Baibel Ita Gaukaralaia Namonamo

1. Dahaka dainai Baibel ita gaukaralaia namonamo be namo?

¹ Baibel ita gaukaralaia namonamo karana ese ita ia durua hereva momokani ita hadibaia maoromaoro, bona taunimanima edia sene karadia bona hahediba hereva koikoidia ita hahedinaraia totona.​​—2 Tim. 2:​15; 1 Pet. 3:​15.

2. Dahaka ese ita do ia durua Baibel siridia ita davaria haraga totona?

² Baibel Oi Diba Namonamo: Tulu ta oi gaukaralaia namonamo hegeregerena, Baibel oi diba namonamo neganai, gaukaralaia namonamo dalana do oi diba danu. Bema Baibel ibounai oi duahia, unai ese oi do ia durua Baibel ena sinado badana oi lalopararalaia totona. Unai ese oi ia durua danu siri oi laloatao bona Baibel ai oi davaria haraga diba. Emu diba Baibel dekenai ia bada ia lao dainai, mai goada bona gari lasi ida haroro gaukara ai bona gabu bona nega idauidau ai taunimanima oi hereva henia diba.​​—1 Tes. 1:5.

3, 4. (a) Baibel ita diba namonamo daladia haida be dahaka? (b) Baibel oi diba namonamo totona, dala ma haida oi tohoa vadaeni, a?

³ Kongrigeisen heboudia ai tadikaka ese siri ia duahia neganai, namona be emu Baibel oi kehoa bona ia duahia sirina oi badinaia. Sibona emu stadi oi karaia bona kongrigeisen heboudia totona oi hegaegae neganai, namona be idia noho siridia oi itaia bona oi badinaia dalana oi laloa dobu. Momo be kompiuta ai eiava idia printaia pepana amo siri idia duahia lasi, to Baibel bukana amo siri idia duahia, unai ese haroro gaukara ai idia do ia durua Baibel ai siri idia davaria haraga totona.​​—Ioa. 14:26.

⁴ Ruma bese haida be nega idia makaia Baibel ena siri idia laloatao totona. Unai idia karaia dalana be, kadi maragidia ai siri idia torea bona unai kadi ena kahana ma ta ai siri ena hereva idia torea. Idia ta ta ese unai kadi idia gaukaralaia siri ena hereva idia gwauraia diba o siri maorona idia laloatao totona. Haroro gaukara daladia idauidau ita tohoa bona Baibel ita gaukaralaia koua herevadia o henanadai ta ita haerelaia totona, unai amo iseda diba ita habadaia.

5. Dahaka dainai Baibel ita diba namonamo be namo?

⁵ Buka ma ta be Baibel hegeregerena lasi. Baibel lalonai taunimanima “hamauria” herevadia momo idia noho. (2 Tim. 3:​15) Iseda teritori ai taunimanima momo be Baibel ai idia noho hereva namodia idia diba lasi, unai dainai Baibel ita gaukaralaia namonamo idia dekenai Baibel ena hereva momokani ita hahedinaraia totona.​​—Aon. 2:​1-5.