Iehova Lau Hesiai Henia Ena Namo

EGU RUMA BESE MAURINA

Lau be lagani 1934 ai lau vara, egu tama sina be Switzerland amo idia lao Timmins dekenai idia noho, unai be Ontario, Canada ena mining taoni ta. Lagani 1939 bamona ai, egu sinana be Gima Kohorona magasin ia duahia matamaia bona Iehova ena Witnes taudia edia hebou dekenai ia lao. Ia ese lau, egu kakana rua bona tadina foa ia hakaua danu. Daudau lasi murinai, Iehova ena Witnes ta ai ia lao.

Egu tamana be ena abia hidi dekenai ia moale lasi, to egu sinana be hereva momokani ia ura henia bona ena lalona ia hadaia Iehova do badinaia. Bona unai ia karaia noho ena be lagani 1940 lalonai Canada ai, Iehova ena Witnes taudia edia gaukara idia taravatua. Bona hanaihanai ia ese egu tamana ia kara namo henia bona matauraia, ena be sinana dekenai hereva aukadia ia gwauraia. Ena haheitalai namona ese lau, egu kakadia bona tadidia ia durua dainai, hereva momokani ai abia dae. Ai moale badina emai tamana ena kara ia haidaua.

FUL-TAIM HESIAI GUKARA LAU HAMATAMAIA

Lagani 1950 ai, New York City ena Theocracy’s Increase Hebouhebouna dekenai lau lao. Tano idauidau amo idia mai tadikaka taihu ida lau hedavari bona Gilead sikuli amo idia gradueit taudia edia intaviu lau kamonai murinai, unai ese lau ia durua egu hesiai gaukara lau habadaia totona! Bona lau ura bada ful-taim hesiai gaukara lalonai lau vareai. Lau giroa lou neganai, regula painia ena fom lau hahonua. Canada ena brens ofesi be egu revareva ia haloua, bona ia gwau lau bapatiso guna be namo. Unai dainai October 1, 1950 ai, lau bapatiso. Hua tamona murinai, regula painia lau hamatamaia bona Kapuskasing taoni ai, egu asainmen ginigunana lau karaia. Unai taoni be egu ruma bese idia noho gabuna amo ia daudau momokani.

Lagani 1951 ai, brens ofesi ese French gado idia diba Witnes taudia idia boiria Quebec ai, French-gado idia herevalaia provinsi ta dekenai idia lao totona. Unuseniai pablisa be momo lasi. Lau tubu daekau negana amo, French bona English gado lau gaukaralaia, unai dainai unai asainmen lau abia dae bona Rouyn dekenai lau idia siaia. Unai gabu ai ia noho tauna ta lau diba lasi. Matamanai lau hereva bamona, lau dekenai ta ena adres sibona ia noho. To gau ibounai idia namo. Lau bona Marcel be tura namodia ai ai lao, bona Quebec ai lagani foa egu hesiai gaukara lau moalelaia, bena gabeai spesel painia gaukara lau karaia.

GILEAD BONA EGU URA GAUNA IA GUGURU LASI

Quebec ai lau noho neganai, lau moale badina lau idia boiria South Lansing, New York dekenai Gilead ena klas 26 dekenai lau lao totona. February 12, 1956 ai gradueisen murinai, Ghana,b West Africa dekenai lau idia siaia. To lau do lao lasi neganai, Canada dekenai lau giroa “wiki haida” do lau noho ela bona egu laolao ena pepa idia hegaegaelaia.

Toronto dekenai unai pepa lau naria ela bona hua 7 idia ore. Unai nega lalonai, lau be Cripps famili ida lau noho, bona edia natuna kekeni ladana Sheila, lau dibaia. Bona ta ta ai ura henia. To ia dekenai lau maoheni gwauraia neganai, egu visa ia ginidae. Lau bona Sheila be unai ai gurigurilaia murinai, abia hidi ai karaia egu asainmen dekenai lau lao be namo. To abia hidi ai karaia revareva do ai torea noho, bona do ai itaia bema gabeai ai headava diba. Unai be abia hidi badana, to gabeai ai itaia, unai be abia hidi maorona.

Trein, bouti, bona peleini ai lau guia bona hua ta murinai, Accra, Ghana dekenai lau ginidae. Unuseniai lau idia abia hidi distrik naria gaukarana lau karaia totona. Unai dainai Ghana ena gabu momo dekenai lau vadivadi, idia haida be Ivory Coast (hari be Côte d’Ivoire) bona Togoland (hari be Togo) Nega momo, brens ese idia henia motuka amo sibona lau loaloa. Tadikaka taihu vadivadi henia karana lau moalelaia!

Wiken ai, sekit hebouhebou totona asainmen haida lau karaia. Unai nega ai, Assembly Hall ta be lasi. Unai dainai, tadikaka be baubau audia amo guhi idia karaia bona pama raudia idia atoa, dina ena siahu idia koua totona. Aniani gabuna dekenai frisa be lasi dainai, tadikaka ese animal haida idia naria, unai amo hebouhebou dekenai idia mai taudia totona idia alaia bona nadua diba.

Unai hebouhebou negadiai, gau haida ida vara dainai ai kiri. Misinari tadikaka ta, Herb Jennings,c be tok ia henia noho lalonai aniani gabuna amo boromakau ta ia heau raka-lasi. Bena platfom bona helai taudia huanai ia heau lao. Tadikaka Herb be ena hereva ia hadokoa bona animal be ia daradara momokani. To tadikaka goadadia foa ese idia dogoatao bona aniani gabuna dekenai idia abia lao lalonai, helai taudia be edia imana idia patapataia.

Wiki lalodiai, kahirakahira hanuadia dekenai iseda vidio ladana, The New World Society in Action lau hahedinaraia. Unai karaia totona, lau ese au rua dekenai palai kurokurona ta lau kwatua, bena projector amo unai vidio idia itaia. Bona hanua taudia ese idia ura henia bada! Idia momo be edia nega ginigunana muvi ta idia itaia. Muvi lalonai, taunimanima idia bapatiso ena kahana idia itaia neganai, mai goada ida edia imana idia patapataia. Unai muvi idia itaia taudia idia laloparara, tanobada hegegemadai Iehova ena Witnes taudia be lalotamona ai idia noho.

Africa ai lagani rua bamona lau noho murinai, New York City ai lagani 1958 ena intanesinol hebouhebou dekenai lau lao bona lau moale bada. Danu lau moale badina Sheila lau itaia, ia be Quebec amo ia mai, unuseniai spesel painia gaukara ia karaia. Ai be ta ta dekenai revareva ai torea lao mai, to hari ai hedavari lou dainai, ia lau noia lau do ia adavaia bona egu noinoi ia abia dae. Tadikaka Knorrd lau tore henia bona lau nanadaia bema Sheila be Gilead sikuli ia lao diba bona Africa dekenai lau do ia bamoa. Egu noinoi ia abia dae. Dokonai Sheila be Ghana dekenai ia ginidae. October 3, 1959 ai, Accra dekenai ai headava. Ai mamia Iehova ese ai ia hanamoa, badina Ia ai atoa guna.

CAMEROON AI HESIAI GAUKARA AI KARAIA HEBOU

Lagani 1961 lalonai, Cameroon ena siti dekenai ai idia siaia lao. Tadikaka ese lau idia noia brens ofesi matamata ta ai haginia totona, unai dainai lau bisi momokani. Brens ofesi lau naria dainai, gau momo lau dibaia be namo. Bena lagani 1965 lalonai, ai davaria Sheila be ia rogorogo. Lau gwau diba, ai abia dae lasi ai be tama bona sina ai do ai lao. To mai moale ida unai maduna matamata ai huaia totona, Canada dekenai ai ura giroa lou neganai sivarai dikana ta ai abia.

Sheila ena bogana ai natuna ia mase. Bona Doketa ese ai idia hamaoroa emai natuna be mero. Unai be lagani 50 gunanai ia vara gauna, to ai laloaboio diba lasi. Ena be ia vara gauna dainai ai lalohisihisi bada, to unuseniai emai asainmen ai karaia noho, bona unai ai laloa bada.

Cameroon ai nega momo tadikaka taihu be dagedage idia davaria, badina tuari lalonai idia vareai lasi. Bona gavamani taudia edia eleksen neganai, unai dagedage karana ia bada momokani. May 13, 1970 lalonai, ai laloa do ia vara lasi gauna ta ia vara Iehova ena Witnes taudia edia gaukara idia taravatua. Gavamani ese emai brens ofesi matamatana idia biagua, unai be hua 5 sibona ai gaukaralaia. Unai wiki tamona ai, misinari taudia ibounai, lau bona Sheila danu, be emai gabu dekenai idia siaia giroa. Emai tadikaka taihu ai rakatania dainai ai lalohisihisi, badina idia ai lalokau henia bada bona idia dekenai do ia vara gauna dainai ai lalohekwarahi.

France ena Betele ai hua 6 ai noho. Unuseniai lau gaukara goada Cameroon ai idia noho tadikaka taihu lau naria totona. Unai lagani tamona, December ai, Nigeria ena brens dekenai ai idia siaia lao, unai brens be Cameroon ena gaukara ia naria matamaia. Nigeria ai, tadikaka taihu ese mai lalokau ida ai idia welkam henia, bona ai moale unuseniai lagani haida ai gaukara.

ABIA HIDI BADANA

Lagani 1973 ai, abia hidi badana ta ai karaia. Sheila be gorere badadia haida ia haheaukalaia. New York ai hebouhebou totona ai lao neganai, ia tai bona lau ia hamaoroa: “Lau hegeregere lasi inai gaukara lau karaia noho totona! Nega momo lau gorere dainai, lau hesiku.” Ia be lau ida West Africa ai, lagani 14 mai kahana, ai gaukara hebou. Mai abidadama ida ena hesiai gaukara ia karaia dainai lau moale, to senisi haida ai karaia be namo. Unai hekwakwanai ai herevalaia bona nega bada lalonai ai gurigurilaia murinai, abia hidi ai karaia Canada dekenai do ai giroa lou, unai amo ena helt totona heduru ai tahua diba. Emai misinari bona ful-taim hesiai gaukara do ai rakatania totona, ai karaia abia hidi be disisen aukana.

Canada dekenai ai giroa lou neganai, egu turana namona ta ena kampani dekenai lau gaukara ia be motuka ia hoihoilaia, unai be Toronto ena not kahana ena taoni dekenai ia noho. Ruma ta ai rentaia, secondhand dekenai ruma kohudia ai hoia bona ai noholaia mauri matamata totona ai abitorehai lasi. Ai ura kohu momo lasi maurina ai noholaia, unai amo dala ia kehoa neganai, ful-taim hesiai gaukara do ai karaia lou. Bona ai hoa badina ai laloa gauna be ia vara haraga.

Norval, Ontario ai, Assembly Hall matamata haginia totona, Saturday ai konstraksen gaukara lau durua. Daudau lasi murinai, lau idia abia hidi Assembly Hall naria gaukarana lau karaia. Sheila ena helt ia namo ia lao dainai ai mamia inai asainmen matamata ia karaia diba. Unai dainai June 1974 ai, Assembly Hall ena ruma ta dekenai ai noho. Ai moale bada ful-taim hesiai gaukara ai karaia lou!

Sheila ena helt ia namo noho dainai ai moale bada. Lagani rua murinai, sekit gaukara ena asainmen ai abia dae. Bona Canada ena provins ta, Manitoba dekenai sekit gaukara ai karaia, unai be keru gabuna. To, tadikaka taihu edia hebamo karana ai moalelaia bada. Ai dibaia gauna be herevana edeseniai hesiai gaukara ita karaia, to gau badana be Iehova ita hesiai henia noho.

MAI ANINA BADA GAUNA TA LAU DIBAIA

Lagani haida lalonai sekit gaukara ai karaia murinai, lagani 1978 ai, Canada ena Betele dekenai ai idia boiria. Daudau lasi murinai, gau ta lau lalohisihisilaia, to unai amo mai anina bada gauna ta lau dibaia. Lau dekenai asainmen ta idia henia, unai be Montreal ena spesel hebouna ta ai, tok ta ena lata hora ta mai kahana do lau henia. To, egu tok ese kamonai taudia edia lalona ia veria lasi bona Service Department amo tadikaka ta ese lau ia sisiba henia. Oibe, unai negai bema lau laloparara lau be tok henia tauna namona lasi. To unai sisiba lau abia dae lasi. Emai herevahereva ia namo lasi, bona lau mamia ena kara be ia auka bona lau ia hanamoa lasi. Lau abia sisiba bona sisiba ia henia tauna dekenai lalohadai maorona lau abia lasi.

Dina haida murinai, Brens Komiti ena memba ta be lau dekenai ia vara gauna ia herevalaia. Bona ia lau hamaoroa tadikaka ena sisiba lau abia dae lasi bona sori herevana lau gwauraia. Gabeai lau ia sisiba henia tadikakana lau hereva henia. Bona egu dika ia gwauatao. Unai ekspiriens amo manau karana lau dibaia, bona unai do lau laloaboio lasi. (Aon. 16:18) Nega momo Iehova dekenai unai lau gurigurilaia bona egu lalona lau hadaia sisiba abia karana dekenai lalohadai maorona do lau abia.

Hari Canada ena Betele ai, lagani 40 mai kahana lau noho, bona lagani 1985 amo Brens Komiti gaukara lau karaia. February 2021 ai, egu adavana lalokauna Sheila ia mase. Ia lau reaia bada, bona lau danu be egu helt ia namo momokani lasi. To Iehova ena hesiai gaukara lalonai lau bisi bona moale dainai, ‘idia vara hekwakwanai lau lalodia lasi.’ (Had. 5:20) Ena be egu mauri ai hekwakwanai momo lau davaria, to gau namodia momo dainai lau moale bada. Bona Iehova lau atoa guna dainai, lagani 70 lalonai ful-taim hesiai gaukara lau karaia be hahenamo badana. Lau guriguri iseda matamata tadikaka bona taihu ese Iehova do idia atoa guna, badina lau abia dae momokani hahenamo momo do idia abia bona do idia moale, unai be Iehova hesiai karana amo ia mai.