Emu Asainmen Oi Karaia Namonamo!

EMU HEMAMI be edena bamona bema emu turana namona amo hagoadaia revareva ta oi abia? Keristani tauna Timoteo be aposetolo Paulo amo unai bamona revareva ta ia abia, hari unai revareva be Timoteo Iharuana ena buka. Timoteo be reana regerege lasi gabuna ta ia tahua, iena turana ese ia torea gaudia ia duahia totona. Reana Timoteo do ia laloa: ‘Paulo be ia noho namonamo, eiava? Egu asainmen lau laloa dalana dekenai heduru herevadia haida do ia henia, a? Inai revareva ese egu haroro gaukara do ia hanamoa bona ma haida do ia durua, a?’ Do ita itaia, Timoteo ese unai henanadai edia haere be Paulo ena revareva lalonai ia davaria. Hari, unai revareva ena heduru herevadia haida do ita laloa.

“GAU IBOUNAI LALONAI LAU HAHEAUKA NOHO”

Timoteo ese unai revareva ia duahia matamaia neganai, ia bona Paulo edia hetura karana ena goada ia mamia. Paulo ese ia boiria, “egu lalokau natuna.” (2 Tim. 1:2) Timoteo be lagani 65 C.E. ai unai revareva ia abia. Unai nega ai iena mauri lagani be 30 bamona, bona ia be lo Keristani elda tauna ta vadaeni. Lagani 10 bamona ia be Paulo ia bamoa vadaeni, bona ia amo gau momo ia dibaia.

Timoteo be Paulo ia gini goada bona hahetoho ia haheaukalaia noho ena sivarai ia duahia neganai, unai ese ia hagoadaia. Roma ai Paulo be dibura ruma dekenai ia noho, bona kahirakahira do idia hamasea. (2 Tim. 1:15, 16; 4:6-8) Timoteo ia itaia Paulo be ia gari lasi, badina ia gwau: “Gau ibounai lalonai lau haheauka noho.” (2 Tim. 2:8-13) Timoteo hegeregerena, Paulo ena haheauka karana amo goada ita abia diba.

‘OI ABIA HARIHARI GAUNA OI HABADAIA’

Paulo ese Timoteo ia hamaoroa Dirava ena hesiai gaukara lalonai ia karaia asainmen do ia laloa bada. Paulo ia ura Timoteo be ‘Dirava amo ia abia harihari gauna ia habadaia.’ (2 Tim. 1:6) Paulo ese ia gaukaralaia Grik herevana khaʹri·sma ena anina be “harihari gauna.” Unai Grik herevana anina be ena be gau ta ita karaia lasi, to ta be ita dekenai harihari gauna ta ia henia kava, davana lasi. Timoteo idia abia hidi kongrigeisen do ia durua neganai, unai harihari gauna ia abia.​—1 Tim. 4:14.

Timoteo ese unai harihari gauna be edena dala ai do ia gaukaralaia? Inai hereva ‘harihari gauna habadaia’ ia duahia neganai, reana ia be taunimanima ese ruma ai idia gaukaralaia lahi be gida ai ia lao karana ia laloa. Unai gida be idia haboua unai amo lahi do ia hururu bona ruma lalona ia hasiahua. Diksenari ta ia gwau Paulo ese ia gaukaralaia Grik herevana (a·na·zo·py·reʹo) ena anina be “gida oi haboua o pururua, ia hururu totona” eiava laulau dalanai ena anina be mai moale bona goada ida gaukara oi karaia. Paulo be Timoteo ia hamaoroa noho ena asainmen do ia karaia namonamo! Hari, ita danu unai bamona do ita karaia, namona be mai moale bona goada ida iseda hesiai gaukara ita karaia.

DAVA BADA GAUNA OI GIMAIA

Timoteo be unai revareva ia duahia noho lalonai, heduru herevana ma ta ia davaria. Unai hereva ese do ia durua ena haroro gaukara ia hanamoa totona. Paulo ia gwau: “Oi dekenai ia henia dava bada gauna be lauma helaga amo do oi naria namonamo, unai lauma helaga be ita lalonai ia noho” (2 Tim. 1:14) Unai dava bada gauna be dahaka? Timoteo be dahaka gaukara idia henia? Paulo ese siri 13 ai ia gwauraia “lalohadai badana,” be Baibel amo ita abia hereva momokani. (2 Tim. 1:13) Timoteo be Keristani tauna dainai, ia be kongrigeisen lalonai bona murimuri ai idia noho taudia dekenai hereva momokani do ia harorolaia. (2 Tim. 4:1-5) Danu, Timoteo be elda maduna idia henia Dirava ena mamoe oreana ia naria totona. (1 Pet. 5:2) Timoteo be Iehova ena lauma helaga bona Iena Hereva dekenai ia tabekau, unai amo ia abia dava bada gauna, do ia harorolaia hereva momokani ia gimaia totona.​—2 Tim. 3:14-17.

Hari, ita danu be hereva momokani ita abia ma haida dekenai ita harorolaia totona. (Mat. 28:19, 20) Hanaihanai ita guriguri bona Baibel ita stadilaia namonamo karana amo, inai dava bada gauna ita moalelaia noho diba. (Roma 12:11, 12; 1 Tim. 4:13, 15, 16) Reana ita be mai eda maduna ma haida hegeregere kongrigeisen ena elda eiava ful-taim hesiai gaukara ita karaia. Unai bamona maduna ita abia neganai namona be ita manau bona Dirava dekenai ita tabekau. Bona unai dava bada gauna ita laloa bona gimaia totona Iehova ena heduru dekenai ita tabekau diba.

OI KAMONAI HEREVADIA BE ABIDADAMA TAUDIA DEKENAI OI HADIBAIA

Timoteo ese ia abia asainmen be ia sibona totona lasi, to ma haida dekenai treinini do ia henia unai gaukara idia karaia totona. Unai dainai Paulo ese Timoteo ia hagoadaia: “Lau amo oi kamonai hereva be . . . abidadama taudia dekenai oi henia, unai amo idia danu be do idia hegeregere ma haida idia hadibaia totona.” (2 Tim. 2:2) Oibe, Paulo ese Timoteo ia hamaoroa ena Keristani tadikaka amo do diba ia abia, bona ia dibaia gaudia be idia dekenai do ia hadibaia. Namona be hari Keristani kongrigeisen ai elda taudia ta ta idia hekwarahi unai bamona idia karaia totona. Elda tauna namona be gaukara ta dekenai ia dibaia gaudia do ia hunia lasi. To, ma haida ia hadibaia unai amo idia danu ese gaukara idia karaia diba. Ia laloa lasi ma haida edia diba ese iena diba do ia hanaia eiava ia do idia hereaia. Ia ura ia treinia taudia ia durua idia ese laloa kehoa bona laloa maoromaoro karana do idia hahedinaraia, bona lo Keristani taudia ai do idia lao. Unai amo ia treinia “abidadama taudia” be kongrigeisen dekenai heduru bada do idia henia.

Momokani, Timoteo be Paulo amo ia abia revareva namona ia laloa bada. Bona reana Timoteo ese unai sisiba namodia ia duahia loulou bona ena hesiai gaukara lalonai do ia badinaia daladia ia laloa.

Ita ura unai sisiba ita badinaia danu. Edena dala ai? Namona be ita hekwarahi ita abia harihari gauna be lahi bamona ia hururuhururu, ita abia dava bada gauna ita gimaia, bona ita dibaia gaudia be ma haida dekenai ita hadibaia. Unai amo Paulo ese Timoteo dekenai ia hereva bamona, iseda “hesiai gaukara [ita] hagugurua” diba.​—2 Tim. 4:5.