“Umui Emui Gaukara Ibounai be Lalokau Dekenai Do Umui Karaia”
1 “Emui orea taudia ese ai idia hamoalea bada; edia kara be namo herea bona idia hemataurai bada.” Unai hereva be iseda distrik hebouhebou idia karaia United States ena siti ta ena gavamani dipatmen ta amo ia mai. Taunimanima momo idia noho gabudia ai, iseda kara dainai unai bamona hanamoa hereva ita abia ese ita ia hamoalea. Unai ese ia hahedinaraia iseda ‘gaukara ibounai be lalokau dekenai ita karaia.’ (1 Kor. 16:14) Unai nega tamona lalonai, gau badadia haida idia noho bema ita hanamoa lasi, unai ese Dirava ena taunimanima edia ladana namona do ia hadikaia diba.
2 Emu Maduna Oi Huaia Namonamo Noho Gabudia Oi Abia Neganai: Lagani ta ta ai, tadikaka bona taihu momo herea be hebouhebou totona gabu daudau amo idia mai. Namona be Mahuta Gabudia ia Naria Dipatmen amo noho gabudia idia ura abia taudia ese unai dipatmen idia hadibaia guna unai amo noho gabudia idia hegaegaelaia diba. Mahuta Gabudia ia naria Dipatmen ese Rooming Request fom be daudau kongregesen eiava grup ta ta dekenai do idia siaia. Unai kongregesen ena seketere eiava unai grup ia naria tadikakadia ese pablisa idia abia be namo gaudia do idia sekea namonamo, namona be idia hamomokania pablisa bona Baibel stadi taudia korikoridia sibona edia ladana be lista dekenai idia noho. Sikuli mahuta rumana, eiava mahuta gabudia ma haida idia abia neganai, nega momo davana bada idia noia lasi pablisa taudia idia durua totona. Unai noho gabudia be murimuri varavara, idia ura unai dava maragi gabuna idia noholaia taudia, totona idia abia lasi. Pablisa taudia ese kongregesen ena seketere dekenai edia ladana idia henia neganai, namona be idia laloatao idia be mai edia maduna idia noho gabuna ena davana hegeregerena do idia henia totona. Danu namona be nadunadu gaudia, digu gabuna, bona mei rumana totona unai noho gabuna ena biagudia ida ita gaukara hebou be gau badana.
3 Noho Gabudia Dekenai Haheitalai Namona Hahedinaraia: Nega momo, noho gabudia idia naria taudia be Iehova ena Witnes taudia edia gau karaia namonamo dalana, edia kara namo bona edia goeva karana idia laloa bada. Ena hotel dekenai idia noho Witnes ruma besedia ia herevalaia neganai, hotel biaguna ta ia gwau: “Iehova ena Witnes taudia edia natudia be natudia namo herea! Edia dabua be namo herea, idia manau, hemataurai, bona edia kara be namo herea, bona hekwakwanai ta idia havaraia lasi. Emui matamata taudia edia kara dainai hanamoa hereva umui abia be maoro. Emui natudia edia noho iniseniai ai moalelaia.” Unai bamona hereva idia gwauraia haraga diba badina gau haida ai ita danu idia gaukara hebou taudia be Iehova ena taunimanima edia huanai ia noho lalokauna bona hemataurai karana idia itaia.
4 Namona be do ita noho gabuna idia naria taudia ida ita gaukara namonamo nadunadu gaudia, digu gabuna, bona mei rumana totona idia atoa taravatu ita badinaia. Momokani, ita ura lasi Iehova ena taunimanima idia gwauraia dika. Ita be Keristani taudia dainai, nega ibounai ita kara momokani be namo. Unai hegeregerena, eda lauma tadikaka ese ita dekenai heabidae karana idia karaia neganai, unai kara ita laloa bada be namo. Edia heabidae karana ita laloa bada totona moni sisina ita henia aniani bona ma gau haida edia davana karaia totona. Namona be ita noho gabuna ena mahuta gaudia eiava “loaloa do ita laloatao gaudia” haida ita abia lasi, badina unai be henaohenao karana; eiava noho gabuna totona noinoi ita karaia neganai, namona be daiutu ta dekenai taunimanima hida do idia noho ena namba korikorina ita gwauraia, ita koikoi lasi.
5 Taunimanima Ibounai Ita Kara Namo Henia: Kara namodia bona haheitalai namona ita hahedinaraia badina Dirava bona iseda dekena taudia ita lalokau henia. (Mat. 22:37-39; Iam. 3:13) Baibel ese ita ia hagoadaia taunimanima ibounai ita lalokau henia bona ita laloa. (Gal. 6:10) Herevana edeseniai ita noho, Keristani ruma besena ta ida, Kindom Hall lalonai, sikuli mahuta rumana dekenai, eiava hotel dekenai, to unai hakaua herevana ita badinaia be namo.
[Box on page 4]
Program Negadia
Friday bona Saturday
9:00 a.m. – 4:30 p.m.
Sunday
9:00 a.m. – 3:30 p.m.