Emu Sediual Oi Haidaua Diba, A?
1 Ita be Keristani taudia dainai, “taunimanima haoda henia” gaukara ena boiboi herevana ita abia dae. (Mat. 4:19) Haoda tauna bamona, taunimanima haoda henia gaukara lalonai anina namona ita davaria totona, namona be nega ita atoa taunimanima idia noho gabudia dekenai ita haroro. Adorahi negadiai, taunimanima momo be edia ruma dekenai idia noho. Unai nega ai idia bisi lasi dainai, vadivadi taudia do idia abia dae. Emu sediual oi haidaua diba unai negadiai oi haroro totona, a?—1 Kor. 9:23.
2 Adorahi Haroro: Bema palani ita karaia adorahi ai ita haroro totona, reana taunimanima momo dekenai sivarai namona ita herevalaia diba. Matamata taudia be sikuli murinai bona gaukara taudia be edia gaukara murinai idia haroro diba. Bona buka stadi grup haida be palani idia karaia hora tamona lalonai idia haroro totona, bena gabeai edia stadi idia karaia. Reana dala idia karaia haroro hebouna idia karaia totona. Gabu ia dibura haraga bona haroro negana be bada lasi dainai, haroro hebou kwadogina sibona idia karaia be namo.
3 Adorahi ai, ruma-ta-ruma-ta ai haroro gaukara ita karaia neganai, reana nega momo edia ruma dekenai idia noho lasi taudia ita davaria. Teritori momo ai, dala haroro be adorahi ai ita karaia diba. Momo idia laloa adorahi be nega namona lou henia bona Baibel stadi idia karaia totona.
4 Laloa Namonamo be Gau Badana: Adorahi ai haroro gaukara ita karaia neganai, gau badana be ita laloa namonamo. Gaukara murinai, bema haroro heboudia ita karaia, namona be unai hebou idia kwadogi bona teritori ia noho gabunai ita karaia. Unai amo pablisa taudia ese gabu ia do dibura lasi lalonai, haroro gaukara idia karaia diba. Bema ita itaia gabu ia dibura, namona be iseda gaukara ita hadokoa. Oi lao ena badina ruma tauna dekenai oi gwauraia. Bema nega kerere dekenai oi ginidae, hegeregere ruma bese taudia idia aniani neganai, namona be oi hadibaia nega ma ta ai do oi hereva henidia. Hanaihanai ruma taudia oi lalodia be namo.—Mat. 7:12.
5 Dika idia vara diba dainai, gau badana be ita naria namonamo. Bema haroro gaukara ita haorea bona gabu ia dibura lalonai teritori ita rakatania, aonega karana be ma ta ida ita raka eiava grup danu ita raka hebou. Namona be dala badana ai, taunimanima momo idia raka gabuna dekenai oi raka, oi sibona oi raka lasi. Gabu namodia sibona dekenai oi haroro. Adorahi ai gabu ia dibura ia lao neganai, bema oi diba gabu ta be ia dika, namona be unai gabu dekenai oi lao lasi.—Aon. 22:3.
6 Adorahi ai ita haroro neganai, unai be nega namona heduru bona regula painia taudia ida ita gaukara hebou totona. (Roma 1:12) Emu sediual oi haidaua diba adorahi ai oi haroro totona, a?
[Study Questions]
1. Dahaka dainai, iseda sediual ita haidaua diba haroro gaukara ita karaia totona?
2. Edena dala haida amo taunimanima momo dekenai sivarai namona ita gwauraia diba?
3. Edena dala idauidau ai emu teritori dekenai adorahi ai oi haroro diba?
4. Adorahi ai ita haroro neganai, dahaka dainai ita laloa namonamo bona ma haida laloa karana be gau badana?
5. Ita haroro neganai, dahaka ita karaia diba dika ita davaria lasi totona?
6. Adorahi ai ita haroro ena namo be dahaka?