Peroveta Taudia Tohotohoa—Sepanaia
1. Sepanaia be edeseniai peroveta gaukara ia karaia? Edena dala ai ia be haheitalai namona?
1 Lagani 700 B.C.E. bamona ai, Iuda ai Bala tomadiho henia karana ia bada. King dikana Amona idia alaia, bona King Iosaia ia lohia. (2 Siv. 33:21–34:1) Unai negai, Iehova ese Sepanaia ia hamaoroa Iena hahemaoro herevana do ia harorolaia. Ena be Sepanaia be King ena ruma ai ia noho, to mai gari lasi ida Iehova ena hahemaoro herevana be Iuda lohia taudia dekenai ia gwauraia. (Sep. 1:1; 3:1-4) Sepanaia bamona, ita gari lasi bona eda varavara ese ita idia koua lasi Iehova ita tomadiho henia totona. (Mat. 10:34-37) Sepanaia be dahaka ia harorolaia, bona dahaka ia vara?
2. Iehova ese ena badu dinana ai ita ia naria totona, dahaka ita karaia be namo?
2 Iehova Tahua: Iehova sibona ese taunimanima be ena badu dinana ai do ia hamauridia. Unai dainai, Sepanaia be Iuda taudia ia hamaoroa nega ia do noho lalonai, Iehova idia tahua, kara maoromaoro idia karaia, bona idia manau. (Sep. 2:2, 3) Hari danu be unai bamona. Sepanaia bamona, haida ita durua Iehova do idia tahua, to namona be ita danu unai bamona ita karaia, bona eda lalona ita hadaia Iehova “ita rakatania” lasi. (Sep. 1:6) Iehova ita tahua bema iena Hereva ita stadilaia namonamo bona ita noia ita ia gimaia totona. Ita kara maoromaoro bema mauri dalana goevana ita badinaia. Ita manau bema Iehova ena orea ena hakaua dalana ita abia dae bona badinaia.
3. Dahaka dainai haroro gaukara ai lalohadai maorona ita abia be namo?
3 Anina Namona: Sepanaia ia harorolaia hahemaoro herevana ese Iuda taudia haida edia lalona ia hamarerea, to Iosaia ese unai hereva ia laloa bada bona Iehova ia tahua matamaia. Gabeai, Iosaia be mai gari lasi ida kaivakuku ibounai ia hadikaia. (2 Siv. 34:2-5) Hari, ena be Basileia ena uhe haida be dala badinai, nadi gabudiai, o ginigini huanai idia moru, to haida be tano namona dekenai idia moru bona huahua idia atoa. (Mat. 13:18-23) Ita diba momokani, Basileia ena uhe hadoa gaukarana ai ita bisi neganai, Iehova ese ita do ia hanamoa.—Sal. 126:6.
4. Dahaka dainai Iehova ena dina ‘ita naria noho’ be namo?
4 Iuda taudia haida idia laloa Iehova be kara ta do ia karaia lasi. To, Iehova ia gwau iena dina badana be kahirakahira. (Sep. 1:12, 14) Dirava ese abidadama taudia sibona do ia hamauria. (Sep. 3:12, 17) Iehova ena dina ‘ita naria noho’ lalonai, namona be mai lalotamona ida Dirava idia tomadiho henia taudia ida ita gaukara hebou!—Sep. 3:8, 9.