Kara Namo amo Oi Haroro
1 Hari inai taravatu lasi tanobadana lalonai, memero kekeni momo be drag, matabodaga karadia, gwau-edeede karadia, bona dagedage karadia dekenai edia mauri idia hadikaia kava. To, Keristani kongregesen lalonai haheitalai namodia idia karaia kara namo memero kekeni ita itaia neganai, ita idia hagoadaia bona edia hairai be bada Iehova dekenai. Unai bamona kara namo be witness namona bona ma haida be hereva momokani dekenai ia veria diba.—1 Pet. 2:12.
2 Ekspiriens momo ese idia hahedinaraia Keristani memero kekeni edia kara namo idia itaia taudia ese idia hanamodia. Tisa ta ese klas ta ena stiuden taudia ibounai ia hamaoroa ena stiuden ta, Witness kekeni unai, ena Dirava Iehova, be Dirava momokanina. Unai bamona ia hereva badina nega ibounai unai kekeni ia kara mai ena hemataurai ida. Tisa ma ta ese Society ia tore henia, ia gwau: “Lau ura umui lau hanamoa, emui tomadiho oreana lalonai idia noho matamata taudia namodia dainai. . . . Emui matamata taudia be haheitalai namona. Taunimanima badadia idia matauraia, idia kara namo, bona dabua idia hahedokilaia mai hemataurai danu. Bona edia Baibel idia diba momokani! Unai be tomadiho karaia dalana momokanina!”
3 Sikuli tisa ma ta ese ena klas dekenai mauri lagani 7 Witness merona ta ena kara namona ia laloa bada. Unai mero ena manau bona moale karana ese ena lalona ia veria, bona unai kara namo dainai memero haida amo ia idau momokani. Unai tisa ia hoa bada, badina unai mero ese ena tomadiho ena hahediba herevadia ia laloa namonamo—ia abidadama henia gaudia dainai ia idau ia hemarailaia lasi. Tisa ia itaia ena lalona be idia hadibaia namonamo dainai ia be ‘maoro bona kerere edia toana ia diba.’ (Heb. 5:14) Gabeai, unai mero ena sinana ese tisa ia vadivadi henia, bona Baibel stadi idia hamatamaia. Gabeai danu, tisa ese bapatiso ia abia bona unai murinai regula painia gaukara ia karaia matamaia!
4 Mero ta be ena sikuli dekenai ia noho Witness kekenina ta ena kara namona ia itaia bona unai ese ena lalona ia veria. Iena kara be idau momokani—mai ena hemataurai bada, ia stadi momo, bona nega ibounai mai ena hemataurai ida dabua namona ia atoa; danu, kekeni haida bamona lasi, ia ese memero edia lalona ia veria kava lasi. Ia itaia diba unai kekeni be Baibel ena hakaua herevadia hegeregerena ia noho. Unai mero ese kekeni ia abidadama henia gaudia dainai henanadai haida ia henia ia dekenai bona ia dibaia gaudia dainai ia hoa bada. Baibel ia stadilaia matamaia, bena daudau lasi murinai bapatiso ia abia, bona gabeai painia gaukara ia karaia bona Betele dekenai ia gaukara.
5 Bema oi be Keristani mero o kekeni bona oi ura witness namona oi henia ma haida dekenai, namona be dala idauidau ibounai ai emu kara oi naria namonamo. Namo lasi inai taravatu lasi tanobadana ena kara, lalohadai, eiava mauri dalana oi abia dae matamaia. Namona be haheitalai namona oi hahedinaraia oiemu hereva, dabua, bona toana amo, namo lasi haroro gaukara bona kongregesen hebou idauidau dekenai sibona unai oi karaia, to sikuli dekenai oi noho neganai bona moale karadia oi karaia neganai danu. (1 Tim. 4:12) Do oi moale bada herea bema ta ese hereva momokani ia abia dae badina emu kara namodia amo ‘emu diari oi hahedinaraia.’—Mat. 5:16.