Iehova ida Eda Hetura Karana Ita Hagoadaia
1 Keristani taihu ta ia gwau: “Idia hanaia lagani 20 mai kahana lalonai hereva momokani lalonai lau noho neganai, hebou bona haroro gaukara dekenai lau lao kava.” To, ma ia gwau: “Hari lau lalo-parara unai gaudia be mai anina bada, to hekwakwanai idia vara neganai unai gaudia sibona ese lau idia durua diba lasi. . . . Hari lau lalo-parara egu lalohadai do lau haidaua be namo bona sibona egu stadi karana do lau hamatamaia, unai amo Iehova do lau dibaia namonamo bona ia do lau lalokau henia bona iena Natuna ese ita dainai ia henia gauna do lau laloa bada.”
2 Iehova ena turana namona ta ai ita lao totona be mai ena hekwarahi. Iena turana ai ita lao totona, Keristani karadia ita karaia loulou sibona be hegeregere lasi. Bema nega ibounai Iehova ita guriguri henia lasi, ita dekenai ia be eda turana gunana ta bona ita hereva henia lasi tauna bamona ia lao diba. (Apok. 2:4) Namona be ita tahua edena dala ai sibona eda stadi bona guriguri karadia ese ita idia durua diba Iehova ida ita eda hetura namonamo karana ita hagoadaia totona.—Sal. 25:14.
3 Guriguri Bona Laloa Dobu be Gau Badadia: Sibona eda stadi karana ese eda kudouna ia durua totona, stadi bukana eiava magasin lalonai point badadia ita makaia bona idia gwauraia siridia ita duahia sibona be hegeregere lasi. Sibona eda stadi karana ena anina be Iehova ena dala, taravatu bona kara idia hahedinaraia herevadia ita lalohadailaidia be namo. (Eso. 33:13) Lauma gaudia ita lalo-pararalaia karana ese iseda lalona ia hanamoa bona ita ia hagoadaia eda mauri ita laloa totona. (Sal. 119:35, 111) Sibona eda stadi karana ita karaia badina be ita ura Iehova kahirakahira dekenai ita lao be namo. (Iam. 4:8) Stadi namonamo totona nega bona gabu maorona be gau badana, bona stadi ita karaia hanaihanai totona, sibona eda kara ita biagua be namo. (Dan. 6:10) Herevana oiemu mauri lalonai oi bisi bada, to dina ta ta ai nega oi atoa Iehova ena kara hereadaedia oi lalodia dobu totona, a?—Sal. 119:147, 148; 143:5.
4 Sibona eda stadi ita karaia namonamo totona, mai kudouna ibounai ida ita guriguri be gau badana. Baibel ena hereva momokanidia ese eda kudouna ia hamarerea bona ita ia doria “Dirava do ita tomadiho henia, mai hemataurai bona mai gari danu” totona, Dirava ena lauma helaga ita abia be namo. (Heb. 12:28) Unai dainai, stadi negadia ta ta ita hamatamaia neganai, Iehova ena lauma helaga totona ia ita noia be namo. (Luka 11:13) Baibel siridia ita lalohadailaia bona Iehova ena orea ese ia halasia heduru gaudia ita gaukaralaia neganai, Iehova dekenai eda kudouna ita kehoa. (Sal. 62:8) Unai stadi karana be tomadiho karana ta, badina unai dala amo Iehova ita badinaia bona ita ia hagoadaia ia dekenai ita tabekau totona.—Iuda 20, 21.
5 Hetura karadia ibounai bamona, Iehova ida eda hetura karana ita hagoadaia noho be namo, unai amo iseda mauri lalonai do ia goada ia lao noho. Unai dainai, namona be dina ta ta ai nega ita atoa Dirava kahirakahira dekenai ita lao totona, badina ita diba ia be ita kahirakahira do ia mai.—Sal. 1:2, 3; Efe. 5:15, 16.
[Study Questions]
1. Taihu ta be iena lauma gaudia dekenai dahaka ia lalo-pararalaia?
2. Dahaka dainai Iehova ida eda hetura karana ita hagoadaia be gau badana?
3. Edena dala ai sibona eda stadi ita karaia amo Dirava kahirakahira ita lao totona?
4. Ita guriguri murinai sibona eda stadi ita karaia neganai, edena bamona unai ese ita ia durua Iehova ida eda hetura karana ita hagoadaia totona?
5. Dahaka dainai dina ta ta ai Dirava ena Hereva ita laloa dobu be gau badana ita dekenai?