Distrik Hebouhebou ese Ita Ia Hagoadaia Dirava ida Ita Raka Totona

“Dirava ida Ita Raka” Distrik Hebouhebouna ese Iehova ena hakaua herevana ia hahedinaraia goevagoeva lou: “Dala be inai, ia dekenai do umui raka lao”! (Isa. 30:21) Ita kamonai hadibaia herevadia ita badinaia neganai, unai ese ita do ia durua ‘iseda kara ita naria namonamo’ totona. (Efe. 5:​15) Ita dibaia gaudia laloa dobu karana ese ita do ia durua, “hereva momokani ena dala dekenai [ita] raka noho” totona.​​—3 Ioa. 3.

Henunai idia noho henanadai bona emu nouti ai oi torea herevadia oi gaukaralaia, lagani gunana ena hebouhebou ena riviu totona oi hegaegae bona haere totona. Riviu be January 17 purana ena Hesiai Hebou ai do ita karaia.

1. Ena be Enoka be heiriheiri negana lalonai ia noho, to edena dala ai Dirava ida ia raka noho diba? (Heb. 11:​1, 5, 6; Iuda 14, 15; “Heiriheiri Negana Lalonai Dirava ida Ita Raka”)

2. Iseda mauri lalonai edena dala ai Luka 16:10 ena sisiba ita badinaia diba? (“Oi be ‘Gau Maragina Oi Karaia Maoro,’ A?”)

3. (a) Hosea karoa 6 ia lao 9 dekenai idia noho hereva badadia foa ese ita do idia durua Dirava ida ita raka totona, mani oi gwauraia. (Hos. 6:​6, 7; 7:​14; 8:7) (b) Hosea karoa 10 ia lao 14 amo edena hereva ma haida ese ita idia durua Dirava ida ita raka totona? (“Hosea Ena Peroveta Herevana ese Ita Ia Durua Dirava ida Ita Raka Totona”​​—Hereva Toi)

4. Keristani tau bona hahine be dahaka idia karaia diba edia headava ia goada noho totona? (Aon. 12:4; Efe. 5:​29; “Dirava ese Ia Hakapua Taudia, be Taunimanima ese Do Idia Hapararaia Lasi”)

5. Edena dala ai ita hahedinaraia iseda hebouhebou helagadia ita matauraia? (Had. 5:1; Isa. 66:23; “Iseda Hebouhebou Helagadia Matauraia Karana Hahedinaraia”)

6. (a) Iseda haroro gaukara dekenai edena badina badadia toi ita laloa be namo, unai amo ita hahedinaraia ita be mai anina gaukarana ita karaia? (Isa. 52:7; Sek. 8:23; Mar. 6:​34) (b) Good News for People of All Nations buklet lalonai edena kahana oi gaukaralaia diba? (“Sivarai Namona Bese Ibounai Totona”; “Gado Ma Ta Idia Gaukaralaia Taudia Durua”)

7. Edena dala ai kamonai matamata taudia ita durua diba, mai gari lasi ida Basileia ena sivarai idia harorolaia totona? (Gun. 7:​17; “Momo Durua Ita Danu Idia Haroro Totona”)

8. Edena dala ai ita hahedinaraia, ita diba momokani Iehova “ena dina badana be ia kahirakahira vadaeni”? (Sep. 1:​14; “Abidadama Dekena amo Ita Raka, Itaia Karana Dekena amo Lasi”)

9. (a) Ta hahekwakwanaia karana ena dika ena bada be edena bamona? (Mar. 9:​42-​48) (b) Edena dala ai ma haida ese ita idia hahekwakwanaia karana ita dadaraia diba? (Sal. 119:165) (c) Edena dala ai ma haida hahekwakwanaia karana ita dadaraia diba? (1 Kor. 10:24; “Ta Hahekwakwanaia Karana ta Karaia Lasi”)

10. Adavana abia hidi karana, tauanina ena namo tahua karana, bona bisinesi karadia haida dekenai edena bamona ita laloa maoromaoro diba? (Sal. 26:4; Mat. 6:​25; 1 Tim. 6:9; “Do Umui Naria Namonamo”)

11. (a) Iesu be ma haida ida ia aniani hebou neganai, dahaka ia herevalaia? (Luka 10:42; 24:32) (b) Edena bamona moale karadia ita karaia diba, unai amo ita hahegoada heheni diba? (1 Kor. 10:​31-​33; “Ita Idia Hagoadaia Kara Namodia”)

12. Salamo 23 ena hereva bamona, ita be Iehova ena mamoe dainai, dahaka hahenamo ita moalelaia, bona iseda maduna idauidau be dahaka? (1 Kor. 10:21; “Iehova be Iseda Mamoe Naria Tauna”)

13. Edena dala ai Keristani taudia ese inai sisiba helagana, ‘nega umui haorea kava lasi,’ idia badinaia? (Efe. 5:​16; “Nega Namona Hoia”)

14. (a) Apokalupo 14:7 ese ia herevalaia “kota henia ena nega” lalonai dahaka do ia vara danu? (b) Edena bamona ita hahedinaraia Babulonia Badana ita dadaraia momokani? (“ ‘Gima Noho’​​—Kota Henia Ena Nega Ia Ginidae Vadaeni”) (c) Gima Noho! buklet amo edena hereva oi moalelaia?

15. ‘Dala maoromaorona ita rakatania’ lasi totona ita hahedinaraia kara toi oi gwauraia. (2 Pet. 2:​15; “ ‘Dala Maoromaorona Rakatania’ Lasi”)

16. Edena dala ai matamata taudia ese “kara dika taudia edia dala” idia dadaraia diba? (Aon. 4:14; “Matamata Taudia E​​—Kara Maoromaoro Ena Dala Dekenai Raka”)

17. (a) Edena bamona daladia ai Paulo be haheauka ena haheitalai namona? (Kara 14:​19, 20; 16:​25-​33) (b) Dahaka dainai tomadiho momokani idia inai henia taudia dekenai ita gari lasi? (Drama bona hereva ladana “Hari Dagedage Lalonai Sivarai Namona Gwauraia Hedinarai”)

18. Dirava ida idia raka taudia be dahaka hahenamo idauidau idia abia? (“Dirava ida Ita Raka ese Hahenamo Ia Mailaia Hari Bona Vaira Negana Totona”)

Iseda lalona ita hadaia Iehova ena “gadona” ita kamonai henia totona, unai amo iseda guba Tamana ida do ita raka ela bona hanaihanai.​​—Isa. 30:21; Ioa. 3:​36.