Iehova Ena Imana be Ia Kwadogi Lasi

1. Mose ese Israela taudia be Aigupito amo ia hakaua raka-lasi neganai, edena dala ai ia hahedinaraia Iehova dekenai ia tabekau?

HEBERU bukana ese Iehova idia abidadama henia taudia momo ia herevalaia, idia ta be Mose. (Heb. 3:2-5; 11:23-25) Ia ese Israela taudia be Aigupito amo ia hakaua raka-lasi neganai, abidadama ia hahedinaraia. Ia be Farao bona ena tuari oreana dekenai ia gari lasi. Mose be Iehova dekenai ia tabekau dainai, taunimanima be Davara Kakakakana amo ia hakaua hanai bona gabeai taunimanima lasi gabuna dekenai ia hakaudia lao. (Heb. 11:27-29) Israela taudia momo idia daradara bema Iehova ese idia do ia naria, to Mose be Iehova dekenai ia tabekau noho. Mose ena abidadama dainai Iehova ese tano kaukauna ai, hoa dalanai taunimanima dekenai aniani bona ranu ia henia.a—Eso. 15:22-25; Sal. 78:23-25.

2. Dahaka dainai Dirava ese Mose ia nanadaia: “Iehova ena imana be ia kwadogi, a”? (Numera 11:21-23)

² Iehova ese Israela taudia be Aigupito taudia amo ia ruhaia, bona lagani ta bamona murinai, Mose ia daradara matamaia, bema Iehova be ia hegeregerena ena taunimanima dekenai vamu ia henia totona. Taunimanima milioni momo be tano kaukauna ai idia kamepa. To Iehova ese Mose ia haere henia: “Iehova ena imana be ia kwadogi, a?” (Numera 11:21-23 duahia.) Inai hereva, “Iehova ena imana” ena anina be, Dirava ena lauma helaga eiava iena gaukara siahuna. Unai dainai ita gwau diba, Iehova be Mose ia hamaoroa: ‘Lau gwauraia gaudia ibounai lau karaia diba.’

3. Dahaka dainai Mose bona Israela taudia edia sivarai ita laloa be namo?

³ Nega ta oi laloa bema Iehova ese oi bona emu ruma bese be tauanina dalanai do ia naria, a? Reana unai bamona oi laloa eiava lasi, to namona be Mose bona Dirava dekenai idia tabekau lasi Israela taudia edia sivarai ita laloa. Baibel ena hakaua herevadia ese iseda abidadama do ia hagoadaia bona do ita diba, Iehova ena imana be ia kwadogi lasi.

MOSE BONA ISRAELA TAUDIA AMO DIBA ABIA

4. Dahaka dainai Israela taudia momo idia daradara bema Iehova ese edia dabu gaudia do ia henia?

⁴ Dahaka dainai Israela taudia momo idia daradara matamaia bema Iehova be edia dabu gaudia do ia henia? Israela besena be Aigupito idia rakatania bona gwauhamata tanona dekenai idia lao lalonai, “idau taudia momo herea” be Israela taudia idia bamoa. (Eso. 12:38; Deu. 8:15) Unai idau bese taudia be idia hesiku mana idia ania totona, unai dainai idia maumau matamaia, bona Israela taudia momo idia maumau danu. (Num. 11:4-6) Idia be Aigupito ai idia ania aniani idia laloa matamaia. Mose be taunimanima ese idia doria dainai, ia laloa idia dekenai vamu ia henia be namo, to ia diba lasi edena bamona unai do ia karaia.—Num. 11:13, 14.

5-6. Israela taudia be idau bese taudia idia badinaia karana amo dahaka ita dibaia?

⁵ Idau bese taudia be Iehova ese ia henia gaudia idia laloa bada lasi, bona Israela taudia be unai bamona idia laloa matamaia. Ita dekenai unai ia vara diba. Ita bamoa taudia be tanikiu karana idia hahedinaraia lasi neganai, ita danu be Iehova ese ia henia gaudia do ita laloa bada lasi. Unai do ia vara bema guna ita abia gaudia ita laloa lou matamaia, eiava ma haida edia kohu dekenai ita mama. To ena be iseda noho dalana be edena bamona, namona be ita abia dae ita dekenai idia noho gaudia be hegeregere bona do ita moale.

⁶ Namona be Israela taudia idia laloatao, Dirava ese idia ia hamaoroa bema edia noho gabuna matamata dekenai idia ginidae, gau namodia momo do idia moalelaia. Unai gwauhamata be taunimanima lasi gabuna ai ia hagugurua lasi, to gwauhamata tanona dekenai ia hagugurua. Unai hegeregerena, namo lasi hari ita abia lasi gaudia totona ita laloa momo, to namona be tanobada matamata dekenai Iehova ese ia gwauhamata do ia henia gaudia ita laloa bada. Danu iseda abidadama Iehova dekenai ia hagoadaia Baibel siridia ita laloa dobu be namo.

7. Dahaka dainai ita diba momokani Iehova ena imana be kwadogi lasi?

⁷ To, reana do oi laloa dahaka dainai Dirava ese Mose dekenai inai henanadai ia henia: “Iehova ena imana be ia kwadogi, a?” Iehova ia ura Mose be ena imana ena goada do ia laloa, to unai sibona lasi, Iehova ia ura ia karaia diba gaudia danu do ia laloa. Ena be Israela taudia be taunimanima lasi gabuna ai idia noho, to Dirava ese idia dekenai vamu momo ia henia diba. Dirava be ena “imana goadana amo” ena siahu ia hahedinaraia. (Sal. 136:11, 12) Unai dainai, namona be ita daradara lasi Iehova be ena imana goadana amo ita ia durua diba.—Sal. 138:6, 7.

8. Edena dala ai taunimanima lasi gabuna ai idia noho taudia edia kara ita badinaia lasi? (Laulau itaia danu.)

⁸ Iehova ia gwauhamata hegeregerena, iena taunimanima dekenai vamu momo ia henia. To Israela taudia be unai hoa karana dainai Dirava idia tanikiu henia lasi. Idia momo be mataganigani taudia ai idia lao. Idia ese dina bona hanuaboi ai, kibi manu momo idia gogoa. Iehova be “aniani totona idia mataganigani taudia” dekenai ia badu momokani, bona idia ia panisia. (Num. 11:31-34) Unai sivarai amo diba ita abia. Namona be mataganigani karana dekenai ita naria namonamo. Ena be ita be taga taudia eiava ogogami taudia, to mai anina bada gauna be iseda hetura karana Iehova bona Iesu ida ita hagoadaia be namo, unai amo guba dekenai iseda kohu ita haboua diba. (Mat. 6:19, 20; Luka 16:9) Bema unai bamona ita karaia, do ita diba momokani Iehova ese iseda dabu gaudia do ia henia.

9. Dirava ena heduru karana dekenai dahaka ita abia dae momokani?

⁹ Hari inai negai, Iehova be ena imana ia henia ena taunimanima ia durua totona. To, unai ese ia hahedinaraia moni eiava aniani dekenai do ita dabu lasi, a? Lasi.b To Iehova be ita do ia rakatania lasi. Ia ese hahetoho idauidau amo ita do ia durua. Edena dala ai ita hahedinaraia Iehova dekenai ita tabekau iseda dabu gaudia ia henia totona. Mani dala rua ita itaia: (1) Bema moni dalanai ita dabu bona (2) vaira nega totona ita laloa momo.

BEMA MONI DALANAI ITA DABU

10. Dahaka dainai moni ena hekwakwanai ita davaria diba?

¹⁰ Inai nega oromana ena dokona ia kahirakahira noho dainai, moni ena hekwakwanai do ia bada ia lao. Politikol edia heiriheiri karadia, tuari, disasta, eiava idia hanaia gorere matamatadia ese moni ena hekwakwanai ia havaraia, eiava moni gaukara, kohu, bona ruma ita haboioa. Reana iseda noho gabuna ai moni gaukara matamata ita tahua be namo eiava iseda famili ida gabu ma ta dekenai ita lao be namo, unai amo tauanina dalanai idia ita durua diba. Abia hidi ita karaia neganai, edena bamona do ita hahedinaraia Iehova ena imana dekenai ita tabekau?

11. Dahaka ese oi ia durua diba moni ena hekwakwanai oi hanaia totona? (Luka 12:29-31)

¹¹ Gau badana be Iehova dekenai emu hekwakwanai ibounai oi gwauraia. Unai ese oi do ia durua bada. (Aon. 16:3) Ia oi noia aonega do ia henia abia hidi namodia oi karaia totona, bona gau haida dekenai oi “lalohekwarahi lasi” totona lalomaino do ia henia. (Luka 12:29-31 duahia.) Dirava oi noia oi do ia durua unai amo do oi laloa oi dekenai idia noho gaudia be hegeregere. (1 Tim. 6:7, 8) Iseda pablikeisen ai tahua gaukara oi karaia, unai amo moni ena hekwakwanai negadia ai do oi karaia gaudia do oi diba. Momo be jw.org ai idia noho gaudia ese ia durua moni ena hekwakwanai idia hanaia totona.

12. Keristani tauna ta ese ena ruma bese totona abia hidi namona ia karaia totona, edena henanadai haida ese ia do ia durua?

¹² Haida be gabu ma haida dekenai moni gaukara idia abia dainai edia famili idia rakatania. To momo be gabeai idia laloparara unai be abia hidi namona lasi. Moni gaukara matamata oi do abia lasi neganai, ena pei sibona oi laloa lasi, to emu hetura karana Iehova ida oi laloa danu. (Luka 14:28) Sibona oi nanadaia: “Bema egu adavana amo lau noho daudau, dahaka do ia vara? Hebou bona haroro gaukara dekenai do lau lao bona tadikaka bona taihu do lau bamoa diba, a? Bema oi be mai emu natudia, oi sibona dekenai inai mai anina bada henanadai oi henia: ‘Bema lau be egu natudia ida lau noho lasi, edena dala ai “Iehova ena matahakani bona sisiba amo” idia do lau hadibaia?’” (Efe. 6:4) Namona be Dirava ena lalohadai ese oi ia hakaua. Baibel ena hakaua herevadia idia badinaia lasi famili eiava turadia edia hereva oi badinaia lasi. Tony be Western Asia ai ia noho, ia be tano ma ta ai moni gaukara totona idia ura siaia. To unai ia gurigurilaia bona ena adavana ida ia herevalaia murinai, unai moni gaukara ia dadaraia bona moni idia gaukaralaia namonamo.c Tony be unai gaudia ia laloa lou neganai, ia gwau: “Lau moale bada badina taunimanima haida lau durua Iehova idia diba totona, bona emai natudia be hereva momokani lalonai idia goada noho. Lau bona egu famili ese ai dibaia gauna be, bema Mataio 6:33 ena hereva ai badinaia, Iehova ese ai do ia naria.”

BEMA VAIRA NEGA TOTONA ITA LALOA MOMO

13. Hari dahaka gau haida ita karaia diba, unai amo ita buruka neganai iseda moni be hegeregere?

¹³ Danu iseda buruka negana ita laloa neganai, unai ese Iehova ena imana eiava heduru dekenai ita tabekau karana ia tohoa diba. Baibel ese ita ia hagoadaia do ita gaukara goada, unai amo vaira nega ena dabu gaudia totona ita hegaegae diba. (Aon. 6:6-11) Bema hegeregere, vaira nega totona moni haida ita haboua diba. Oibe, moni ese ita ia durua diba. (Had. 7:12) To, ita ura lasi iseda mauri ai moni be mai anina bada gauna ai ita halaoa.

14. Vaira nega totona ita palani neganai, dahaka dainai Heberu 13:5 ena hereva ita laloa?

¹⁴ Iesu ese ia gwauraia sivarai ta amo ia hahedinaraia bema ta be moni ia haboua, to Iehova ese ia laloa bada gaudia ia karaia lasi, ia be kavakava. (Luka 12:16-21) Ita diba lasi kerukeru be dahaka do ia vara. (Aon. 23:4, 5; Iam. 4:13-15) Danu Iesu ia gwau namona be ena murinai idia raka taudia ibounai be mai ura ida edia kohu ibounai “idia dadaraia.” (Luka 14:33) Iudea ai idia noho Keristani taudia ginigunadia be edia kohu idia haboioa, to idia moale noho. (Heb. 10:34) Hari inai negai danu, iseda tadikaka momo be politikol karadia lalonai idia vareai lasi dainai edia moni eiava kohu idia haboioa. (Apok. 13:16, 17) Dahaka ese idia ia durua unai idia karaia totona? Idia be Iehova ena gwauhamata idia abidadama henia momokani, ia gwau: “Lau ese umui do lau negea lasi, bona umui do lau rakatania lasi.” (Heberu 13:5 duahia.) Unai dainai iseda goada hegeregerena vaira nega totona moni sisina ita haboua diba. Bona hekwakwanai haida idia vara kava neganai, ita abia dae Iehova ese ita do ia durua.

15. Keristani tama sina be edia natudia dekenai dahaka lalohadai maorona idia abia be namo? (Laulau itaia danu.)

¹⁵ Tano haida dekenai headava taudia haida be natudia idia havaraia, unai amo idia buruka neganai, natudia ese idia naria diba. Baibel ese ia hahedinaraia, tama sina ese edia natudia edia dabu gaudia idia henia be namo. (2 Kor. 12:14) Momokani, tama sina haida idia buruka idia lao neganai, heduru idia abia be namo, bona natudia momo idia moale unai idia karaia totona. (1 Tim. 5:4) Keristani tama sina idia diba edia natudia idia naria neganai, tauanina dalana ai idia do idia naria, to tama sina do idia moale bada bema edia natudia be Iehova ena hesiai taudia ai idia lao.—3 Ioa. 4.

16. Edena dala ai tama sina ese edia natudia idia durua diba vaira nega ai moni dalanai sibona idia naria totona? (Efeso 4:28)

¹⁶ Emu natudia oi hadibaia vaira nega ai sibona idia naria dalana idia dibaia totona, idia dekenai oi hahedinaraia, Iehova dekenai oi tabekau. Emu natudia idia maragi neganai, oi hahedinaraia gaukara goada karana be mai anina bada. (Aon. 29:21; Efeso 4:28 duahia.) Natudia idia bada idia lao neganai, idia umui durua idia sikuli namonamo totona. Keristani tama sina be edia tahua gaukara amo idia dibaia hakaua herevadia amo edia natudia idia durua, unai amo abia hidi do idia karaia dahaka sikuli do idia abia. Tama sina edia tahua gauna be edia natudia idia durua vaira nega ai sibona idia naria bona Iehova ena hesiai gaukara idia karaia diba.

17. Dahaka ita diba momokani?

¹⁷ Iehova ena abidadama hesiai taudia idia diba, ia ese edia dabu gaudia do ia henia. Inai nega oromana ena dokona ia kahirakahira dainai, ita diba Iehova dekenai iseda abidadama karana do ia tohoa. To ena be dahaka ia vara, namona be iseda lalona ita hadaia Iehova dekenai ita tabekau. Ia ese ena siahu do ia gaukaralaia iseda dabu gaudia ia henia totona. Ita diba momokani Iehova be ena imana goadana amo hanaihanai ita do ia durua.