Idia Moale Tama Sina!

¹ Bema oi be mero o kekeni ta, bona Keristani ruma bese lalonai oi noho, dala idauna ta ai oiemu tama sina oi hamoalea diba. Kara maoromaoro dalana oi tahua neganai, “oiemu tamana bona sinana do oi hamoalea.” (Aon. 23:​22-25) Emu tamana bona sinana idia ura oiemu mauri ia namo herea. Hereva momokani oi abia dae vaitani bona emu mauri Iehova dekenai oi gwauhamatalaia neganai, edia moale be bada herea.

² Emu tama sina be hereva momokani idia badinaia taudia dainai, oi moale diba. Oiemu vara dinana ema bona hari, oi idia ubua, dabua bona ruma idia henia, bona oi gorere neganai oi idia naria. Unai ia hereaia gauna be, Iehova bona ena kara maoromaoro oi dekenai idia hadibaia. Unai hadibaia karana dainai mauri hanaihanai oi abia diba. (Ef. 6:​1-4) Edena bamona oi hahedinaraia unai hadibaia karana oi laloa bada?

³ Hereva Momokani Oi Abia Dae Vaitani: Oiemu tama sina idia ura edia hadibaia karana ese oi ia durua hereva momokani oi abia dae, lauma dalanai oi tubu, bona Iehova ena orea oi badinaia totona. Oi tanikiu henidia dalana ta be famili stadi oi laloa bada; oi idia doria lasi to emu ura oi hahedinaraia oi haere henia haraga. Oi hahedinaraia oi ura oi lao hebou, sibona oi hegaegae bena ruma bese be nega korikori ai idia ginidae diba. Hebou negana lalonai, emu tama sina kahirakahira ai oi helai, bona umui stadilaia bukana oi badinaia namonamo. Hebou ena kahana ta oi karaia, oi haere. Namona be oi hahedinaraia oi be Haroro Sikuli ena stiuden namona ta, kahana ta idia henia neganai oi abia dae bona mai emu ura ida oi karaia. Kingdom Hall lalonai, bema oi diba gaukara ta oi karaia diba, oi volantia. Unai bamona gaukara ese oiemu lalona do ia hagoadaia lauma gaudia do oi laloa guna totona.

⁴ Tahua Gaudia Oi Abia Hidi: Mai ena anina haroro gaukarana oi karaia, bona oi hahedinaraia oi ura pablisa ai oi lao. Pura ta ta ena Baibel duahiduahi oi karaia noho, eiava namona be Baibel ibounai oi duahia. Oiemu lalona oi hadaia Iehova ena taravatu do oi badinaia bona emu mauri do oi gwauhamatalaia bona bapatiso do oi abia. Emu tama sina ese oi idia durua diba, palani oi karaia namonamo, gabeai oiemu hesiai gaukara Iehova dekenai idia durua sikuli kosi sibodia do oi tahua. Ladana namona oi tahua, bena tadikaka ese oi do idia abia hidi painia gaukara eiava Betele gaukara totona. (Kara 16:​1, 2) Oi ura karaia gaudia oi karaia neganai, ‘gau namodia edia toana do oi diba bona emu kara ibounai be do idia namo momokani.’​—Fil. 1:​10, 11.

⁵ Oi matamata negana be diba abia, gau momo manadalaia, bona ma haida kara henia aonegana abia negana. Hari, lo taudia edia maduna metaudia oi do abia lasi, bona emu mauri oi moalelaia. Solomona ia gwau: “Uhau tauna e, oiemu eregabe dinadia lalonai do oi moale. Oiemu eregabe dinadia lalonai oiemu kudouna ese oi do ia hamoalea.” (Had. 11:9) Bema hari, oi matamata neganai, oiemu lalona oi hadaia Iehova do oi hesiai henia, do idia noho ela bona hanaihanai hahenamodia do oi abia.​—1 Siv. 28:9.

⁶ Bema “kara maoromaoro” oi tahua bona “uhau edia lebulebu karadia” oi rakatania, oiemu tama sina do idia lalo-metau lasi bona do idia lalohisihisi lasi. (2 Tim. 2:22) Oiemu kara ese emu kudou do ia hamoalea. (Aon. 12:25) To mai anina bada gauna be inai: Oiemu Havaraia Tauna, Iehova Dirava, do oi hamoalea.​—Aon. 27:11.