Kongregesen Ena Heduru Ita Abia be Namo
1 Kora ena natuna memerodia be nega ta ai Iehova ena kongregesen be inai bamona idia gwauraia: ‘Dina tamona sibona Dubu Helaga lalonai ai noho, unai dina ese, dina 1000 idau gabu dekenai ia hereaia.’ (Sal. 84:10) Idia dekenai, tanobada ese unai bamona moale ia henia lasi. Bema unai bamona mamina oi abia, namona be kongregesen be mai anina bada gauna emu mauri lalonai oi halaoa.
2 Ena hamatamaia negana amo, Keristani kongregesen ese ia hahedinaraia Iehova ena hanamoa ia abia. (Kara 16:4, 5) Namo lasi ita laloa kongregesen be anina bada lasi gauna, eiava ita laloa ia be ita ia haboua gabuna sibona. Gabu idauidau ai, Iehova ena Witness taudia dekenai kongregesen be hahegoada herevadia bona goada abia gabuna. Ia lalonai ita hebou mai eda lalo-tamona ida, unai amo Iehova ese ita do ia hadibaia bona hegaegaelaia, Basileia ena gaukara do ita karaia totona.—Isa. 2:2.
3 Keristani kongregesen be ita dekenai hereva momokani ia hadibaia dalana badana. (1 Tim. 3:15) Namona be Iesu ena murinai idia raka taudia “ibounai be do idia tamona”—Iehova ida idia lalo-tamona, Iesu ida, bona edia bamodia ida danu. (Ioa. 17:20, 21; ma Isaia 54:13 itaia danu.) Herevana edena tanobada ena kahanai do ita lao, unuseniai iseda tadikaka be Baibel ena hadibaia herevadia bona ena taravatudia be edia mauri lalonai idia badinaia.
4 Ita be diba ita abia bona ita hegeregere taunimanima be hahediba taudia ai ita halaoa gaukarana do ita hagugurua. Hua ta ta ai, Gima Kohorona, Noga!, bona Iseda Basileia Gaukara edia heduru herevadia ese ita idia durua, Baibel siridia amo kiki hereva ita hamatamataia totona. Hebouhebou be idia karaia, ita idia hadibaia kamonai taudia davaria bena edia kamonai urana habadaia totona. Ita itaia tanobada hegegemadai ai orea ia bada ia lao; unai ese ia hamomokania inai gaukara lalonai guba amo ita idia durua noho.—Mat. 28:18-20.
5 Kongregesen amo, dina ta ta edia hagoadaia herevadia ese ita idia durua, ‘lalokau dekenai amo kara namodia do ita karaia’ totona. (Heb. 10:24, 25) Ita idia hagoadaia, hahetoho do ita haheaukalaia mai iseda abidadama danu totona. Lalokau ai ita idia naria taudia ese ita idia durua, lalo-metau bona laloa momo gaudia ita hanaia totona. (Had. 4:9-12) Bema dala kererena ai ita raka, ita dekenai sisiba ia henia. Edena orea ma ta tanobada dekenai ese ena orea taudia inai bamona ia naridia mai ena lalokau ida?—1 Tes. 5:14.
6 Iehova ena ura be iena orea kahirakahira do ita noho, iseda lalo-tamona karana ita naria totona. (Ioa.10:16) Hesiai tauna mai ena kamonai oreana ida ita hebamo noho totona, kongregesen ese ita ia durua dalana ta be, sekit bona distrik naria taudia ia siaia ita ia hagoadaia totona. Lalokau daladia badinaia karana ese ita ia hatamonaia momokani, bena unai ese ita ia durua lauma dalanai do ita gini goada noho totona.
7 Kongregesen be mai anina bada iseda maurina lauma dekenai. Bema ia be lasi, Iehova ena hesiai ita lao henia diba lasi. Vadaeni namona be ita be Iehova ese ia henia oreana kahirakahira dekenai ita noho. Namona be orea ena palani hegeregeredia ita gaukara, bona ia amo ita abia sisibana ita badinaia mai eda lalona ibounai danu. Inai dala tamona sibona amo ita hahedinaraia diba, kongregesen be ita laloa bada.—Sal. 27:4.