Basileia Sivarai Badana, Iboudiai Totona
1 April 24 amo, ita be Basileia Sivarai, gabu idauidau ai laloa namonamo taudia edia lalona ia hamarerea pepapepana, ita hariharilaia matamaia! Ena hereva be nega korikori ai idia halasia sibona lasi to idia kamonaia haraga be namo. Kongregesen iboudiai edia pablisa idia ura taunimanima tausen momo dekenai unai sivarai idia halasia, unai amo idia hahedinaraia mai edia lalona ibounai ida unai gaukara idia durua. Unai ibounai lalonai oi gaukara goadagoada, a?
2 Basileia Sivarai ena kopi momo be kongregesen ta ta dekenai idia siaia, unai amo pablisa ta ta be 50 bamona idia abia bona painia ta ta be 250 bamona idia abia. Hida oi hariharilaia vadaeni? Bema guna oi laloa emu gaukara do oi habadaia to unai ia vara lasi, unai gaukara ena ore negana, May 14 ia do abia lasi lalonai, habadaia daladia haida oi laloa vadaeni, a? Heduru painia karaia totona emu ladana oi henia diba, a? Wiki lalonai idia hegaegaelaia haroro heboudia, hegeregere adorahi idia karaia gaudia, oi lao henia diba, a?
3 Elda taudia be umui karaia teritori do idia herevalaia lou. Bema kongregesen ese ena teritori ena kahana haida be do ia karaia diba lasi, elda taudia ese idia noho kahirakahira kongregesen do idia hadibadia, idia heduru totona. Mai eda lalona ibounai ida ita gaukara amo, bona kongregesen edia gaukara hebou karana amo, unai gaukara do ita haorea.
4 Reana oi ese inai gaukara oi moalelaia bada badina momo ese idia karaia dainai, pablisa matamata bona maragidia ese danu. Ita ura unai moale ena mamina do ia noho, unai amo ibounai edia lalona do ia hagoadaia bena idia kamonai namonamo taudia do idia lou henia. Vanegai, ita idia hamaoroa ruma-ta-ruma-ta rekodi ita torea namonamo, bona kamonai toana idia hahedinaraia taudia edia ladana ita torea. May ena dokona be nega namona lou henia do ita karaia, gabeai stadi hamatamaia totona.
5 Ita giroa lou neganai dahaka do ita gwauraia? Reana inai bamona do oi hereva be namo: “Reana vanegai oi lau henia pepana oi laloatao; lau laloa oi duahia vadaeni bona ia herevalaia gaudia oi lalohadailaia. Ena hereva dainai iseda teritori lalonai momo ese idia kikilaia, badina taunimanima ibounai ese idia davaria hekwakwanai badadia ia herevalaia.” Rau iharuana dekenai do ia laloa herevadia haida oi gwauraia, bena oi henanadai: “Dahaka ita karaia be namo bena do ita diba gabeai do idia vara gaudia dainai ita hegaegae? Dahaka oi laloa?” Haere oi naria. Bema kamonai toana ia hahedinaraia, Basileia Sivarai ena rau 2-4 dekenai hereva badadia haida oi kikilaia, bena Baibel stadi oi herevalaia, bema lasi, magasin matamatadia henia toho.
6 Bema kongregesen ma ta ena teritori dekenai umui gaukara, namona be kamonai taudia edia ladana be unai kongregesen ena pablisa dekenai umui henia, bena do idia lou henidia diba. Unai hegeregerena, bema oi dekenai do oi vadivadi henidia lou taudia edia ladana idia henia, oi lou henidia haraga be namo.
7 Inai Basileia Sivarai hariharilaia gaukarana badana ese moale bada ia havaraia bona ita ia hagoadaia Basileia harorolaia gaukarana do ita habadaia totona. Ita gwau diba anina bada herea do ia havaraia, bona gabu idauidau dekenai Iehova ena ladana hereadaena bona ena ura do ia hahedinaraia badabada. (Isa. 12:4, 5) Bema ita gaukara goadagoada, iseda moale do ia bada herea.—Sal. 126:3.