Peroveta Taudia Tohotohoa—Mika
1. Mika be reana edena henanadai ia laloa? Dahaka dainai ia haroro noho be namo?
1 Peroveta tauna Mika be Iehova ese Israela bona Iuda do ia hadikaia herevana ia harorolaia neganai, reana ia laloa henanadai be inai, ‘Edena negai inai nega oromana dikana do ia ore?’ To ia haroro noho be namo. Lagani 740 B.C.E. ai, Mika ena negai, Samaria ai dika ia vara, Iehova ena hereva hegeregerena. (Mika 1:6, 7) Danu lagani 607 B.C.E. ai, Ierusalema ai dika ia vara. (Mika 3:12) Iehova ena hahemaoro negana ita naria noho lalonai, edena dala ai Mika ita tohotohoa diba?
2. Iehova ena dina ita naria noho lalonai, edena dala ai bona dahaka dainai ita haheauka be namo?
2 Haheauka: Mika ia gwau: “Lau ese [Iehova] do lau naria noho. . . . Ia ese lau do ia hamauria.” (Mika 7:7) Mika be ia helai kava lasi, to Iehova ena peroveta gaukara ia karaia noho. Ita danu ese Iehova ena dina ita naria noho lalonai, ‘namona be eda kara idia helaga bona Dirava badinaia karadia ita hahedinaraia.’ (2 Pet. 3:11, 12) Iehova ia haheauka, badina ia ura taunimanima idia helalo-kerehai. (2 Pet. 3:9) Unai dainai, Dirava ena sisiba ita badinaia, ia gwau, peroveta taudia edia haheitalai namona—edia haheauka karana—ita tohotohoa.—Iam. 5:10.
3. Dahaka dainai Iehova ita noia lauma helaga ia henia totona?
3 Iehova Dekenai Tabekau: Mika be Iehova ena siahu bona goada dekenai ia tabekau dainai, ena gaukara badana ia karaia diba. (Mika 3:8) Baibel ia gwau, Iehova ita noia ena siahu bona goada ita dekenai ia henia totona. Dirava be manoka taudia dekenai siahu o goada ia henia, unai amo edia tiokratik gaukara idauidau idia hagugurua diba. (Sal. 84:5, 7; Isa. 40:28-31) Unai be emu hesiai gaukara helagana ai oi mamia, a? Dina ta ta ai Iehova oi noia ena lauma helaga amo oi ia durua totona, a?—Luka 11:13.
4. Mika ena haheitalai namona amo dahaka ita dibaia?
4 Mika be ena mauri lalonai, Dirava ena ura ia atoa guna. Ena be kara dika taudia be momo herea, to Mika be nega ibounai Dirava ia badinaia. Unai hegeregerena, dina ta ta ai Dirava ita badinaia noho be mai ena hekwarahi. To, namona be eda lalona ita hadaia “Iehova, eda Dirava, ladana ai do ita raka, ela bona hanaihanai.”—Mika 4:5, BHḡ.