“Dirava Be Edeseniai?”

DIKA IDIA VARA NEGANAI, NEGA HAIDA INAI BAMONA OI LALOA, ‘DIRAVA BE EDESENIAI?’ EIAVA EMU MAURI LALONAI, HEKWAKWANAI BADANA TA IA VARA DAINAI OI HENANADAI DIRAVA ESE OI IA LALOA, A?

Reana emu hemami be Sheila ena bamona, ia be United States dekenai ia noho kekeni ta. Ia be tomadiho ia laloa bada ruma besena ta ai ia tubu daekau, unai dainai ia gwau: “Lau maragi negana amo, Dirava lau laloa bada badina ia be eda Havaraia Tauna. To, lau mamia lau be ia amo lau daudau. Lau mamia lau ia itaia noho, to reana gabu daudau ta amo. Lau mamia Dirava be lau ia inai henia lasi, to lau abia dae lasi Ia ese lau ia laloa bada.” Dahaka dainai Sheila ia daradara? Ia gwau: “Egu ruma bese be dika momo idia davaria, bona toana be Dirava ese ai ia durua lasi.”

Sheila hegeregerena, oi abia dae Siahu Ibounai Diravana be ia noho. To, reana do oi laloa ia be oi ia laloa bada eiava lasi. Kara maoromaoro tauna Iobu, be Havaraia Tauna ena siahu bona aonega ia abidadama henia, to ia daradara danu. (Iobu 2:3; 9:4) Iobu be hisihisi momo ia davaria bona heduru ta ia abia lasi neganai, Dirava ia nanadaia: “Badina dahaka oiemu vairana, be lau dekena amo oi hunia noho? Badina dahaka oi dekenai tuari gwauraia tauna bamona lau oi halaoa?”​—Iobu 13:24.

Baibel be dahaka ia gwau? Dika idia vara neganai Dirava do ita bleim, a? Hamomokania gaudia ese idia hahedinaraia, Dirava be taunimanima ibounai bona ita ta ta, ia laloa bada, a? Edena dala ai ita ta ta do ita diba, Dirava ese ita karaia gaudia ia dibaia, eda mauri ia lalopararalaia, eda hisihisi ia mamia, o hekwakanai ita davaria neganai ita ia durua?

Atikol gabedia ai do ita itaia, edena dala ai havaraia gaudia ese Dirava ena henari karana ia hahedinaraia. (Roma 1:20) Bena Baibel ese Dirava ena henari karana ia herevalaia dalana do ita dibaia. Hanaihanai Dirava ese ia havaraia gaudia bona ena Hereva amo ia oi “diba” neganai, do oi abia dae momokani, ia ese oi “ia laloa bada.”​—1 Ioane 2:3; 1 Petero 5:7.