Adorahi Haroro Gaukara Oi Tohoa Vadaeni, A?
1 Iseda gaukara be anina namona ia havaraia neganai, ita ibounai ita moale. To idau, anina namona ita itaia lasi neganai, unai gaukara ita hesikulaia bona ita ia hamoalea lasi. Mai anina bada gaukarana ese ita ia hamoalea, bona ia be hahenamo ta. (Hadibaia Tauna 3:10-13 itaia.) Unai be momokani iseda haroro gaukara dekenai. Ita diba ruma-ta-ruma-ta gaukara ita karaia bona taunimanima ida Baibel ita kikilaia murinai, iseda ruma dekenai ita giroa neganai lauma dalanai ita goada lou. Iseda hemami be ita be mai anina bada gaukarana ita karaia.
2 Gabu haida ai dina lalonai, hora haida lalodiai taunimanima be edia ruma dekenai ita davaria lasi. Ripoti haida idia gwau gabu haida dekenai, bema daba kahana ita vadivadi henia 50 pesen mai kahana be ruma dekenai idia noho lasi. Kongregesen momo ese unai hekwakwanai idia hanaia badina adorahi haroro gaukara idia karaia, bona unai ese namo ia havaraia. Pablisa taudia idia gwau adorahi kahana ai idia haroro neganai, taunimanima momo be edia ruma dekenai, bona, nega momo, idia moale Basileia ena sivarai idia kamonai totona. Adorahi haroro gaukara be emu teritori lalonai oi tohoa vadaeni, a?—Mareko 1:32-34 itaia.
3 Elda Taudia ese Adorahi Haroro Gaukara Idia Hegaegaelaia: Gabu haida dekenai adorahi eiava dina ia do diho lasi negadia idia haroro totona idia hebou neganai, tadikaka momo idia lao. Haroro negana oi atoa gwauraia neganai, reana edia sikuli be adorahi ai ia doko pablisa matamata taudia bona adorahi kahanai moni gaukara idia haorea taudia umui laloa diba. Saturday bona Sunday ai idia haroro diba lasi pablisa haida idia davaria wiki lalonai adorahi haroro gaukara dainai, haroro gaukara do idia karaia hanaihanai diba.
4 Adorahi haroro gaukara oi karaia neganai gau idauidau oi karaia diba. Ruma ta ruma ta ai magasin oi henia diba eiava hua ena henia gauna oi gaukaralaia. Adorahi be nega namona dina lalonai o Saturday o Sunday ai idia noho lasi taudia davaria totona. Reana dala dekenai magasin hariharilaia gabuna namona ia noho, bona taunimanima be edia gaukara gabudia amo idia giroa mai neganai oi haroro henia. Tadikaka momo idia davaria adorahi be nega namona kamonai taudia lou henia totona.
5 Oi Naria Namonamo Bona Oi Aonega: Gabu momo dekenai, dina ia diho gwauraia eiava ia dibura vadaeni neganai, loaloa be namo lasi. Namona be ta ese oi ia bamona eiava umui haida umui lao hebou, bona diari ia noho dala badana dekenai umui raka bona gabu namona ai idia noho ruma o apartment sibodia dekenai umui lao. Iduara dekenai oi pidipidi neganai, namona be idia itaia gabuna dekenai oi gini bona oi hahedinaraia goevagoeva oi be daika. Mai aonega ida oi kara. Bema oi itaia unai be nega namona lasi, hegeregere famili ena aniani negana ai oi ginidae, mai hemataurai ida oi gwau ma nega ta do oi giroa. Namona be adorahi sibona ai oi haroro, namo lasi hanuaboi ai oi lao.
6 ‘Dina bona hanuaboi ita ese Dirava ena hesiai gaukara ita karaia noho’ dainai, Iehova ese iseda hekwarahi do ia hanamoa.—Apok. 7:15.