Abidadama amo Ita Raka Noho

1. Aposetolo Paulo be ena mauri ia laloa lou neganai, dahaka dainai ia moale?

APOSETOLO Paulo ia diba ia do idia hamasea negana ia kahirakahira vadaeni, to ena mauri ai ia karaia gaudia ia laloa lou neganai, ia moale. Unai dainai ia gwau: “Heau helulu lau haorea vadaeni, bona Keristani abidadama lau badinaia vadaeni.” (2 Tim. 4:6-8) Paulo be ena Keristani hesiai gaukara lalonai abia hidi namodia ia karaia bona ia mamia Iehova be ia dekenai ia moale. Ita danu ita ura abia hidi namodia ita karaia bona Dirava ena lalonamo ita abia. Edena dala ai unai ita karaia diba?

2. Abidadama amo oi raka ena anina be dahaka?

² Paulo be ia sibona bona abidadama Keristani taudia ia herevalaia neganai, ia gwau: “Ita be abidadama amo ita raka, to ita itaia gaudia amo lasi.” (2 Kor. 5:7) Paulo ena hereva ena anina be dahaka? Baibel ai inai hereva “raka” idia gaukaralaia neganai, nega haida ena anina be ta ese ia abia hidi mauri dalana ia herevalaia. Unai dainai bema ta be abidadama amo ia raka lasi, anina be ia be ia itaia gaudia bona kamonai gaudia hegeregerena abia hidi ia karaia. To, bema tau ta be abidadama amo ia raka, ia be Iehova Dirava ena ura hegeregerena abia hidi ia karaia. Iena kara ese ia hahedinaraia ia abia dae Baibel ena sisiba ia badinaia neganai, Dirava ese davana namona do ia henia, hari bona vaira negai danu.—Sal. 119:66; Heb. 11:6.

3. Abidadama amo oi raka neganai, dahaka namo oi davaria? (2 Korinto 4:18)

³ Momokani, nega haida ita itaia, kamonai bona mamia gaudia hegeregerena abia hidi ita karaia. To bema unai gaudia sibona dekenai ita tabekau, hekwakwanai do ita davaria diba. Dahaka dainai? Badina ita itaia bona kamonai gaudia be nega haida ita idia koia diba, bona Iehova ese ia ura henia lasi gauna ta ita karaia diba. (Had. 11:9; Mat. 24:37-39) To abidadama amo ita raka neganai, “Lohiabada ese ia abia dae” gaudia hegeregerena abia hidi do ita karaia. (Efe. 5:10) Dirava ena sisiba ita badinaia neganai, ia ese lalomaino do ia henia bona do ita moale. (Sal. 16:8, 9; Isa. 48:17, 18) Bona abidadama amo ita raka noho neganai, vaira nega ai mauri hanaihanai do ita abia.—2 Korinto 4:18 duahia.

4. Edena bamona do ita diba bema ita be abidadama amo ita raka eiava ita itaia gaudia amo ita raka?

⁴ Edena bamona do ita diba bema ita be abidadama amo ita raka eiava ita itaia gaudia amo ita raka? Inai henanadai ita laloa diba: Dahaka gaudia amo abia hidi lau karaia? Abia hidi ita karaia neganai, ita itaia gaudia sibona ese ita idia hakaua, a? Eiava Iehova ita abidadama henia bona ena sisiba ese ita ia hakaua, a? Mauri ai idia vara mai anina bada gaudia toi, hegeregere moni gaukara, ta ia ura headava, bona orea amo hakaua hereva ita abia neganai abidadama amo ita raka noho dalana do ita herevalaia. Danu Iehova ena hakaua dalana dekenai ita tabekau daladia do ita herevalaia. Unai gau ta ta totona dala haida do ita herevalaia, unai amo abia hidi namodia ita karaia diba.

MONI GAUKARA ITA ABIA HIDI NEGANAI

5. Moni gaukara ita abia hidi neganai, dahaka ita laloa be namo?

⁵ Ita ibounai ita ura ita sibona bona iseda ruma bese totona iseda dabu gaudia ita abia. (Had. 7:12; 1 Tim. 5:8) Moni gaukara haida edia pei be namo. Bona unai ese gaukara tauna ia durua diba dina ta ta ena dabu gaudia ia abia bona vaira nega totona moni haida ia haboua diba. To gaukara haida edia pei be hegeregere lasi dainai ta be ena ruma bese ena dabu gaudia sibona do ia abia diba. Moni gaukara ta ita ura abia hidi neganai, do ita abia moni ena bada ita laloa. Bema ta be unai gauna sibona ia laloa, ia be abidadama amo ia raka lasi.

6. Moni gaukara ta ita abia hidi neganai, edena dala ai abidadama amo ita raka diba? (Heberu 13:5)

⁶ Bema abidadama ai ita raka, ita abia hidi moni gaukara dekenai Iehova ida iseda hetura karana do ita laloa danu. Ita sibona ita nanadaia diba: ‘Inai moni gaukara lau karaia neganai, Iehova ese ia inai henia gaudia do lau karaia, a?’ (Aon. 6:16-19) ‘Hebou lao henia karana bona haroro gaukara do lau reaia momo, a?’ (Fili. 1:10) Bema unai henanadai ta ta dekenai emu haere be oibe, aonega karana be unai moni gaukara oi dadaraia, ena be moni gaukara davaria be auka. Ita be abidadama amo ita raka, bona ita karaia abia hidi ese ia hahedinaraia ita abia dae Iehova be ita do ia durua iseda dabu gaudia ita abia totona.—Mat. 6:33; Heberu 13:5 duahia.

7-8. Edena dala ai South America ai ia noho tadikaka be abidadama amo ia raka? (Laulau itaia danu.)

⁷ South America ai, tadikaka ta Javiera ia diba, abidadama amo ia raka be mai anina bada. Ia gwau: “Pei bada moni gaukara ta totona lau aplai, ena pei be guna lau karaia gaukara ena pei be nega rua ia hanaia bona unai gaukara do lau moalelaia.” To, Javier ia ura bada painia gaukara do ia karaia. Ma ia gwau: “Lau idia hamaoroa bosi badana ese lau do ia intaviu henia. Intaviu totona lau do lao lasi neganai, heduru totona lau guriguri, lau diba Iehova be egu namo ia diba. Lau ura gaukara lalonai maduna ma haida do lau abia bona moni momo lau abia, to lau ura lasi unai moni gaukara ese lau ia koua egu hesiai gaukara lau habadaia totona.”

⁸ Javier ia gwau: “Intaviu lalonai, bosi ese lau ia hamaoroa, nega momo gaukara lalonai do lau ovataim. Mai hemataurai ida ia lau hamaoroa egu tomadiho karana dainai unai bamona do lau karaia lasi.” Oibe, Javier ese unai gaukara ia dadaraia. Wiki rua murinai, painia gaukara ia karaia matamaia. Bona unai lagani lalonai gabeai pat-taim moni gaukara ta ia davaria. Ia gwau: “Iehova be egu guriguri ia kamonai bona moni gaukara ta ia henia, bona ena painia gaukara ena sediual dekenai ia hegeregere. Lau moale bada badina lau karaia moni gaukara amo nega ia noho Iehova bona egu tadikaka lau durua totona.”

9. Trésor ena ekspiriens amo dahaka oi dibaia?

⁹ Dahaka do ita karaia bema ita diba ita karaia moni gaukara be ita ia koua mai abidadama ida ita raka totona? Congo ai ia noho tadikaka, Trésor ena ekspiriens ita laloa. Ia gwau: “Egu moni gaukara matamata lau ura henia. Bona lau abia pei be guna lau karaia gaukara ena pei be nega toi ia hanaia, bona lau idia matauraia.” To, Trésor be nega momo hebou ia reaia badina ovataim gaukara momo ia karaia. Danu nega momo gaukara taudia ese idia doria koikoi karadia haida ia karaia totona. Trésor ia ura unai moni gaukara ia rakatania, to ia lalohekwarahi badina gabeai moni gaukara ta do ia davaria lasi. Dahaka ese ia durua? Ia gwau: “Habakuku 3:17-19 ese lau ia durua dainai, lau laloparara ena be unai moni gaukara lau rakatania bona moni momo lau abia lasi, to Iehova ese lau do ia naria. Vadaeni lau risain.” Ia gwau: “Moni gaukara ena biagudia momo idia laloa, gaukara mai ena pei badana ese ta do ia doria ena ruma bese bona tomadiho karadia ia laloa bada lasi totona. Lau moale badina egu hetura karana Iehova bona egu ruma bese ida lau gimaia. Lagani ta murinai, Iehova ese lau ia durua dainai moni gaukara namona ta lau davaria, bona ena pei be hegeregere egu dabu gaudia lau abia totona bona nega ia noho egu tomadiho karadia lau karaia totona. Iehova ena ura ita atoa guna neganai, reana nega haida moni dalanai do ita dabu, to Iehova ese ita do ia naria.” Oibe, bema Iehova ena sisiba bona gwauhamata dekenai ita tabekau, ita be abidadama amo do ita raka noho bona ia ese ita do ia hanamoa.

TA IA URA HEADAVA NEGANAI

10. Ta ia ura adavaia tauna ia abia hidi neganai, dahaka gaudia do ia laloa?

¹⁰ Headava be Iehova amo ia mai harihari gauna, bona ta ia ura headava neganai, unai be kerere lasi. Taihu ta be ia ura adavaia tauna ia abia hidi neganai, reana tadikaka ena kara, ena toana, ma haida ese ia idia laloa dalana, moni ia gaukaralaia dalana, ruma bese ena maduna ia huaia dalana, bona taihu ia kara henia dalana do ia laloa.b Unai gaudia ibounai be mai anina bada. To, bema taihu ese unai gaudia sibona ia laloa, ia be ia itaia gaudia amo ia raka noho diba.

11. Ta ia ura headava neganai, edena dala ai abidadama amo ia raka diba? (1 Korinto 7:39)

¹¹ Iseda singul tadikaka bona taihu be idia ura adavaia tauna idia abia hidi totona, Iehova ena sisiba idia badinaia neganai, ena lalona idia hamoalea! Hegeregere, idia ese inai sisiba idia badinaia, idia naria ela bona edia “matamata negana ia hanaia,” bena ta idia tura henia diba. (1 Kor. 7:36) Idia ura adavaia tauna be Iehova ese headava taudia totona ia gwauraia kara namodia ia hahedinaraia. (Aon. 31:10-13, 26-28; Efe. 5:33; 1 Tim. 5:8) Bema Witnes lasi tauna be idia ta ia ura henia, unai tadikaka eiava taihu ese 1 Korinto 7:39 ena sisiba ia badinaia be namo, “Lohiabada lalonai sibona” do ia headava. (Duahia.) Idia be abidadama ai idia raka, badina idia diba Iehova sibona ese hanaihanai idia do ia durua.—Sal. 55:22.

12. Rosa ena ekspiriens amo dahaka ita dibaia?

¹² Colombia ai ia noho painia taihu ta Rosa ena ekspiriens ita laloa. Gaukara gabuna ai Witnes lasi tauna ta ese ia ura henia, bona Rosa ese ia ura henia danu. Ia gwau: “Toana be ia be tau namona. Iena noho gabuna ai taunimanima ia durua bona ena helt ia laloa bada. Lau ia kara henia dalana lau ura henia. Lau ura unai bamona tauna lau adavaia, to ia be Witnes tauna lasi.” Ma ia gwau: “Lau ura ta lau tura henia, unai dainai ia auka ia do lau dadaraia totona. Unai nega ai, lau mamia lau be sibona lau noho bona lau ura headava, to orea lalonai turana ta lau davaria lasi.” To, Rosa be ia itaia gaudia sibona ia laloa lasi. Ia laloa bema unai gaukara tauna ia tura henia, ena hetura karana Iehova ida ia hadikaia diba. Unai dainai, taihu ese unai tauna bamoa karana ia hadokoa bona Iehova ena hesiai gaukara lalonai ia bisi. Daudau lasi murinai, ia idia boiria Basileia Evanelia Ena Sikuli dekenai ia lao totona, bona hari ia be spesel painia gaukara ia karaia. Rosa ia gwau: “Iehova ese hahenamo momo ia henia bona lau moale bada.” Nega momo iseda ura gaudia ita ura badinaia dainai do ia auka Iehova ena ura dalana ita badinaia totona, to Iehova ena laloa dalana ese ita ia hakaua neganai, hanaihanai namo do ita davaria.

OREA AMO HAKAUA HEREVA ITA ABIA NEGANAI

13. Orea amo hakaua herevadia ita abia neganai, dahaka ese ita do ia durua abidadama amo ita raka noho totona?

¹³ Nega momo elda taudia, sekit naria taudia, brens ofesi, eiava Hakaua Oreana amo hakaua herevadia ita abia unai ese ita ia durua Iehova ita hesiai henia totona. To bema ita abia hakaua herevana ita lalopararalaia lasi, dahaka do ita karaia? Reana do ita daradara bema unai hakaua herevana ese namo do ia havaraia eiava lasi. Danu unai hakaua hereva idia henia tadikaka edia kerere do ita laloa matamaia.

14. Orea amo hakaua herevadia ita abia neganai, dahaka ese ita do ia durua abidadama amo ita raka totona? (Heberu 13:17)

¹⁴ Abidadama amo ita raka neganai, ita abia dae Iehova ese ena orea ia hakaua noho bona iseda mauri ai idia vara gaudia ia diba. Unai dainai, lalohadai maorona bona hakaua herevadia ita badinaia haraga. (Heberu 13:17 duahia.) Ita laloparara, hakaua herevadia ita badinaia neganai, unai ese kongrigeisen lalonai lalotamona ia havaraia. (Efe. 4:2, 3) Ita abia dae ena be ita idia hakaua tadikaka be goevadae lasi, to Iehova be iseda badinaia karana do ia hanamoa. (1 Sam. 15:22) Danu bema ita laloa hakaua dalana ta idia haidaua be namo, namona be ita abia dae Iehova be ena nega korikori ai unai do ia hamaoromaoroa.—Mika 7:7.

15-16. Dahaka ese tadikaka ta ia durua abidadama amo ia raka totona, ena be hakaua hereva haida dekenai ia daradara? (Laulau itaia danu.)

¹⁵ Abidadama amo ita raka noho ena ekspiriens namona ta mani ita laloa. Peru ai, taunimanima momo be Spanish gado ai idia hereva, to ruma bese momo be edia hanua gado dekenai idia hereva. Unai gado ta be Quechua. Lagani momo lalonai, Quechua-gado idia hereva tadikaka bona taihu be teritori ai unai gado taudia idia tahua. To, gavamani ena taravatu idia badinaia totona, haroro gaukara ai senisi haida idia vara. (Roma 13:1) Unai dainai, haida idia daradara bema unai ese teritori lalonai haroro gaukara do ia durua. Tadikaka ese unai hakaua dalana idia badinaia dainai, Iehova ese edia hekwarahi ia hanamoa bona Quechua-gado idia herevalaia taudia momo idia davaria.

¹⁶ Quechua-gado kongrigeisen ai ia noho elda ta Kevin danu be unai senisi dainai ia laloa momo. Ia gwau: “Lau laloa, ‘Edena dala ai Quechua gado idia hereva taudia lau davaria diba?’” Kevin be dahaka ia karaia? Ia gwau: “Lau ese Aonega Herevadia 3:5 ena hereva lau laloa. Bona Mose lau laloa. Iehova ese Mose dekenai ia henia hakaua herevana be ia lalopararalaia lasi. Mose ia hamaoroa Israela taudia be Aigupito amo do ia hakaua siri bona Davara Kakakakana amo do idia hanaia. Bona toana be idia be Aigupito taudia amo idia roho mauri diba lasi. To Mose ese unai hakaua dalana ia badinaia dainai, Iehova ese hoa dalanai idia ia hamauria.” (Eso. 14:1, 2, 9-11, 21, 22) Kevin be mai ura ida haroro gaukara ena dala matamata ia badinaia. Dahaka ia vara? Ia gwau: “Lau hoa badina Iehova ese ai ia hanamoa. Guna, haroro gaukara ai hora momo ai raka bona nega haida Quechua-gado idia hereva taudia ta eiava rua ai davaria. Hari unai gado idia hereva gabudia sibona dekenai ai lao. Unai dainai, taunimanima momo ai hereva henia, lou henia bona Baibel stadi ai karaia. Emai hebou dekenai idia mai taudia edia namba ia bada ia lao.” Oibe, abidadama amo ita raka neganai, Iehova ese hanaihanai ita do ia hanamoa.

17. Inai atikol amo dahaka oi dibaia?

¹⁷ Inai atikol ai, mai anina bada gaudia toi ita herevalaia vadaeni, unai ese ita ia durua abidadama amo ita raka noho totona. To ita karaia abia hidi idauidau, hegeregere muvi ta ita ura itaia eiava iseda nega ita gaukaralaia dalana, bona sikuli bada do ita lao eiava lasi, eiava natudia ita naria dalana totona, namona be Iehova ese ia ura henia dalana ita badinaia. Herevana dahaka abia hidi do ita karaia, namona be ita itaia gaudia sibona ita laloa lasi, to iseda hetura karana Iehova ida, iena sisiba, bona ita do ia naria ena gwauhamata ita laloa. Bema unai bamona ita karaia, do ita hegeregere “Iehova iseda Dirava ena ladana ai do ita raka ela bona hanaihanai.”—Mika 4:5.