Ibounai ese Hahediba Taudia Halaoa Gaukarana Idia Durua Diba
1 Tau tamona sibona ena goada amo ta be hahediba tauna matamatana ai ia halaoa lasi. Iehova ese iena hesiai taudia ibounai ia gaukaralaia, Baibel stiuden idia durua lauma dalanai idia goada idia lao totona. (1 Kor. 3:6-9) Keristani heboudia dekenai ita ta ta ese ita henia haere sibona lasi, to iseda kara namodia amo kamonai taudia matamatadia ita durua diba. Unai ese ia hamomokania Dirava ena lauma helaga be iseda mauri lalonai ia gaukara. (Ioa. 13:35; Gal. 5:22, 23; Efe. 4:22, 23) Dahaka gaudia ma haida ita karaia diba kamonai taudia matamatadia durua totona?
2 Kongrigeisen Taudia: Namona be ita ibounai ese hebou dekenai idia mai kamonai taudia ita hedavari henidia bona hebou vairanai bona murinai idia danu ita herevahereva, unai amo ita hahedinaraia idia ita laloa. Tau ta ese kongrigeisen ena hebou dekenai ia lao nega ginigunana ia herevalaia neganai, ia gwau: “Dina tamona sibona lalonai lalokau korikorina idia hahedinaraia taudia lau hedavari henidia, ena be idia lau diba lasi, to lau tubu daekau dubuna dekenai unai bamona taudia momo lau davaria lasi. Hereva momokani lau davaria unai.” Hua 7 murinai bapatiso ia abia.
3 Baibel stiuden ia goada ia lao neganai, ia oi hanamoa. Ia be dagedage karana ia haheaukalaia noho, a? Hebou ia lao henia hanaihanai, a? Ena gari ia hanaia bona hebou dekenai haere ia henia, a? Tiokratik Haroro Sikuli lalonai ia vareai, eiava haroro gaukara ia karaia matamaia vadaeni, a? Bema oibe, namona be ia oi hanamoa. Unai ese ena lalona do ia hamoalea bona hagoadaia.—Aon. 25:11.
4 Baibel Stadi Naria Tauna: Pablisa haida idia ura edia Baibel stiuden be kongrigeisen taudia do idia dibaia, unai dainai pablisa haida idia noia unai stadi lalonai idia helai vareai totona. Namona be dala oi karaia haraga kongrigeisen ena hebou dekenai ia lao totona. Bona hebou ia lao henia matamaia neganai, namona be ia oi abia lao ma haida ia hedavari henidia. Ia hekwarahi noho ia manadalaia kara ta, hegeregere kuku ania karana ia rakatania totona, a? Iena ruma bese tauna ta ese ia koua Baibel stadi ia karaia lasi totona, a? Namona be unai bamona hekwakwanai ia hanaia pablisa ta ia hereva henia, unai amo heduru bada do ia abia.—1 Pet. 5:9.
5 Kongrigeisen taudia ese kamonai matamata taudia idia durua be namo. Bona kongrigeisen taudia ese unai matamata taudia edia namo idia laloa neganai, unai ese idia do ia durua lauma dalanai idia goada idia lao totona.