October 20–November 16 ai Pepapepa Matamata Do Ita Hariharilaia!
1 Monday, October 20, 2008 ela bona Sunday, November 16, 2008 dekenai, ita be pepapepa matamatana ta do ita hariharilaia; iena ladana be, Oi Ura Hereva Momokani Oi Diba, A? Ai laloa inai pepapepa matamata hariharilaia gaukarana be taunimanima momo do ia durua, hereva momokani ena badina o Baibel idia diba totona.—Ioa. 17:17.
2 Inai pepapepa lalonai, Baibel be henanadai badadia siks ia haerelaia: “Dirava be ita ia laloa, eiava?” “Tuari bona hisihisi be do idia ore, eiava?” “Ita mase neganai dahaka ia vara?” “Mase taudia totona helaro ia noho, a?” “Edena bamona do lau guriguri bona Dirava do ia kamonai?” bona “Edena bamona egu mauri lalonai lau moale diba?” Kerisendom dubu ibounai be unai henanadai edia haere maorona idia henia lasi. Danu, dubu idia lao lasi taudia momo be unai bamona henanadai edia haere idia tahua noho, to idia diba lasi haere be Baibel dekenai idia noho. Unai dainai, ita diba taunimanima momo be inai pepapepa do idia ura henia.
3 Emui Teritori ai Pepapepa Hariharilaia: Namona be umui gaukara goada, emui haroro teritori ai idia noho taudia ibounai dekenai unai pepapepa umui hariharilaia totona. Bema emu haroro teritori be ia bada bona nega ginigunana unuseniai umui gaukara, reana elda taudia be umui idia hagoadaia diba unai pepapepa be taunimanima idia noho lasi rumadia dekenai umui rakatania totona. Laloatao, namona be pepapepa be emu dekena taudia, varavara, gaukara turadia, sikuli turadia, bona ma haida dekenai oi hariharilaia. Reana sediual oi karaia October eiava November lalonai heduru painia gaukara oi karaia totona. Bema emu natuna ta o Baibel stadi tauna ta be orea lalonai ia goada ia lao, oi laloa ia hegeregere bapatiso lasi pablisa ai ia lao bona unai gaukara ia durua diba, a? Bema oibe, vadaeni elda taudia oi hadibaia be namo.
4 Hamatamaia Herevana: Taunimanima momo dekenai unai pepapepa oi rakatania totona, gau badana be emu hamatamaia herevana ia kwadogi. Hegeregere, pepapepa ena rau 1 ai ia noho henanadai ta be ruma tauna dekenai oi gwauraia, bena pepapepa dekenai haere oi hahedinaraia. Unai ese pablisa taudia ibounai do ia durua, edia haroro teritori ai hamatamaia hereva maorona idia gaukaralaia totona. Bema ruma tauna ta ia kamonai, vadaeni ena ladana oi torea, gabeai oi lou henia totona. Wikeni ai, unai pepapepa be magasin matamata ta ida oi hariharilaia diba. November 16 ai pepapepa hariharilaia gaukarana ia ore murinai, ita be Baibel Hadibaia bukana do ita hariharilaia. Anina be, pepapepa oredia be ma pepapepa haida hegeregeredia do ita gaukaralaia.
5 Baibel Stadi ta Hamatamaia: Unai pepapepa be Baibel stadi hamatamaia totona oi gaukaralaia diba. Kamonai tauna oi lou henia neganai, reana oi nanadaia edena hereva Baibel dekenai be ia moalelaia? Bena pepapepa ena rau 4 dekenai, Baibel stadi ia herevalaia kahana oi herevalaia, bona Baibel Hadibaia bukana ta oi henia. Bema ruma tauna ese Baibel Hadibaia bukana dekenai karoa ta ia abia hidi, vadaeni nega sisina lalonai ia ida unai karoa ena paragraf ta o rua umui kikilaia.
6 Momo idia ura “mai lauma bona mai momokani danu” Iehova idia tomadiho henia, bona Iehova be unai bamona taudia ia tahua noho. (Ioa. 4:23) Namona be ita ibounai be pepapepa matamata hariharilaia gaukarana lalonai ita vareai, bona ma haida ita durua hereva momokani idia diba totona!