ita karaia namonamo bona Basileia Sivarai idia ura duahia taudia ibounai dekenai kopi ta ita henia. Bema ruma dekenai ta ia noho lasi, ruma-ta-ruma-ta rekodi pepana dekenai oi torea hedinarai bena nega namona ai oi lou henia, Basileia Sivarai henia toho totona. Basileia Sivarai be dala gaukarana ai oi hariharilaia diba bema ta ia hahedinaraia ia ura ia duahia neganai. Namona be hoihoi gaudia idia herevalaia pepadia bamona oi henia kava henia kava lasi. Loaloa tauna oi hereva henia bona ia dekenai oi hahedinaraia idia torea gaudia be mai anina bada. Basileia Sivarai be nega bona dala idauidau ai oi hariharilaia, hegeregere, oi loaloa neganai, eiava dina tubua ena laga-ani negana ai gaukara hebou taudia oi hereva henidia neganai. Gorere dainai idia loaloa diba lasi taudia ese vadivadi taudia, doketa, nesi, hoihoi taudia, bona edia ruma dekenai idia mai taudia ma haida dekenai idia henia diba.
13 Pepapepa hariharilaia negana ai, lou henia hida do oi karaia? Momo herea, badina Basileia Sivarai dekenai kamonai toana idia hahedinaraia taudia ibounai do oi lou henidia dainai. Nega ginigunana oi hereva henidia neganai, Basileia Sivarai oi herevalaia. Bena, oi lou henia neganai, Basileia Sivarai ena hereva be nega korikori ai idia halasia oi herevalaia sisina. Ruma tauna ese ia duahia gauna dekenai ena lalohadai ia gwauraia neganai oi kamonai namonamo. Iena hereva ese oi do ia durua bena edena magasin oi henia toho bona reana gabeai dahaka do oi hegaegaelaia, umui herevalaia totona, be do oi diba. Bema oi lou henia negana ai ia kamonai namonamo, Baibel stadi oi hamatamaia toho.—1 Kor. 3:6, 7.
14 “Emui Hekwarahi be Hekwarahi Kava Lasi”: Inai gaukara ibounai be mai anina, a? Paulo ese Korinto taudia ia hamaorodia: “Lohiabada ena gaukara lalonai, emui hekwarahi be hekwarahi kava lasi momokani.” (1 Kor. 15:58) Lagani momo lalodiai, iseda Basileia Sivarai hariharilaia gaukarana ena hahenamo be bada. Tau ta mai ena adavana ida be ruma ta idia noholaia totona idia vareai neganai, drawer ta lalonai Basileia Sivarai pepana ta idia davaria. Unai gauna sibona be ruma lalonai ia noho. Idia duahia murinai, unai gabu ena kongregesen idia davaria bena Baibel stadi idia noia. Hebou iboudiai idia lao henia matamaia bena gabeai idia hahedinaraia idia ura bapatiso. Reana oi henia kopi ta ese unai bamona huahua do ia havaraia!—Awake!, November 8, 1976, rau 15 itaia.
15 Iseda vairanai gaukara bada herea ia noho. Iseda tahua gauna be kongregesen ta ta ese edia teritori ibounai be May 14 ai idia karaia ore eiava bema gau ta dainai Basileia Sivarai hariharilaia negana idia halataia, hua dokonai idia haorea. Idia hamomokania vadaeni regula bona heduru painia taudia ta ta be Basileia Sivarai kopi 250 do idia abia. Kongregesen pablisa ta ta be kopi 50 eiava henunai do idia abia diba. Pablisa bona painia be do idia hariharilaia diba ena bada sibona idia abia be namo bona oredia idia henia lou, ma haida ese idia gaukaralaidia totona. Iseda gaukara hebou namonamo karana amo taunimanima momo herea dekenai inai mai anina bada pepapepana do ita henia. Bema kongregesen haida edia teritori be bada dainai May 14 ai idia haorea lasi bona kopi momo idia do noho, umui badinai ia noho kongregesen ena heduru umui noia diba. Kongregesen haida dekenai bema pablisa be heduru painia idia karaia eiava idia haroro momo, sibodia ese edia kongregesen do idia durua diba teritori haorea totona.
16 Unai gaukara hagugurua totona, mai eda lalona ibounai ida Iehova ita badinaia be gau badana. (Kol. 3:23) Inai be taunimanima hamauria gaukarana. Taunimanima ese hari tanobada ena dika toana idia laloa maragi diba lasi. Nega ia kwadogi noho. Namona be idia abia dae taunimanima be tanobada ena hekwakwanai haorea dalana idia diba lasi. Dirava sibona ia diba. Iehova ena hahenamo idia ura abia taudia ese kara ta idia abia hidi haraga be namo, bona Ia ena ura hegeregerena ai.
17 May 14 ai unai pepapepa hariharilaia negana ia ore neganai, do ita laga-ani, a? Lasi! Paulo ena hereva hegeregerena do ita gaukara goadagoada noho.