Dirava Idia Hanamoa Kara Namodia Oi Karaia Noho
1 Herevana edeseniai ita noho, iseda kara, dabua, bona tauanina ena toana ese ita bona ita tomadiho henia Diravana idia hahedinaraia. Unai be momokani Dirava ena taunimanima edia hebouhebou badadia dekenai, taunimanima momo ese ita idia itaia. Haheitalai namona ita hahedinaraia neganai, Iehova ena ladana ita hanamoa. (1 Pet. 2:12) To, taunimanima haida sibona edia kara kererena eiava edia laloa namonamo lasi karadia ese Dirava ena ladana bona iena taunimanima edia ladana idia hadikaia diba. (Had. 9:18b) Namona be ita laloatao, murimuri taudia be iseda haheitalai amo iseda orea bona ita tomadiho henia Diravana idia hahemaoro henia, unai dainai ita naria namonamo ‘gau ibounai do ita karaia Dirava hanamoa totona.’—1 Kor. 10:31.
2 Kara Namona Hahedinaraia Hebouhebou Dekenai: Herevana edena bamona gabu ita gaukaralaia, to hebouhebou negana lalonai namona be unai gabu be Kingdom Hall badana ta bamona ita laloa. Namona be iseda dabua bona tauanina ena toana be iseda kongregesen heboudia dekenai ita lao negadia ena toana hegeregerena. Hebouhebou ena program lalonai bona murinai, namona be tadikaka bona taihu ese hemataurai lasi eiava hari inai negai momo ese idia atoa dabuadia idia atoa lasi, badina inai tanobada ena lauma idia hahedinaraia bona unai dabua dainai taunimanima ese iseda kara namona ena idau idia itaia be auka. Namona be taihu idia naria namonamo edia rami bona deresi ena sitaelo bona lata ese hemataurai toana idia hahedinaraia. (1 Tim. 2:9, 10) Herevana hebouhebou dekenai ita lao, tadikaka ta ena ruma dekenai ita noho eiava gabu ma ta dekenai ita noho, eiava sitoa dekenai ita lao, to nega ibounai ita hahedinaraia ita be Dirava ena hesiai taudia bona ta do ita hahekwakwanaia lasi be namo.—2 Kor. 6:3.
3 Hebouhebou dekenai bapatiso be Saturday daba do idia karaia. April 1, 1995, Gima Kohorona, rau 30, ese bapatiso negana ai do ita hahedinaraia lalohadai ia herevalaia. Ia hahedinaraia “bapatiso neganai do ita kara namonamo mai eda hemataurai ida. Namona be do ita boiboi badabada lasi, pati do ita karaia lasi, bona do ita kiri kava lasi. To iseda vairana do ita huaia lasi danu be namo.” Bapatiso idia abia taudia be edia tauanina idia hahedinaraia dabuadia idia atoa be maoro lasi, herevana idia be tatau eiava hahine. Unai dainai, namona be ibounai ese Keristani bapatisona idia matauraia bona idia moalelaia.
4 Daika be Hebouhebou Ena Lapel Kadi Ia Abia Diba?: Hebouhebou ena lapel kadi be mai ena heduru bada badina ita ia durua iseda tadikaka ita diba totona, bona hebouhebou ia gwauraia hedinarai. To, namo lasi kadi ita henia kava. Ia hahedinaraia unai lapel kadi ia atoa tauna be kara namo tauna Iehova ena Witnes taudia edia kongregesen ta lalonai.
5 Kadi dekenai gabu ia noho ta be ena ladana bona kongregesen ena ladana ia torea. Unai dainai, namona be unai tauna be nega sisina daudau lalonai unai kongregesen lalonai ia noho. Society ese kongregesen ta ta dekenai kadi idia siaia. Unai dainai, kadi be idia bapatiso vadaeni bona idia do bapatiso lasi pablisa taudia dekenai ita henia be maoro. Ma danu, natudia bona hanaihanai kongregesen ena hebou idia lao henia bona haroro gaukara idia karaia gwauraia taudia ese ta idia abia be namo. Hebouhebou ena lapel kadi be murimuri ai idia atoa tauna dekenai ita henia be ia hegeregere lasi. Kadi idia mai neganai, namona be elda taudia idia hamomokania, kadi be unai dala hegeregerena do idia hariharilaia.
6 Inai dina gabedia lalonai, lagani ta ta ai idia karaia distrik hebouhebouna ita abia be gau badana. Unai be Iehova ese ia henia gauna ta, lauma dalanai ita goada noho bona ita laloa namonamo noho totona. Unai dainai, iseda lalona ita hadaia inai lagani ena dina toi “Dirava Ena Hereva Badinaia Taudia” Distrik Hebouhebouna dekenai do ita lao. Edena bamona unai lalohadai do oi badinaia? Namona be guna emu gaukara biaguna oi noia nega oi abia hebouhebou ibounai dekenai oi lao totona. Bema emu moni be ia hegeregere lasi, bona moni oi do haboua matamaia lasi, namona be hari moni haida oi haboua matamaia do oi lao totona. Iehova oi noia oi ia durua hekwakwanai do oi hanaia totona. Unai bamona oi karaia neganai, emu tadikaka bona taihu edia hebamo namona do oi moalelaia bona iseda lalokau guba Tamana, Iehova amo idia mai mauri hanaihanai herevadia do oi kamonai henia.—Ioane 6:68 itaia.
7 Petero ese ita ia hadibaia lou “umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo.” (2 Pet. 3:11) “Dirava Ena Hereva Badinaia Taudia” Distrik Hebouhebouna dekenai, namona be kudou-maoro taudia ese iseda hereva bona kara idia itaia bona idia ia durua iseda Dirava, hemataurai bona hairai ibounai ia abia be namo Diravana, idia diba bona tomadiho henia totona.—1 Kor. 14:24, 25.