‘Abidadama Ia Vara Kamonaia Gauna Amo’
1 “Dirava ese ia abia hidi, mauri hanaihanai abia totona taudia” ita davaria neganai, gau badana be ia kamonaia gaudia dekenai ena abidadama ita habadaia. (Kara 13:48; Roma 10:17) Unai ita karaia totona, namona be magasin o sabskripsen ita hariharilaia murinai ita lou henia neganai, iseda tahua gauna be Diba ese Mauri Dekenai Ita Ia Hakaua Lao bukana amo stadi ita hamatamaia. Reana oi gaukaralaia hereva haida be inai:
2 Bema April-June “Noga!” oi henia vadaeni, lou henia oi karaia neganai “Diba” bukana amo stadi hamatamaia dalana ta be inai:
◼ “Guna ita be tuari lasi tanobadana ita kikilaia, reana unai herevahereva oi laloatao. To unai bamona tanobadana be edena bamona, lalohadailaia be auka, ani? Laulau torea tauna ta ese inai bamona ia hahedinaraia. [Diba bukana ena rau 188-9 ai ia noho laulauna oi hahedinaraia.] Do ia namo herea bema unai bamona gabu mai ena hairai ita moalelaia diba, ani? [Lao rau 4-5 ai, bena ena laulau hahedinaraia bona maua lalonai ia noho hereva duahia.] Inai buka ena ladana be Iesu ena hereva Ioane 17:3 ai bamona. [Duahia.] Lau ura lau hahedinaraia edena bamona inai buka be emu Baibel ida oi gaukaralaia diba, hahemauri dibana abia totona. Ta oi abia diba, ena davana be K1.50 sibona.” Bema ruma tauna ia ura, karoa 1 dekenai stadi oi hamatamaia.
3 Bema guna ia bisi tauna oi lou henia, reana oi gwau:
◼ “Vanegai sibona, oi lau vadivadi henia bona Gima Kohorona bona Noga! lau rakatania. Unai magasin ese Baibel bona ena sisiba goevadia laloa bada karana idia habadaia. Lau laloa taunimanima ibounai ese Dirava ena Hereva idia lalo-pararalaia be gau badana dainai, lau giroa mai bona heduru gauna ta be oi dekenai lau ura lau hahedinaraia.” Diba bukana oi hariharilaia, bona ena anina rau 3 ai oi hahedinaraia. Oi nanadaia edena karoa ia ura henia, unai oi kehoa, bona stadi hamatamaia.
4 Bema “Mase Taudia Edia Lauma” buklet oi hariharilaia vadaeni, ruma tauna oi noia ena buklet ia abia totona, bena oi gwau:
◼ “Rau 30 bona 31 ai idia noho herevadia ese nega vaira ai tanobada dekenai edena bamona hahenamo do idia vara idia herevalaia.” Nega sisina lalonai oi herevalaia. Ruma tauna oi nanadaia dahaka ia laloa ia karaia be namo, unai bamona gaudia ma haida dibaia totona. Bena oi gwau: “Gau badana be ita diba dahaka dainai Dirava ena Basileia be mai anina bada gauna.” Diba bukana oi hariharilaia bona oi hahedinaraia edena dala ai Lauma buklet ena hereva ia habadaia. Giroa negana umui abia hidi bona unai neganai dahaka dainai Dirava ena gavamani sibona ese ita ia durua diba do umui kikilaia.
5 Iseda moale do ia bada herea bema taunimanima ma haida dekenai “abidadama ena iduara,” mauri hanaihanai dekenai idia ia hakaua lao iduarana, ita kehoa diba.—Kara 14:27; Ioa. 17:3.