Iseda Gwauhamata Ita Hamomokania
1 Herevana vanegai sibona eiava lagani momo lalonai bapatiso oi abia, to reana emu mauri lalonai unai mai anina bada negana oi laloatao. Iseda bapatiso be iseda hesiai gaukara ena dokona lasi, to ia be iseda hesiai gaukara ena matamana sibona, bona do ita karaia ela bona hanaihanai. (1 Ioa. 2:17) Iseda gwauhamata ita hamomokania ena anina be dahaka?
2 Keriso Ena Haheitalai Tohotohoa: Iesu ia bapatiso neganai, “Dirava ena Basileia ena Sivarai Namona” harorolaia “gaukara ia hamatamaia.” (Luka 3:23; 4:43) Unai hegeregerena, bapatiso amo Iehova dekenai iseda gwauhamata ita hamomokania neganai, sivarai namona harorolaia taudia ai ita lao. Ena be taunimanima be reana edia nega bona goada bada be mauri durua gaudia abia totona idia negea, to iseda gaukara badana be Keristani hesiai gaukarana. (Mat. 6:33) Aposetolo Paulo ia karaia bamona, Dirava idia gwauhamata henia taudia ese moni eiava ladana bada idia tahua lasi, to edia ‘gaukara lalonai idia moale bada.’ (Roma 11:13) Iehova oi hesiai henia ena hahenamo oi laloa bada bona oi gaukara goada ia dekenai emu hesiai gaukara oi hanamoa totona, a?
3 Iesu ia karaia bamona, gau badana be ‘Satani ita tuari henia.’ (Iam. 4:7) Iesu ia bapatiso murinai, Satani ese Iesu ia tohoa, bona unai hegeregerena hari inai negai, ia ese Iehova ena gwauhamata hesiai taudia ia badu henidia. (Luka 4:1-13) Ita be Satani ena taunimanima huanai ita noho dainai, gau badana be sibona eda ura ita biagua, iseda lalona idia hamiroa eiava iseda kudouna idia hadikaia gaudia ita dadaraia totona. (Aon. 4:23; Mat. 5:29, 30) Keristani taudia idia abia sisibana be, “Lohiabada ena pata . . . bona lauma dikadia edia pata dekenai noho aniani ruaosi be nega tamona idia ania diba lasi.” (1 Kor. 10:21) Unai ena anina be, moale karadia kereredia, hebamo dikana, bona Internet ai idia noho gau dikadia dekenai ita naria namonamo. Danu, hereva momokani negea taudia edia buka ita dadaraia. Unai kara bona Satani ena kara ma haida dekenai ita naria namonamo neganai, unai ese ita do ia durua Iehova dekenai iseda gwauhamata ita hamomokania totona.
4 Dirava Ia Henia Gaudia Ita Gaukaralaia: Iehova ese ita ia durua iseda gwauhamata ita hamomokania totona, Ia ese ena Hereva bona Keristani kongregesen amo heduru ia henia. Dina ta ta ai, Baibel oi duahia bona Iehova oi guriguri henia. (Ios. 1:8; 1 Tes. 5:17) Kongregesen heboudia oi moalelaia. (Sal. 122:1) Iehova idia gari henia bona ena oda idia badinaia taudia ida oi hebamo.—Sal. 119:63.
5 Dirava ena heduru amo, emu gwauhamata ia dekenai oi hamomokania diba, bona hanaihanai ia oi tomadiho henia karana do oi moalelaia.—Sal. 22:26, 27; Fili. 4:13.