Dirava amo Ia Mai Dibana ese Henanadai Momo Ia Haerelaia
1 Diba maorona oi do abia lasi neganai, oi be mai emu henanadai momo mauri dekenai, to haere oi davaria lasi. Baibel amo haere oi abia negana ena moale mani oi laloa! Hari oi hegeregere ma haida oi durua unai haere idia davaria totona. (2 Timoteo 2:2 itaia.) Dirava ese mauri dekenai ita ia hakaua lao dibana be idia ida oi kikilaia diba. (Ioa. 17:3) To edena bamona ta oi durua diba, diba maorona ena namo ia laloa bada totona? Namona be guna oi daradaralaia gaudia, hereva momokani ese ia haerelaia henanadai, oi laloa. Hereva momokani idia tahua taudia be dahaka idia ura idia diba? Unai bamona henanadai oi lalodia, unai ese oi do ia durua Diba ese Mauri Dekenai Ita Ia Hakaua Lao bukana oi hariharilaia totona. Reana inai hereva haida ese oi do idia durua June ena haroro gaukara totona oi hegaegae neganai.
2 Taunimanima momo idia daradara badina be dahaka hisihisi momo idia vara tanobada dekenai, unai dainai reana inai hamatamaia herevana be namo:
◼ “Dika badadia idia vara neganai, eiava raskol bona dagedage karadia idia bada idia lao dainai, taunimanima momo idia henanadai dahaka dainai unai gau dikadia idia vara. Emu haere be dahaka?” Haere oi naria bona iena hereva oi kamonaia. Diba bukana ena karoa 8 dekenai oi kehoa, bona paragraf 2 oi herevalaia. Oi hamaoroa inai buka be kara dikadia idia vara ena badina, Baibel ese ia hahedinaraia badina unai, ia herevalaia; bena oi gwau: “Bema oi ura inai buka oi abia, inai kopi oi abia diba, ena davana be K1.50 sibona.”
3 “Diba” bukana ia abia tauna oi lou henia neganai, reana oi gwau diba:
◼ “Lau ura oiemu lalohadai, dahaka dainai inai tanobada be hisihisi amo ia honu, lau diba. Baibel ena haere inai buka lalonai oi abia dae, a?” Haere naria. Diba bukana ena rau 77, paragraf 17 oi duahia, bona ruma tauna ena Baibel oi gaukaralaia Roma 9:14 duahia totona. Bena oi gwau: “Sivarai namona be Dirava ese ita dekenai hisihisi ia havaraia kava lasi. Ita dekenai ia gwauhamata mauri hanaihanai mai maino bona mai moalena do ia henia. Inai buka ena karoa ginigunana ena hereva kwarana be ‘Nega Vairai Moale Do Oi Davaria Diba!’ Lau ura oi do lau hadibaia edena bamona unai ia vara momokani diba oi bona emui lalokau taudia dekenai.” Karoa 1 oi kehoa, bona stadi karaia dalana oi hahedinaraia. Karoa ena hereva oi gwauraia ena ura bona diba hegeregerena.
4 Reana oi ura “Herevalaia” bukana, rau 12 ena hereva kwarana Buruka/Mase henunai ia noho herevana oi gaukaralaia:
◼ “Reana nega ta inai bamona oi henanadai, ‘Ta ia mase neganai, ia boio momokanai, a? Eiava mase murinai ia do noho?’ [Haere naria.] Baibel ese iseda henanadai iboudiai mase dekenai ia haerelaia goevagoeva. [Hadibaia Tauna 9:5, 10 duahia.] Danu ia hahedinaraia abidadama taudia be mai edia helaro korikorina. [Diba bukana ena rau 84, paragraf 13 oi kehoa; Iesu ena hereva Ioane 11:25 dekenai oi duahia bona ena anina oi gwauraia.] Inai karoa ibounai ese inai henanadai ia haerelaia. Dahaka ia vara iseda lalokau mase taudia dekenai? Bema oi ura inai buka oi duahia, inai kopi lau rakatania diba, ena davana be K1.50 sibona.”
5 Guna oi davaria tauna oi lou henia neganai, oi gwau diba:
◼ “Guna ita be ta ia mase neganai, ia dekenai dahaka ia vara ita kikilaia. Taunimanima momo idia abia dae ta ia mase neganai ia lao guba eiava hel dekenai. To oi laloa reana nega ta do ia mai bena mase taudia do idia mauri lou bona inai tanobada dekenai do idia noho, a? [Haere naria.] Baibel ese ia hahedinaraia, mase amo do idia toreisi lou taudia be kara maoromaoro taudia ida tanobada dekenai do idia noho. [Salamo 37:11, 29 duahia, bena Diba bukana ena rau 88, paragraf 20 oi herevalaia.] Unai helaro ese mase dainai idia gari taunimanima milioni momo edia lalona ia hagoadaia. Inai buka ese oi do ia durua unai oi lalo-pararalaia totona. Ia namo bema oi dekenai lau hahedinaraia?”
6 Bema oi ura auka lasi kiki herevana oi gaukaralaia, inai oi tohoa diba:
◼ “Lau ura laulau ta Diba ese Mauri Dekenai Ita Ia Hakaua Lao bukana amo lau hahedinaraia oi dekenai. Inai laulau be mai hairaina, ani?” Buka ena rau 4-5 oi kehoa, ruma tauna ese edia laulau ia itaia diba totona. Ena haere oi naria. Bena rau 5 dekenai idia noho hereva oi duahia. Emu hereva oi hadokoa inai bamona: “Inai buka oi abia diba oi sibona oi duahia totona, ena davana be K1.50 sibona.” Nega namona ta umui abia hidi lou henia karaia totona.
7 Dirava amo ia mai dibana ese mauri ena henanadai badadia ia haerelaia. Oi hegaegae namonamo, bena hereva momokani idia tahua taudia dekenai hahemauri sivaraina oi gwauraia hedinarai neganai, Iehova ese emu gaukara do ia hanamoa.