Mai Moale ida Memorial Totona Hegaegae
1. Memorial be nega namona dahaka ita karaia totona?
1 Tuesday, March 26 ai do ita abia Memorial be nega namona Dirava ese ita ia hamauria dalana ita moalelaia totona. (Isa. 61:10) Ita moale dainai unai dina ia do ginidae lasi neganai, do ita hegaegae namonamo. Edena dala ai do ita hegaegae?
2. Dahaka dainai Memorial totona ita hegaegae?
2 Hebou Totona Hegaegae: Lohiabada ena Anibou be mai anina bada, to gaukara momo do ita karaia lasi. To nega bada lalonai palani ita karaia, unai amo mai anina bada gaudia do ita reaia lasi. (Aon. 21:5) Namona be nega bona gabu maorona ita abia hidi. Paraoa bona wain maorodia ita abia. Hebou gabuna ita hagoevaia bona hegaegaelaia. Tok henia tauna ia hegaegae namonamo. Namona be wain bona paraoa loalaia taudia bona atendan taudia ese edia gaukara idia dibaia. Reana unai gaudia haida umui karaia vadaeni. Mauri davalaia boubouna laloa bada karana ese ita do ia durua Memorial totona ita hegaegae.—1 Pet. 1:8, 9.
3. Edena dala ai Memorial totona eda kudouna ita hegaegaelaia?
3 Kudouna Hegaegaelaia: Memorial ena anina ita lalopararalaia totona, eda kudouna ita hegaegaelaia danu be gau badana. (Esr. 7:10, NW) Hegeregere, namona be nega ita atoa Memorial ena Baibel duahiduahi ita karaia bona Iesu ena tanobada maurina dokonai idia vara gaudia ita laloa dobu totona. Iesu ena lalokau karana laloa dobu karana ese ita do ia durua ia ita tohotohoa totona.—Gal. 2:20.
4. Mauri davalaia boubouna ese ia havaraia namo idauidau amo, edena oi moalelaia bada?
4 Keriso ena mase ese Iehova ena lohia siahuna ia abia isi bona kara dika bona mase amo ita ia ruhaia. (1 Ioa. 2:2) Danu, dala ia kehoa Dirava ida ita maino bona mauri hanaihanai ita abia diba. (Kol. 1:21, 22) Ma danu, ita ia hagoadaia iseda gwauhamata Iehova dekenai ita hagugurua bona Keriso ena murinai ita raka noho totona. (Mat. 16:24) Bema Memorial totona oi hegaegae bona oi lao, do oi moale bada!