¹ Idaunegai, Iuda ena King Hesekaia be haida amo revareva ia siaia, taunimanima idia hadibaia Ierusalema dekenai idia hebou totona. (2 Siv. 30:​6, 13) Taunimanima edia kara amo idia hahedinaraia, tomadiho momokani idia laloa bada eiava lasi. (2 Siv. 30:​10-12) November bona December edia hua lalonai, Iehova ena hesiai taudia Papua New Guinea lalonai be Iehova tomadiho henia totona do idia hebou, unai amo edia tanikiu karana do idia hahedinaraia. Oi ai boiria “Hahemauri be Kahirakahira!” Distrik Hebouhebou ena dina toi dekenai oi mai totona, bona hari palani oi karaia matamaia be namo.

² Hari Palani Oi Karaia: Idia hegaegaelaia lauma aniani amo namo ita davaria totona, namona be program ibounai totona ita noho. Oi bona emu ruma bese be unai dina toi dekenai umui lao totona, hari palani umui karaia be namo. Umui momo be emui hegaegae karana lalonai moni do umui haboua, unai amo motuka ena davana, aniani bona mahuta gabuna ena davana umui karaia diba, bona moni sisina do ia noho kontribusen maua dekenai umui udaia totona. April 2005 Iseda Basileia Gaukara, rau 4 ai, heduru hereva haida idia henia, edena bamona ruma bese taudia idia gaukara hebou diba, unai amo moni idia haboua distrik hebouhebou dekenai idia lao totona. Reana umui haida be distrik hebouhebou totona uma umui karaia diba, bena aniani umui hoihoilaia neganai, unai moni umui gaukaralaia diba hebouhebou dekenai umui lao totona. Gau badana be nega bada ia noho lalonai, hebouhebou totona moni oi haboua matamaia. Umui haida be emui gaukara biagudia do umui nanadaia dina haida lalonai do umui gaukara lasi. Ma haida be edia Witnes lasi adavana ida edia palani do idia herevalaia. Namo lasi distrik hebouhebou ia kahirakahira bena unai gaudia oi karaia, to namona be nega bada ia noho lalonai oi karaia. To, namona be Iehova dekenai unai gaudia oi gurigurilaia, bona oi abia dae Ia ese “oi do ia durua.”​—Sal. 37:5.

³ Mauri lagani faiv merona be distrik hebouhebou dekenai ia lao neganai, ia gwau: “Iehova tomadiho henia karana lalonai, distrik hebouhebou be lau moalelaia bada negana.” Ena hereva ese ita ia hagoadaia, lagani ta ta ai idia karaia hebouhebou ita laloa bada totona. Salamo torea tauna ena hereva bamona, ane amo ia gwau: “Dina tamona sibona Dubu Helaga lalonai lau noho, unai dina ese, dina 1000 idau gabu dekenai ia hereaia noho.” (Sal. 84:10) Davida be ane amo ia hahedinaraia, ‘Ia ura Lohiabada ena Dubu lalonai do ia noho, ena mauri dinadia ibounai lalonai.’ (Sal. 27:4) Davida be ia moale bada Iehova idia tomadiho henia taudia huanai ia noho. Davida hegeregerena, tomadiho momokani laloa bada karana ita hahedinaraia totona, namona be “Hahemauri be Kahirakahira!” Distrik Hebouhebou ena dina toi dekenai ita lao.

[Study Questions]

1. Idaunegai, Dirava ena taunimanima be edena bamona idia hahedinaraia tomadiho momokani idia laloa bada, bona hari dahaka ita karaia be namo?

2. Hebouhebou amo namo bada ita abia totona, dahaka ita karaia be namo?

3. Lagani ta ta ena distrik hebouhebou dekenai dahaka oi laloa bada, bona emu lalona oi hadaia dahaka oi karaia totona?

[Box on page 7]

Deit Bona Gabu

November 24-26, 2006

Port Moresby (English)

December 1-3, 2006

Popondetta (Tok Pisin)

Kiunga (Tok Pisin)

December 8-10, 2006

Port Moresby (Tok Pisin, Sain Gado)

Madang (Tok Pisin)

Agi (Hiri Motu)

December 15-17, 2006

Port Moresby (Hiri Motu)

Rabaul (Tok Pisin)

Lae (Tok Pisin)