Kongregesen Idia Hakaua Taudia—Haroro Sikuli Naria Tauna
1 Haroro Sikuli naria tauna be lo tadikakana ta lauma dalana ai, ia be haroro bona hadibaia gaukarana ia goadalaia bona ia ita matauraia bona ia ida ita gaukara hebou be namo. (1 Tim. 5:17) Iena maduna idauidau be dahaka dahaka?
2 Kingdom Hall dekenai ia noho Haroro Sikuli laiberi ia naria. Mai ena ura ida, haroro sikuli dekenai idia vareai diba taudia ia hagoadaia. Ia itaia sikuli lalonai hereva do idia henia taudia ese edia kahana idia abia haraga, pura toi idia do noho ela bona edia hereva do idia henia negana ai. Kongregesen taudia ia diba namonamo, bona stiuden ta ta bona edia diba ia laloa danu be namo. Ena be tadikaka ta ese ia durua haroro sikuli sediual karaia totona, to daidia ese hebou ena kahana ta ta do idia karaia be ia sibona ena maduna.
3 Sikuli dekenai ia hadibaia namonamo totona, wiki ta ta ai ia hegaegae namonamo, do idia henia herevadia ia diba namonamo be namo. Unai kara dainai, kongregesen taudia ese sikuli do idia laloa bada, bona do ia diba kahana ta ta idia karaia namonamo eiava lasi, bona haroro sikuli ena henanadai lalonai do idia hedinarai hereva badadia do ia herevalaia diba.
4 Stiuden ta ta ese edia hereva idia karaia murinai, sikuli naria tauna ese hanamoa herevana do ia gwauraia bona do ia hahedinaraia dahaka dainai hereva dalana be namo eiava dahaka dainai ia hanamoa be namo. Bema ta ese heduru ia abia be namo, do ia henia herevana ia hegaegaelaia totona, sikuli naria tauna eiava ia abia hidi tauna ese do ia durua diba.
5 Bema ita ura Haroro Sikuli naria tauna ia karaia goadagoada gaukara namona amo bona heduru henia totona ia abia hidi taudia edia amo namo do ita davaria, namona be haroro sikuli be nega ta ita reaia lasi. Danu, namona be sikuli dekenai iseda kahana ita karaia bona ita abia sisiba, bona ma stiuden haida dekenai ia henia sisiba ita badinaia. Unai dala amo, ita ese iseda Basileia harorolaia gaukarana taunimanima vairanai bona ruma ta ruma ta ai ita karaia dalana do ita hanamoa.—Kara 20:20; 1 Tim. 4:13, 15.