Mauri Dekenai Ita Ia Hakaua Lao Dibana Ita Hariharilaia
1 Iehova be “taunimanima ibounai edia hadibaia Tauna.” (Sal. 94:10) Ita ia gaukaralaia, ia idia tomadiho henia dalana maorona idia diba lasi taudia dekenai, hamauria dibana ita hariharilaia totona. Diba ese Mauri Dekenai Ita Ia Hakaua Lao bukana be heduru namona, kudou namo taudia do ia durua iena Hereva, Baibel amo diba maorona Dirava dekenai do idia abia totona. (1 Tim. 2:3, 4) Diba bukana ese auka lasi bona maoro dalanai hereva momokani ia hahedinaraia dainai, taunimanima ia durua idia ese Iehova ia ura hadibaia gaudia idia abia dae. Inai hua lalonai ita ura taunimanima ida ita herevahereva dalana amo edia lalona ita veria unai buka do idia ura duahia totona. Haheitalai haida be inai. Inai hereva ibounai oi laloatao toho lasi, to hereva badadia be oiemu hereva bona herevahereva dalana amo oi gwauraia toho.
2 Taunimanima momo edia lalokau taudia idia mase dainai, toreisi lou helarona oi herevalaia totona, inai bamona hereva oi hamatamaia diba:
◼ “Ita momo be iseda lalokau tauna ta be mase dainai ita haboioa. Nega haida oi laloa do oi itaia lou, eiava? [Haere naria.] Mase be matamanai Dirava ena ura hegeregerena lasi. Iesu ese ia hamomokania iseda mase lalokau taudia do idia mauri lou diba. [Ioane 11:11, 25, 44 duahia.] Ena be lagani handred momo gunanai unai ia vara, to ia hahedinaraia Dirava ese ita totona dahaka do ia karaia ia gwauhamatalaia. [Diba bukana ena rau 85 ena laulau dekenai oi kehoa bona ena hereva oi duahia. Unai murinai rau 86 ena laulau oi hahedinaraia bona oi herevalaia.] Bema oi ura unai toreisi lou ena helaro namona dekenai ma hereva haida do oi duahia, inai buka do lau rakatania diba, ena davana be K1.50 sibona.”
3 Nega ginigunana ai toreisi lou oi herevalaia murinai, ia oi lou-henia neganai, oiemu hereva be inai bamona oi matamaia diba:
◼ “Reana oi laloatao lau gwau mase be matamanai Dirava ena ura hegeregerena lasi. Bema unai be momokani, dahaka dainai ita buruka ita lao bona ita mase? Matabudi haida be lagani 100 ma haida idia mauri, bona au haida be lagani tausen momo idia mauri. Dahaka dainai taunimanima be lagani 70 o 80 sibona idia mauri? [Haere naria.] Ita mase badina tau bona hahine ginigunadia ese Dirava ena taravatu idia utua dainai.” Roma 5:12 duahia. Diba bukana ena rau 53 oi kehoa bona karoa ena sinado oi duahia. Paragraf ginigunadia toi oi herevalaia, bona idia torea henanadai edia haere oi hahedinaraia. Gabeai oi giroa bona karoa ena orena do umui kikilaia totona nega oi hegaegaelaia. Oi hagoadaia oi do giroa lasi neganai, unai buka do ia duahia ore.
4 Bema tomadiho ia laloa bada tauna ida oi herevahereva, reana inai bamona oi hereva diba:
◼ “Hari inai negai tomadiho daladia momo idia noho. Edia hahediba herevadia be idauidau. Haida idia gwau tomadiho iboudiai be namo bona edena ita abia hidi be anina bada lasi. Dahaka oi laloa? [Haere naria.] Iesu ese tomadiho maorona ia hadibaia bona ia hahedinaraia Dirava ese tomadiho idaudia ia abia dae lasi. [Mataio 7:21-23 oi duahia.] Bema ita ura Dirava ita hamoalea, iena ura hegeregerena ita tomadiho henia be namo.” Diba bukana oi kehoa karoa 5 dekenai, ena sinado oi duahia, bona hereva kwarana maragidia haida oi hahedinaraia. Oi hadibaia unai diba ese do ia durua Dirava hamoalea dalana ia diba totona. Buka oi hariharilaia, davana be K1.50. Buka do ia duahia totona ruma tauna oi hagoadaia neganai, unai buka be tanobada hegegemadai gado idauidau 82 bona ma haida lalonai idia halasia noho be oi gwauraia hedinarai.
5 Oi lou-henia neganai dubu orea be momo dainai idia daradara taudia be reana inai henanadai ena haere do idia moalelaia:
◼ “Hari dubu orea momo idia noho dainai, edena bamona ita diba edena be maoro? Dahaka gaudia amo oi tahua? [Haere naria.] Iesu ese ita ia hadibaia edena dala amo iena hahediba taudia korikoridia ita diba.” Ioane 13:35 duahia. Diba bukana ena karoa 5 ena paragraf 18 bona 19 oi herevalaia. Oi hahedinaraia unai Baibel ena hakaua herevadia bona dubu oreadia edia hereva bona kara ita hahegeregerea neganai tomadiho momokanina ita davaria diba. Oi hahedinaraia tanobada hegegemadai taunimanima idia diba Iehova ena Witness taudia ese lalokau korikorina bona kara goevadia idia hahedinaraia. Oi hadibaia Diba bukana amo Baibel ia stadilaia karana ese ia do ia durua Dirava ese ia abia dae tomadiho dalana do ia diba totona.
6 Bema tamana o sinana oi davaria, reana inai hereva be namo:
◼ “Dina ta ta ai, kara goevadia idia diba lasi momokani matamata taudia edia gwau-edeede karadia edia ripoti ita kamonai. Taunimanima haida idia laloa ia be sikuli edia kerere badina idia ese natudia idia hadibaia lasi dahaka be maoro bona dahaka be dika. Dahaka oi laloa, daidia ese natudia idia hadibaia be namo? [Haere naria.] Mani oi kamonai Baibel be dahaka ia gwau unai dekenai. [Efeso 6:4 duahia.] Unai siri ia hahedinaraia kara goevadia be natudia dekenai idia hadibaia be tama sina edia maduna.” Diba bukana ena rau 146 oi kehoa, paragraf 16 oi duahia, bona rau 147 ena laulau oi herevalaia. Oi hamaoroa unai buka idia karaia famili ibounai idia stadilaia hebou totona. Rau 146 ena paragraf 17 bona 18 amo famili ida ita stadi dalana oi hahedinaraia. Buka oi hariharilaia, ena davana be K1.50.
7 Bema nega ginigunana ai, idia vara gaudia idia laloa momo tamana o sinana ida stadi oi hamatamaia, reana lou-henia neganai oi karaia lou diba, inai bamona oi hereva:
◼ “Inai tanobada ai iseda matamata taudia edia lalona veria gaudia momo idia noho. Unai dainai idia bada neganai Dirava gari henia taudia ai idia lao be auka. Reana oi laloatao vanegai ita herevahereva neganai, hakaua herevadia rua ita herevalaia. Ita be Dirava badinaia tama sina dainai, haheitalai namona ita hahedinaraia iseda natudia dekenai, bona nega ibounai iseda lalokau idia dekenai ita hahedinaraia be namo. Baibel ese tama sina be edia natudia dekenai idia henia gauna ma ta be ia gwauraia.” Aonega Herevadia 1:8 duahia. Diba bukana ena rau 148 oi kehoa bona paragraf 19-23 amo stadi oi karaia lou. Oi hamaoroa do oi giroa bona karoa 1 amo famili ibounai ida stadi do umui karaia. Bema ia abia dae buka oi hariharilaia, davana be K1.50.