“Sivarai Namona” Ita Harorolaia
1 Baibel ese “nega ena dokona” ia herevalaia hegeregerena, hari inai negai taunimanima momo ese “Dirava badinaia kara” ena toana sibona idia hahedinaraia. (2 Tim. 3:1, 5) Unai ena badina be tomadiho gunalaia taudia ese lauma dalanai edia orea taudia idia naria lasi. Kerisendom ena haroro taudia ese Baibel idia badinaia lasi. Idia ese tanobada bona tomadiho ena aonega taudia edia anina lasi hadibaia herevadia idia badinaia eiava mauri bona politikol ena hekwakwanai idia herevalaia to Dirava ena Hereva idia harorolaia lasi. Tomadiho gunalaia taudia momo ese Baibel idia abidadama henia lasi. Idia laloa ia be anina lasi hari, bona unai dainai idia ese mai goada ida evolusen lalohadaina idia abia dae, Baibel ia hadibaia Havaraia Tauna Badana idia abia dae lasi. Haroro taudia momo ese Dirava ena ladana idia gaukaralaia lasi, bona idia hahanaia Baibel matamatadia amo unai ladana idia kokia karana idia gwauraia dika lasi.
2 Iesu ena negai tomadiho gunalaia taudia hegeregerena, hari haroro taudia edia haroro be anina lasi. (Mat. 15:8, 9) Ia be peroveta tauna Amosa ena hereva hegeregerena. “Taunimanima be do idia hitolo, to paraoa totona lasi. Idia be do idia ranu mase, to ranu totona lasi. Do idia hitolo bona ranu mase gauna be Lohiabada ena hereva totona.” (Am. 8:11) Taunimanima ese Dirava ena Hereva ena lauma aniani idia abia be gau badana.
3 Lauma Dalanai Idia Dabu Taudia Durua Dalana: Paulo be Timoteo ia hagoadaia “Buka Helagadia dekenai oi manada momokani. Inai Buka Helagadia ese oi dekenai aonega idia henia noho diba, ela bona hamauria do oi davaria,” bona mai momokani ida ia hamaoroa ma haida dekenai “Sivarai Namona do oi harorolaia goadagoada.” (2 Tim. 3:14, 15; 4:2) Ita be Iehova ena Witness taudia dainai, ita haroro neganai Baibel ena hadibaia herevadia ita badinaia be gau badana, unai amo iseda raka dalana ia hahedinaraia Tauna, Iesu, ena kara ita tohotohoa, ia gwau: “Lauegu hadibaia herevadia be lauegu lasi, to lau ia siaia Diravana ena.” (Ioa. 7:16) Iseda hadibaia gaukarana lalonai, Dirava ena Hereva ita gaukaralaia badina ita diba ia lalonai Dirava ena aonega ia noho, bona ita ura taunimanima ese ita gwauraia herevana ena badina idia diba.—1 Kor. 2:4-7.
4 Iehova dekenai diba idia abia bona ia idia abidadama henia totona, namona be taunimanima ese Baibel ena hereva momokani idia kamonai guna. Mai aonega ida Paulo ia gwau: “Sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai, edena bamona do idia kamonai?” (Roma 10:14) Dirava ena Hereva ita harorolaia neganai, ma haida ita durua diba maorona amo abidadama do idia abia. Unai bamona diba be hegeregere taunimanima edia mauri ia haidaua bona ia hanamoa. England ena toretore tauna Charles Dickens ese Baibel ia herevalaia, ia gwau: “Ia be tanobada ena buka iboudiai, guna idia torea bukadia eiava do idia torea bukadia, ia hereaia badina ia ese hahediba hereadaena ia henia kara maoromaoro bona abidadama ia ura henia tauna hakaua totona.”
5 Hereva momokani totona idia hitolo taudia be do idia itaia Dirava ena Hereva ese hereva momokani ia hahedinaraia. Lagani 1913 ai, Frederick W. Franz be koledi stiuden matamatana ta neganai, buklet ta ladana Where Are the Dead? idia henia. Mai ena ura bada ida Baibel ena haere unai henanadai dekenai ia duahia murinai, ia gwau: “Inai be hereva momokanina.” Hereva momokani idia tahua taudia milioni momo be unai bamona idia laloa. Mai eda ura bona goada ida Hereva do ita harorolaia bena do ita moale badina ma haida do idia gwau: “Inai be hereva momokanina.”