Memero Kekeni be Diari Bamona Do Idia Hedinarai
1 Iesu ese ena hahediba taudia ia hamaoroa: “Umui be tanobada taudia ibounai edia diari.” (Mat. 5:14, 16) Hahediba taudia be ororo latanai ia noho hanuana bamona, idia diaridiari, bona taunimanima ese idia itaia diba. Hari, Keristani memero kekeni momo be ‘diari bamona do idia hedinarai, hisiu ese tanobada idia hadiaria bamona.’—Fili. 2:15; Mal. 3:18.
2 Sikuli Dekenai: Edena dala ai sikuli dekenai oi haroro diba? Klas dekenai stiuden taudia be hereva haida, hegeregere drag, evolusen bona AIDS—bona ma haida—idia kikilaia neganai, Keristani matamata taudia haida be unai nega idia gaukaralaia idia haroro totona. Taihu ta be terorist karana ena sivarai ia torea, bona ia hahedinaraia Dirava ena Basileia be taunimanima edia helaro korikorina do ia mailaia. Tisa be unai sivarai namo hereana ia moalelaia, bona unai ese haroro dalana ia kehoa.
3 Diari bamona ita hedinarai dalana ma ta be, eda kara, dabua, bona toana namona amo. (1 Kor. 4:9; 1 Tim. 2:9) Bema stiuden bona tisa taudia idia itaia emu kara be ia idau, reana emu kara namona dainai idia haida be hereva momokani idia abia dae bona dala ia kehoa Baibel amo hereva momokani oi harorolaia totona. (1 Pet. 2:12; 3:1, 2) Dirava ia moalelaia karana ita hahedinaraia be auka, to Iehova be oi do ia hanamoa bada. (1 Pet. 3:16, 17; 4:14) Taunimanima ese sivarai namona idia ura henia totona, Baibel idia herevalaia bukadia be reana laga-ani negadia ai oi duahia eiava ma haida idia itaia diba gabudia ai oi rakatanidia.
4 Sikuli ai emu diari hahedinaraia karana be emu abidadama ia hagoadaia bona oi ia durua Iehova oi hesiai henia karana oi heagilaia totona. (Ier. 9:24) Bona unai kara be ita ia gimaia diba. Taihu ta ia gwau: “Lau abia dae gaudia lau gwauraia hedinarai ena namo ta be, stiuden taudia be lau idia doria lasi Baibel ia taravatua karana ta lau karaia totona.”
5 Haroro Habadaia: Memero kekeni ese edia diari idia hahedinaraia dalana ma ta be, edia haroro gaukara idia habadaia amo. Tadikaka ta be haisikuli ia haorea neganai, Basileia harorolaia taudia be momo lasi gabuna ta dekenai ia lao. Ia durua kongrigeisen maragina dekenai elda be tamona. Tadikaka be ena turana ia tore henia neganai, ia gwau: “Iniseniai lau moale bada herea. Haroro gaukara be lau ia hagoadaia bada! Ruma ta ta ai, ai be miniti 20 ai hereva diba, badina taunimanima idia ura ai dibaia gaudia idia kamonai.” Ma ia gwau: “Lau ura bada matamata taudia ibounai be lau karaia gauna idia karaia bona lau abia hemamina idia abia be namo. Iehova hesiai henia karana sibona be kara hereadaena.”
6 Tanobada ai umui memero kekeni be diari bamona umui hedinarai dainai ai moale! (1 Tes. 2:20) Mai kudouna, souli, lalona, bona goada ibounai ida Iehova umui hesiai henia dainai, hari umui haboioa gaudia do ‘umui habadaia nega 100 bamona’ bona ‘vaira neganai, mauri hanaihanai do oi abia.’—Mar. 10:29, 30; 12:30.
[Study Questions]
1. Keristani taudia idia idau dalana be Baibel ese edena bamona ia gwauraia, bona edena dala ai unai hereva be mai anina bada hari Keristani memero kekeni dekenai?
2. Edena dala haida ai oi ese tisa bona klas taudia oi haroro henia diba?
3. Edena dala ai sikuli dekenai oi be diari bamona oi hedinarai diba?
4. Sikuli ai haroro ena namo haida be dahaka?
5. (a) Edena dala ai memero kekeni haida ese edia haroro idia habadaia? (b) Lauma dalanai oi tahua gaudia haida be dahaka?
6. Dahaka dainai emu kongrigeisen memero kekeni oi lalodia bada?