Lagani 1999 Haroro Sikuli amo Namo Ita Davaria
1 Iesu be Hadibaia Tauna Badana. Taunimanima idia “hoa bada iena hadibaia hereva dekenai.” (Mar. 1:22) Ena be Iesu ia hereva bona hadibaia bamona ita karaia diba lasi, to ita gaukara goada diba ia ita tohotohoa totona. (Kara 4:13) Unai ita karaia totona, Haroro Sikuli ai ita vareai, bena unai ese ita do ia durua iseda hereva bona hadibaia daladia ita hanamoa totona.
2 Lagani 1999 lalonai, Hereva Namba 1 be lagani 1997 Gima Kohorona ena hereva amo do ita karaia. Iseda lalo-parara lauma gaudia dekenai ita habadaia diba, bema unai hereva ita duahia guna bona unai murinai, haroro sikuli dekenai ita kamonai. Namona be hereva ginigunana idia karaia taudia ese ita stadilaia gaudia be edena bamona iseda mauri lalonai ita gaukaralaia diba idia herevalaia, lalona veria dalanai bona mai edia ura ida unai hereva idia henia. Hereva Namba 3 bona Hereva Namba 4 be Ruma Bese bukana amo eiava Herevalaia bukana amo do idia karaia. Namona be sikuli ia naria tadikakana ese do idia henia herevadia ia itaia namonamo guna, bena unai hereva do idia henia taudia ia abia hidi namonamo. Namona be Ruma Bese bukana amo hereva idia henia taudia be haheitalai namodia edia ruma bese lalonai.
3 Sisiba Badinaia, Bona Hegaegae Namonamo: Ibounai idia gaukara diba edia herevahereva bona hadibaia daladia idia hanamoa totona. (1 Tim. 4:13) Unai dainai, namona be sisiba ita tahua, namo lasi ita dadaraia. (Aon. 12:15; 19:20) Hebou dekenai bona haroro gaukarana lalonai hereva momokani ita gwauraia namonamo ena anina be Baibel siridia ita duahia eiava ena hereva ita gwauraia hedinarai sibona lasi. Lasi, to ena anina be taunimanima edia lalona ita veria bona iseda hereva idia kamonai taudia ita hagoadaia. Unai ita karaia diba bema hereva momokani be iseda kudouna amo ita gwauraia. (Kara 2:37 itaia.) Haroro sikuli amo ita abia sisiba ese ita do ia durua unai gaukara ita karaia guguru totona.
4 Haroro sikuli lalonai kahana ta oi abia neganai, namona be maoromaoro oi hanamoa gaudia oi lalodia namonamo, Haroro School Ena Buka ia herevalaia bamona. Guna oi abia sisibana be edena bamona do oi badinaia oi laloa namonamo. Emu hereva ena sinado, do oi karaia dalana, bona edena bamona emu hereva dekenai idia noho Baibel siridia edia anina do oi hahedinaraia oi laloa namonamo. Oi laloa dobu edena bamona unai hereva do oi hadibaia bona edena bamona taunimanima edia lalona oi veria.—1 Tim. 4:15, 16.
5 Bema haroro sikuli lalonai oi vareai garina oi gari, oi guriguri bena emu hemami be haroro sikuli ia naria tadikakana ida oi kikilaia. Ibounai ese namo do idia davaria bema Lagani 1999 Haroro Sikuli lalonai idia henia hereva idia laloa bada bona idia badinaia.