Dahaka Dainai Ita Giroa Loulou?
1 Dina ta haroro gaukara totona oi hegaegae neganai, sibona dekenai unai bamona henanadai oi henia, a? Gabu haida dekenai teritori ita karaia loulou dainai, taunimanima idia diba ita be daika bona kara haraga idia gwau idia ura lasi kamonai. Reana haida sibona ese dala namona ai iseda hereva idia kamonai. To, badina namodia idia noho dainai ita giroa loulou.
2 Gau ginigunana be, ita idia hagania Basileia ena sivarai namona ita harorolaia noho ela bona dokona do ia ginidae. (Mat. 24:14; 28:19, 20) Peroveta tauna Isaia ia henanadai ena haroro gaukara ena daudau be edena bamona. Ia abia haere be Isaia 6:11 dekenai ia hedinarai. Ita daradara lasi—ia idia hamaoroa taunimanima dekenai do ia giroa loulou bona Dirava ena sivarai do ia gwauraia noho. Hari iseda negai danu be hegeregere, ena be taunimanima idia ura lasi kamonai, to Iehova ia ura ita ese iseda teritori lalonai idia noho taudia dekenai ita giroa loulou. (Esek. 3:10, 11) Unai be ita atoa mai anina bada maduna.—1 Kor. 9:17.
3 Taunimanima dekenai ita giroa loulou ena badina ma ta be unai ese do ia hahedinaraia Dirava badinaia karana ita laloa bada. (1 Ioa. 5:3) Ma danu, nega vaira taunimanima dekenai do ia vara gauna ita laloa neganai, mai lalokau ida iseda dekena taudia hadibaia karana do ita karaia lasi be edena bamona? (2 Tim. 4:2; Iam. 2:8) Mai iseda abidadama ida iseda gaukara ita karaia loulou dainai, dala ia kehoa Dirava ena hahemauri sivaraina idia kamonaia totona, bona do idia gwau diba lasi idia ita hadibaia lasi.—Esek. 5:13.
4 Danu, ita diba lasi edena negai ta be ena lalona do ia haidaua. Edia mauri ia idau diba, eiava dika ta ia vara ruma bese lalonai, eiava tanobada ena hekwakwanai dainai dina vaira do idia laloa bada matamaia. To danu sedira edia iduara dekenai ita gwauraia herevana ese edia lalona ia veria diba. (Had. 9:11; 1 Kor. 7:31) Danu, taunimanima be gabu ta amo idia lao ma gabu ta dekenai idia noho totona. Iseda teritori dekenai taunimanima matamatadia ita davaria diba bona sivarai namona idia ura henia—sedira idia bada vadaeni matamata taudia be sibodia idia noho bona edia mauri ena badina idia laloa bada noho.
5 Do ita giroa loulou, a? Oibe! Baibel ese heduru bada ia henia taunimanima dekenai ita giroa loulou totona. Dokonai, haroro gaukara ia ore neganai, Iehova ese ita do ia hanamoa badina haroro totona ita hekwakrahi noho, bona Basileia ena sivarai namona idia kamonaia taudia danu do ia hanamodia.—1 Tim. 4:16.