Iehova ese Ita Ia Hadibaia
1 Hari inai negai Dirava ena hakaua dalana henunai sikuli ena program badana ta idia badinaia noho tano 233 lalodiai. Inai tanobada ena sikuli ida ia hegeregere lasi. Iseda Hadibaia Tauna Badana, Iehova, be ita ia hadibaia hari inai negai iseda mauri hanamoa totona bona ia ese danu ita dekenai mauri hanaihanai davaria dalana ia hadibaia.—Isa. 30:20; 48:17.
2 Dirava ese Ita Ia Hadibaia Sikulidia: Hari inai negai Iehova ena orea taudia edia namo idia havaraia noho sikulidia mani oi laloa. Pura ta ta ai, kongregesen 87,000 bamona ai idia karaia Haroro Sikuli ese pablisa milioni momo ia hadibaia sivarai namona harorolaia taudia namodia ai idia lao totona. Inai sikuli lalonai oi vareai vadaeni, a? Oi danu be painia taudia tausen ida pura rua lalonai idia karaia Painia Gaukara Sikuli dekenai oi lao, a? Reana regula painia taudia edia hora ia idau dainai momo do idia hegeregere painia gaukarana do idia karaia bena inai sikuli dekenai do idia vareai diba. Hesiai Gaukara Hadibaia Sikulina, hari negai tanobada ibounai lalonai gado badadia ai idia karaia sikulina, ese hua rua lalonai headava lasi elda bona hesiai taudia ia durua bada edia tiokratik maduna idauidau idia huaia namonamo totona. Bona nega ta ta ai, elda bona hesiai taudia iboudiai ese hahediba namona idia abia Basileia Hesiai Gaukara Ena Sikuli amo.
3 Watchtower Educational Center, Patterson, New York dekenai, tiokratik sikuli idauidau toi idia karaia. Watchtower Bible School of Gilead be hua ima lalonai misinari taudia ia hahegaegaea hesiai gaukara idau tanodia ai do idia karaia totona. Brens Komiti taudia tanobada ibounai lalonai be idia lao hua rua lalonai brens naria kosi ta karaia totona. May 1999 ai, kosi matamatana sekit bona distrik naria taudia totona do ia matamaia bona mai ena klas taudia 48 be United States bona Canada amo. Iehova ese inai sikuli idauidau dekena amo ena hesiai taudia ibounai ia hadibaia noho dainai hahenamo momo idia abia.
4 Ia Hadibadia Ena Badina be Dahaka? Hakaua Oreana tauna ta ia gwau: “Hari ai karaia hahediba gaukarana ese Iehova ena orea taudia tanobada hegegemadai ia durua, lo taudia ai do idia lao bona Aonega Herevadia 1:1-4 ena hereva hegeregerena.” Vadaeni namona be Iehova ese ita ta ta ia hadibaia noho.—Isa. 50:4.