Kara Namodia Ita Karaia Goadagoada!
1 Lagani 2003 ena Memorial negana ia kahirakahira neganai, badina momo idia noho ‘kara namodia ita karaia noho mai goada danu.’ (1 Pet. 3:13) Unai badina ibounai amo, Iesu Keriso ena mauri davalaia boubouna be badina badana. (Mat. 20:28; Ioa. 3:16) Unai hereva dekenai, aposetolo Petero, ia gwau: “Dirava ese inai karadia dekena amo umui ia hamauria. . . . Umui ia hamauria gauna be Keriso ena rarana. Inai rara be davana bada herea gauna. Keriso be mamoe natuna goevagoeva momokani hegeregerena, ia be maka dikana ta lasi, bona toto ta lasi.” (1 Pet. 1:18, 19) Unai lalokau bada ia hahedinaraia dainai unai ese ita ia veria kara namodia do ita karaia noho, badina ita diba Iesu be “iena mauri ia henia ita dainai, kara dika ibounai dekena amo ita do ia hamauria totona. Badina be ia ura orea tamona ita do ia halaoa, ia sibona ena orea, do ita goevagoeva, bona iena kara namodia do ita karaia totona.”—Tito 2:14; 2 Kor. 5:14, 15.
2 Dirava ia hamoalea karadia ita karaia neganai, ia ida hetura karana namona ita moalelaia bona ia ese lalokau dalanai ita ia gimaia noho. Petero be ma ia gwau: “Tau ta ese mauri ia ura henia, bona nega namodia ia ura itaia, . . . dika do ia rakatania, bona kara namo do ia karaia. Maino do ia tahua, bona maino ena dala do ia badinaia noho. Badina be Lohiabada ese, kara maoromaoro taudia ia naridia noho, bona edia guriguri ia kamonai henia noho.” (1 Pet. 3:10-12) Hari inai nega dikadia ai, ita diba Iehova ese ita ia naria noho bona ita totona kara ta do ia karaia, “[ita] ia gimaia, sibona ena lalokau tauna ia gimaia bamona,” be hahenamo badana.—Deu. 32:10; 2 Siv. 16:9.
3 Ena be Petero ese ia tore henia Keristani taudia ginigunadia be hahetoho idia davaria, to idia ese lalo-goada idia hahedinaraia bona sivarai namona harorolaia gaukarana idia habadaia. (1 Pet. 1:6; 4:12) Hari, Dirava ena hesiai taudia dekenai danu unai be momokani. Herevana ita be “metau dikadia momo” negana lalonai ita noho, to Iehova ena namo ita laloa bada dainai, unai ese ita ia hagoadaia Dirava ena ura ita karaia goadagoada totona. (2 Tim. 3:1; Sal. 145:7) Namona be Memorial negana lalonai do ita karaia kara namodia haida do ita laloa.
4 Memorial Dekenai Ma Haida Ita Boiria: Harihari gauna namo hereana totona iseda tanikiu karana ita hahedinaraia dalana ta be lagani ta ta ai ita karaia Iesu ena mase laloatao hebouna dekenai ita lao be namo, inai lagani ena Memorial hebouna be Wednesday, April 16, dina ia diho murinai do ita karaia. (Luka 22:19, 20) Lagani gunanai, kongregesen ibounai 94,600 edia ripoti idia henia dainai, unai hebou idia mai taudia edia namba badana be 15,597,746! Unai namba ese lagani gunana ena namba be 220,000 amo ia hanaia.
5 Inai lagani ai hida do idia mai? Iseda gaukara goadagoada karana amo ma haida ita hagoadaia ita ida idia hebou totona. Guna, oi ura boiria taudia ibounai edia lista ta oi karaia. Oiemu ruma bese taudia be lista dekenai oi atodia guna be namo. Bema emu adavana be abidadama lasi tauna, ia dekenai oi hahedinaraia oi ura bada oi ida ia mai totona. Abidadama lasi tauna ta ia gwau, ia be lagani gunanai Memorial ia lao henia badina ia itaia diba iena hahine dekenai unai hebou ia lao henia be mai anina bada. Oiemu lista dekenai gabeai oi torea taudia be varavara taudia, dekena taudia, gaukara turadia, eiava sikuli turadia. Oi laloaboio lasi oiemu Baibel stadi taudia oi boiria.
6 Lista oi karaia murinai, nega oi atoa idia ta ta oi boiria totona. Idia printaia Memorial boiboi pepadia oi gaukaralaia. Idia ita durua nega bona hebou ita abia gabuna idia laloatao totona, namona be Memorial ena nega bona gabu be pepa ena henunai ita torea namonamo. April 16 ia mai kahirakahira neganai, emu lista dekenai idia noho taudia be oi ese eiava telefon amo oi hadibadia lou. Namona be taunimanima momo ita durua be namo, unai anina bada hebouna helagana dekenai idia mai totona.
7 Memorial Idia Mai Taudia Oi Durudia: Memorial hanuaboina be moale negana. Ita be mai eda dala hebou idia mai momo lasi taudia ita hedavari henia totona. Dala oi karaia oi ginidae haraga bona hebou gabuna oi rakatania haraga lasi, oiemu noho dalana hegeregerena. Dala oi karaia, hebou dekenai idia mai matamata taudia oi dibaia totona. Lalokau bona heabidae karana oi hahedinaraia.—Roma 12:13.
8 Memorial dekenai idia mai taudia haida ita durua diba Baibel stadi karana amo lauma dalanai idia goada totona, a? Oi hekwarahi vadivadi taudia edia ladana bona adres oi abia totona, unai amo idia oi durua diba. Mai lalokau ida oi durudia neganai, reana vaira lagani ena Memorial ia do abia lasi neganai, unai taudia haida be bapatiso lasi pablisa taudia ai do idia lao. Memorial idia lao taudia oi lou henidia neganai, April 27 ai do idia henia pablik tok badana totona idia oi boiria.
9 March, April, Bona May ai Heduru Painia Oi Karaia Diba, A? Lagani ta ta ai, Iehova dekenai iseda ura bada ese ita ia veria tiokratic gaukara badana karaia huadia lalonai, haroro gaukara ita karaia goadagoada totona. Hegeregere, March 2002 ai, Papua New Guinea lalonai heduru painia idia karaia taudia be 348. Unai namba ese ia hahedinaraia Memorial negana lalonai kongregesen taudia ibounai be mai ura bada ida idia hekwarahi sivarai namona idia harorolaia totona.
10 Tano ma ta dekenai, kongregesen ta ena pablisa taudia be 107 bona regula painia taudia 9, idia gwau vanegai April be “hua namo hereana” ta, pablisa taudia 53 be heduru painia idia karaia, elda taudia bona hesiai taudia danu. Unai hua dekenai elda taudia ese edena bamona edia ura idia habadaia heduru painia gaukara idia karaia totona? Memorial negana ia do ginidae lasi neganai, momo idia hagoadaia unai nega lalonai painia gaukara idia karaia totona. Haroro gaukara heboudia be nega idauidau ai idia karaia kongregesen taudia idia haroro diba totona. Telefon amo haroro gaukara idia karaia diba dalana idia herevalaia badabada, gorere taudia be idia hegeregere unai idia karaia totona.
11 Ia raka diba lasi gorere taihuna ta ena mauri lagani be 86, be heduru painia totona ena ladana ia henia. Daba ia matamaia neganai, hora haida lalonai kisini ena teibolo dekenai ia helai bona telefon amo ia haroro, hora haida lalonai ia laga-ani, bena ia giroa bona telefon amo ia haroro lou. Hahine ta ia hereva henia, unai hahine ena tau bona natudia memero rua be idia hanaia laganidia rua lalonai idia mase bona ia lalo-parara lasi dahaka dainai Dirava ese kara dikadia ia koua lasi. Haroro namona ia henia, bona Baibel stadi idia hamatamaia. Adorahi bona ma nega haida ai, telefon amo ita haroro be dala namona, ruma badadia lalonai idia noho taudia bona ita vareai diba lasi gabudia dekenai ita haroro totona. Unai ese danu pablisa taudia ia durua dina ai ruma dekenai idia noho lasi taudia idia haroro henidia totona.
12 Elda taudia edia ripoti be inai hereva amo idia hadokoa: “Ai be nega namo hereana ai moalelaia bona Iehova ese ai ta ta dekenai ia henia hahenamo idauidau ai laloa bada.” Umui hegaegae namonamo neganai, emui kongregesen ese unai bamona hahenamo idia moalelaia diba.
13 Haroro Gaukara Lalonai Ita Gaukara Goada: Iseda lalokau Dirava bona dekena taudia dekenai ese ita ia veria hua ta ta ai nega ita atoa sivarai namona be ma haida dekenai ita harorolaia totona. (Mat. 22:37-39) Kongregesen Buka Stadi naria taudia bona edia durua taudia idia hekwarahi be namo, edia grup dekenai idia noho taudia idia durua hua ta ta ai idia haroro totona. Unai idia karaia totona dala namona ta be dala idia hegaegaelaia guna edia grup taudia ta ta ida idia gaukara totona. Unai ita karaia totona namona be ita naria lasi ela bona hua ena dokona, to ita matamaia haraga. Unai ese dala momo do ia kehoa mai lalokau ida heduru oi henia totona.
14 Idia hekwarahi bada haroro gaukara idia karaia gorere pablisa taudia haida be oiemu buka stadi grup lalonai idia noho, a? Bema haida be ruma idia rakatania diba lasi taudia, ita diba edia haroro negadia be maragi sibona. To bema edia nega maragina idia gaukaralaia namonamo edia diari idia hahedinaraia totona, unai ese edia kara namodia idia itaia taudia ia hagoadaia diba hereva momokani idia ura henia totona. (Mat. 5:16) Namona be buka stadi naria taudia idia hamomokania, unai bamona taudia be idia diba vadaeni edia haroro gaukara dekenai miniti 15 idia ripotilaia diba. Unai abidadama pablisa taudia ese haroro negana idia ripotilaia dainai unai ese idia ia hagoadaia bona ia hamoaledia. Danu, unai ese tanobada hegegemadai Dirava ena taunimanima ese idia karaia gaukara ena ripoti ia maoromaoro totona ia durua.
15 Kara Namodia Idia Karaia Noho Matamata Taudia! Keristani matamata taudia ese edia goada idia gaukaralaia Iehova ena hesiai gaukara idia karaia dainai, unai ese ita ia hagoadaia! (Aon. 20:29) Bema oi be matamata tauna, unai hua ena hesiai gaukara badana lalonai oiemu ura bada Iehova dekenai be edena bamona do oi hahedinaraia diba?
16 Bema oi be kongregesen lalonai bapatiso lasi pablisa ta ai oi do lao lasi, unai hahenamo oi abia diba, a? Inai henanadai haida amo sibona oi nanadaia: ‘Baibel ena hereva momokani ena hereva badadia lau diba, a? Lau ura Basileia ena gaukara lau durua, a? Lauegu kara be ia namo, a? Lau ese sivarai namona lau harorolaia amo ma haida dekenai lauegu abidadama ena badina lau gwauraia hedinarai diba, a? Egu lalona ese lau ia hagoadaia unai lau karaia totona, a?’ Bema unai henanadai dekenai oiemu haere be oibe, vadaeni namona be oiemu tama sina oi hadibaia oi ura pablisa ai oi lau totona. Oiemu tama sina ese hesiai komiti ena elda ta idia itaia diba.
17 Bema oi be sivarai namona harorolaia pablisa ta vadaeni, emu sikuli ena laga-ani negana oi gaukaralaia diba emu haroro gaukara oi habadaia totona, a? Sediual namona bona tama sina bona ma haida edia heduru dainai, bapatiso matamata taudia momo ese heduru painia gaukara idia karaia diba. Bema unai be hegeregere lasi, oiemu lalona oi hadaia emu haroro gaukara oi habadaia totona. Oi sibona totona tahua gauna ta oi atoa. Haroro gaukara totona hora haida oi karaia be oiemu tahua gauna ai oi halaoa sibona lasi, to tahua gauna ma ta oi atoa emu haroro gaukara oi hanamoa totona. Reana oi gaukara goada diba ruma ta ta dekenai siri ta oi gaukaralaia totona, oiemu lou henia karana oi hanamoa, Baibel stadi ta hamatamaia, eiava telefon eiava dala ma haida amo emu haroro gaukara oi habadaia. Bema emu tahua gauna ta be dekena tauna ta, sikuli turana, eiava varavara ta be inai lagani ena Memorial dekenai oi ida do idia mai totona, unai be edena bamona? Hesiai gaukara ita goadalaia neganai, unai ese namo bada do ia havaraia bona kongregesen taudia ma haida do ia hagoadadia.—1 Tes. 5:11.
18 Kamonai Matamata Taudia Durua Idia Goada Totona: Hesiai lagani gunana lalonai, Papua New Guinea dekenai hua ta ta ai Baibel stadi idia karaia ena averes be 3,189. Gabeai, unai stadi taudia momo do idia goada ela bona bapatiso idia abia. To, unai tahua gauna idia do abia lasi neganai, namona be idia ita durudia sivarai namona harorolaia taudia ai idia lao totona. Unai be mai anina bada dalana ta, kamonai matamata taudia ita durua Iesu Keriso ena murinai idia raka totona. (Mat. 9:9; Luka 6:40) Oiemu Baibel stadi tauna ta ia hegeregere unai bamona ia karaia totona, a?
19 Bema oiemu stadi tauna ena tubu lauma dalanai oi diba namonamo lasi, buka stadi naria tauna eiava haroro naria tauna ena heduru oi abia diba. Reana oi noia diba stadi lalonai ia helai totona. Unai tadikaka be mai edia ekspiriens bada dainai, stadi tauna be lauma dalanai ia tubu eiava lasi idia itaia diba. Reana idia be mai edia heduru herevadia haida, unai ese stadi tauna do ia durua lauma dalanai ia tubu noho totona.
20 Bema oiemu stadi tauna ia ura bapatiso lasi pablisa tauna ai ia lao bona oi laloa ia hegeregere neganai, hakaua naria tauna oi itaia. Ia ese dala do ia karaia elda rua be oi bona stadi tauna ida, Hesiai Gaukara bukana, rau 98-9 dekenai ia noho hereva haida idia herevalaia totona, unai amo do idia itaia bema ia be haroro gaukara totona ia hegeregere. (Gima Kohorona, May 1, 1989, rau 18 itaia.) Bema idia abia dae stadi tauna be pablisa ai ia lao totona, ia oi hadibaia matamaia be namo. Haroro gaukara ena ripoti ginigunana ia henia neganai, kongregesen hadibaia ia be bapatiso lasi pablisa ta. Ita ura pablisa taudia matamata tausen momo, matamata bona burukadia, ese unai hua lalonai unai hesiai gaukara badana do idia karaia diba.
21 Hegaegae Karana ese Namo Bada Do Ia Havaraia: Unai Memorial negana lalonai, hegaegae guna karana ese ita ia durua diba iseda gaukara ita hagugurua totona. (Aon. 21:5) Elda taudia ese gau momo idia lalohadailaia be namo.
22 Kongregesen taudia oi durudia haroro gaukara dekenai anina namona idia havaraia totona, namona be elda taudia ese pura lalonai bona Saturday bona Sunday ai haroro gaukara totona dala haida idia karaia be namo. Haroro naria tauna ese unai ia gunalaia be namo, unai daladia ia hegaegaelaidia totona. Dabai eiava adorahi ai haroro heboudia idia karaia diba, a? Umui hegaegaelaia daladia be kongregesen taudia dekenai umui hadibaia be namo. Bema sediual be notisbod dekenai idia atoa, unai be heduru bada gauna.
23 April 16 ia do abia lasi neganai, namona be elda taudia idia diba momokani Memorial totona idia karaia daladia be idia hegeregere vadaeni. Unai gaudia haida be unai Kingdom Hall tamona idia gaukaralaia kongregesen ma haida ida Memorial gabuna idia hegaegaelaia, Kingdom Hall idia hagoevaia, atendan taudia bona paraoa bona uaina idia loalaia taudia idia abia hidi, bona uaina bona paraoa idia hoia bona hegaegaelaia. Kongregesen taudia dekenai Memorial ena nega bona gabu bona pura ena hebou idia haidaua negadia idia hadibaia be namo. Unai gaudia idia naria namonamo neganai, unai Memorial be do ita “karaia namonamo, mai dala maorona” ida.—1 Kor. 14:40.
24 Ruma bese kwaradia ese reana edia ruma bese stadi ena kahana ta do idia gaukaralaia, Memorial negana lalonai ruma bese ese edia gaukara idia habadaia dalana idia herevalaia totona. Oiemu ruma bese taudia ibounai ese heduru painia gaukara idia karaia diba, a? Eiava ruma bese taudia ese edia ruma bese tauna ta eiava haida idia durua diba heduru painia ia karaia totona? Bema lasi, ruma bese taudia ese unai be tahua gauna ta ai idia halaoa, edia haroro gaukara idia habadaia totona. Bema ruma bese lalonai matamata tauna ta ia noho, hagoadaia bona heduru sisina ia abia bapatiso lasi pablisa ai ia lao totona, a? Oiemu ruma bese taudia ese Memorial ena hebou dekenai hida idia boiria mai diba? Hegaegae namonamo karana ese oiemu ruma bese dekenai hahenamo bona moale do ia mailaia.
25 Ia Do Noho Negana Oi Gaukaralaia Namonamo: Aposetolo Paulo ese Keristani taudia ginigunadia ia tore henidia neganai, ia hadibadia dokona be kahirakahira badina Iuda besena ena nega ia ore gwauraia. (1 Pet. 4:7) Hari inai negai idia vara gaudia ese idia hahedinaraia inai tanobada ena dokona be kahirakahira. Dina ta ta ibounai lalonai, iseda mauri lalonai unai ita laloatao be gau badana. Ita be Iehova ena hesiai taudia goadadia dainai, ita ese sivarai namona harorolaia gaukarana badana ita laloa bada be namo.—Tito 2:13, 14.
26 Hari be goada bona gaukara negana! Iehova ese oi, oiemu ruma bese taudia, bona kongregesen taudia totona ia karaia gaudia oi lalohadailaia. Ena be ia henia gaudia namodia momo dainai davana ita karaia diba lasi, to ita ese mai lalona ibounai ida Iehova ita tomadiho henia diba. (Sal. 116:12-14) Iseda gaukara goadagoada karana dainai, Iehova ena hahenamo momo do ita abia. (Aon. 10:22) Unai mai anina bada gaukara badana negana lalonai, mani ita ibounai ese ‘kara namodia ita karaia noho mai goada danu,’ ‘unai dala dekenai, iseda kara ibounai dainai, taunimanima ese Dirava do idia hanamoa henia, Iesu Keriso dainai.’—1 Pet. 3:13; 4:11.
[Box on page 3]
Tanobada Hegegemadai Memorial Dekenai Idia Lao Taudia
1999 14,088,751
2000 14,872,086
2001 15,374,986
2002 15,597,746
[Box on page 4]
Daika Do Oi Boiria Memorial Dekenai Ia Mai Totona?
□ Emu ruma bese bona varavara taudia
□ Dekena taudia bona turadia
□ Gaukara turadia bona sikuli turadia
□ Lou henia bona Baibel stadi taudia
[Box on page 5]
Memorial Idia Mai Taudia Oi Durudia
□ Mai lalokau ida oi welkam henidia
□ Idia oi lou henidia
□ Baibel stadi oi herevalaia
□ Pablik tok badana totona idia oi boiria
[Box on page 6]
Memorial Negana Totona Oiemu Tahua Gaudia be Dahaka?
□ Oi boiria tauna be Memorial dekenai do ia mai
□ Oi hegeregere sivarai namona oi harorolaia totona
□ Hora haida lalonai haroro gaukara oi karaia
□ Haroro gaukara ena kahana ta oi hanamoa
□ Heduru painia gaukara oi karaia