‘Huahua Momo Oi Atoa Noho’
1 Iesu ia gwau ia be vain auna korikorina, iena Tamana be vain edia uma gabu naria tauna bamona, bona iena horoa tadikaka be vain ena rigi bamona. Iesu be uma gabu naria Tauna ena gaukara ia herevalaia sibona lasi, to ia hahedinaraia rigi ese vain auna idia badinaia be gau badana. (Ioa. 15:1-4) Unai hereva ena anina be inai: Namona be Iehova idia tura henia taudia ibounai, huahua idia atoa rigi namodia unai, ese Iesu, “vain korikori” unai, idia badinaia. Ita ese lauma helaga ena huahua bona Basileia ena huahua ita atoa noho be namo.—Gal. 5:22, 23; Mat. 24:14; 28:19, 20.
2 Lauma Helaga Ena Huahua: Bema Iehova ita tura henia namonamo, ita be lauma helaga ena huahua ita hahedinaraia namonamo diba. Nega ibounai Dirava ena hereva oi stadilaia bona oi laloa dobu, unai amo lauma helaga ena huahua oi havaraia, a? (Fili. 1:9-11) Namona be Iehova oi noia lauma helaga oi abia totona, bena emu kara namodia amo Iehova oi hanamoa bona Ia oi tura henia noho diba.—Luka 11:13; Ioa. 13:35.
3 Danu, lauma helaga ena huahua ita havaraia neganai, unai ese ita do ia durua haroro gaukara ita goadalaia totona. Hegeregere, ena be ita be mai eda gaukara momo, to lalokau bona abidadama dainai nega ibounai ita haroro. Kara namodia ma haida hegeregere maino, haheauka, hebogahisi, manau, bona boga auka karana dainai, ita ese haroro gaukara idia koua taudia ita kara namo henia. Haroro gaukara lalonai ita moale, ena be taunimanima be idia kamonai lasi.
4 Basileia Ena Huahua: Danu, ita ura Basileia ena huahua ita atoa. Hegeregere, “Dirava ita hanamoa karana be iseda boubou gauna bamona; iseda uduna bibinadia ese [Iehova] ena ladana do idia hanamoa.” (Heb. 13:15, BHğ) Sivarai namona ita harorolaia goadagoada neganai, ita be Iehova ena ladana ita hanamoa. Haroro gaukara oi karaia neganai, Basileia ena huahua ma haida oi havaraia, a?
5 Iesu ia gwau ia murinai idia raka kamonai taudia be huahua idauidau do idia atoa. (Mat. 13:23) Unai dainai, mai eda kudouna ibounai ida Iehova ita hesiai henia, bona iseda goada be tau ta ena goada danu ita hahegeregerea lasi. (Gal. 6:4) Bema Dirava ena hereva ita gaukaralaia ita sibona eda kara ita tahua namonamo totona, unai ese ita do ia durua ‘huahua momo do ita atoa’ bena Iehova ita hanamoa noho totona.—Ioa. 15:8.