‘Diari Bamona Idia Hedinarai’
1 Inai lauma dalanai bona kara maoromaoro lasi tanobada diburana lalonai, Dirava momokanina Iehova, idia tomadiho henia taudia milioni 6 be tano 234 dekenai ‘diari bamona idia hedinarai’ noho. (Fili. 2:15) Unai dainai taunimanima vairanai ita be idau. Iehova amo ia mai hereva momokani ena diari namo hereana be edena bamona ita hahedinaraia diba?—2 Kor. 3:18.
2 Iseda Kara: Taunimanima ese iseda kara idia itaia haraga. (1 Pet. 2:12) Hahine ta ia itaia Witnes gaukara turana ta be mai ena hebogahisi bona heduru bada tauna bona hereva mirodia ia gwauraia lasi eiava hevaseha mirodia dekenai ia kiri lasi. Haida ese unai Witnes tauna idia habadua totona iena vairana dekenai hereva dikadia idia gwauraia neganai, ia badu lasi to kara maoromaoro ia badinaia. Unai kara dainai unai hahine dekenai dahaka ia vara? Hahine ia gwau: “Lau be iena kara dekenai lau hoa bada dainai Baibel lau tahua matamaia. Dirava ena Hereva lau stadilaia matamaia bona gabeai bapatiso lau abia.” Ma ia gwau: “Iena kara ese lau ia hagoadaia Iehova ena Witnes taudia idia abia dae hahediba herevadia lau tahua totona.”
3 Iseda kara siahu taudia dekenai, tanobada karadia dekenai iseda lalohadai, bona iseda hereva namodia ese idia hahedinaraia Iehova ena Witnes taudia ese Baibel ena taravatu hereadaedia idia badinaia. Unai bamona kara namodia ese Iehova ia hanamoa bona iena tomadiho dekenai ma haida ia veria mai.
4 Iseda Hereva: Oibe, bema iseda abidadama ita herevalaia lasi, iseda kara namodia idia itaia taudia be reana idia diba lasi dahaka dainai iseda kara be idau. Oi ida idia gaukara eiava sikuli taudia idia diba oi be Iehova ena Witnes tauna ta, a? Emui herevahereva lalonai, dala oi tahua oi haroro totona, a? Oiemu lalona oi hadaia vadaeni nega namodia ibounai lalonai ‘emu diari taunimanima edia vairana dekenai unai bamona do oi hahedinaraia’ totona, a?—Mat. 5:14-16.
5 Iseda diari halasia gaukarana ita karaia totona, sibona iseda ura ita dadaraia be namo. Mai kudouna ibounai ida ita gaukara neganai, unai ese ita do ia durua anina lasi gaudia ita dadaraia totona, unai amo hahemauri gaukarana, unai be haroro bona hahediba taudia halaoa gaukarana ita karaia badabada diba.—2 Kor. 12:15.
6 Iseda kara bona hereva amo, diari bamona ita hedinarai noho be namo. Bema unai bamona ita karaia, haida do ita veria mai diba ita ida Iehova idia hanamoa totona.