Iseda Kara amo Ita Haroro
1 Ena be Dirava ese ia karaia gaudia haida be idia hereva diba lasi, to Iehova ena kara, ita itaia diba lasi karadia unai, idia hahedinaraia goevagoeva. (Sal. 19:1-3; Roma 1:20) Unai hegeregerena, iseda kara namodia, Keristani karadia, bona hemataurai toana amo ita haroro diba. (1 Pet. 2:12; 3:1-4) Ita ta ta ita ura iseda kara amo ita hahedinaraia gau ibounai dekenai “iseda Hahemauri Tauna, Dirava, ena hahediba herevadia do [ita] hahairaia.”—Tito 2:10, NW.
2 Edena dala ai goevadae lasi taudia ese Baibel ena hahediba herevadia idia hahairaia diba? Dirava ena Hereva bona lauma helaga ena siahu edia hakaua dalana sibona amo unai idia karaia diba. (Sal. 119:105; 143:10) “Dirava ena hereva be ia mauri noho, bona ia be mai ena siahu. . . . Iena matana ese kaia mai ena kahana ruaosi ena matana ia hereaia.” (Heb. 4:12) Ia be iseda lalona dekenai ia vareai bona ita ia durua mauri matamata ita atoa totona. (Kol. 3:9, 10) Lauma helaga ese ita ia durua kara namodia, hegeregere hebogahisi, kara maoromaoro, manau, bona tauanina ena ura koua karana, ita hahedinaraia totona. (Gal. 5:22, 23) Ita ta ta be dala ita kehoa Dirava ena hereva bona ena lauma ese ita idia durua totona, a?—Efe. 4:30; 1 Tes. 2:13.
3 Ma Haida ese Idia Itaia: Iehova ena taravatu hegeregerena ita noho bona ita hekwarahi iena kara ita hahedinaraia neganai, ma haida ese unai idia itaia. Hegeregere, tau ta be ia kwadogi dainai ena gaukara turadia ese idia kirikirilaia karana mani oi laloa. Unai opesi tamona dekenai ia gaukara taihu ta be hanaihanai unai tau ia kara namo henia bona ia matauraia. Unai ese ena lalona ia veria unai taihu ia nanadaia totona, dahaka dainai ena kara be idau ma haida amo. Taihu ia gwau, hemataurai karana ia hahedinaraia badina Baibel ena hakaua herevadia be ena mauri lalonai ia badinaia. Taihu ese Basileia ena helaro namona be unai tau dekenai ia herevalaia danu. Unai tau be Baibel ia stadilaia matamaia bona ia goada ia lao ela bona ia bapatiso. Unai tauna be hanua dekenai ia giroa lou neganai, ena kara namodia dainai iena varavara idia hoa bona idia haida be hereva momokani idia abia dae danu.
4 Gaukara gabunai, sikuli lalonai, eiava iseda varavara bona dekena taudia ita bamoa neganai, namona be iseda kara namodia ita hahedinaraia bona ita haroro noho, unai amo ma haida ese Dirava idia hanamoa diba.—Mat. 5:16.