Iesu Tohotohoa Bona mai Ura ida Haroro

1. Edena kara ese ia hahedinaraia Iehova ena taunimanima be tanobada taudia amo idia idau?

IEHOVA ena hesiai taudia be mai ura ida sivarai namona idia harorolaia bona idia gaukara goada, unai amo idia hahedinaraia idia be sibona idia gwauraia Keristani taudia amo idia idau. (Tito 2:14) To nega haida do oi mamia haroro gaukara ena ura ia goada lasi. Reana oi be elda ta ese ia abia hemami bamona do oi mamia. Ia gwau, “Nega haida haroro gaukara ena ura lau abia lasi.”

2. Dahaka dainai nega haida ia auka mai ura ida ita haroro totona?

² Reana ita be Iehova ena hesiai gaukara ma haida ita moalelaia, to haroro gaukara be lasi. Dahaka dainai? Badina tiokratik rumadia ita haginia bona hanamoa, disasta negadiai heduru ita henia, eiava tadikaka taihu ita hagoadaia neganai ita moale. Iseda tadikaka ida mai lalokau bona maino ida ita gaukara hebou neganai, ita moale. Bona ita diba idia totona ita karaia gaudia idia laloa bada. To haroro gaukara lalonai lagani momo ai teritori tamona ita karaia bona taunimanima idia kamonai lasi. Eiava ita davaria taudia be sivarai namona idia abia dae lasi. Danu ita diba nega dokona ia kahirakahira lalonai, taunimanima momo be ita do idia inai henia. (Mat. 10:22) Dahaka ese ita do ia durua haroro gaukara ai iseda ura ita habadaia totona?

3. Luka 13:6-9 ai, Iesu ena haheitalai amo dahaka ita dibaia?

³ Mai ura ida haroro gaukara ita karaia totona Iesu ena haheitalai amo gau namodia haida do ita dibaia. Iesu be tanobada ai ia noho neganai, haroro gaukara ia karaia goadagoada. Bona gabeai ena hesiai gaukara ia habadaia noho. (Luka 13:6-9 duahia.) Vain uma naria tauna ese lagani toi lalonai fig auna ia naria, to anina ia havaraia lasi hegeregerena, Iesu be lagani toi lalonai Iuda taudia ia haroro henia, to idia momo be sivarai namona idia abia dae lasi. To, vain uma naria tauna be ia hesiku lasi hegeregerena, Iesu be taunimanima dekenai ia hesiku lasi bona haroro gaukara ia karaia noho. Danu, Iesu ia haroro goadagoada unai amo Iuda taudia ia durua sivarai namona idia abia dae totona.

4. Iesu ena hahetalai amo dahaka gaudia foa do ita herevalaia?

⁴ Inai atikol ai, Iesu ese ena hua ginigabedia siks lalonai mai ura bada ida haroro gaukara ia karaia dalana do ita herevalaia. (Luka 10:1) Ia hadibaia gaudia bona ia karaia gaudia ita diba bona badinaia neganai, unai ese ita do ia durua mai ura ida ita haroro totona. Mani Iesu ena haheitalai namodia foa ita herevalaia: (1) Iehova ena ura ia laloa bada, (2) peroveta herevadia ia laloa, (3) Iehova ena heduru dekenai ia tabekau, bona (4) ia abia dae haida be sivarai namona do idia kamonai.

IEHOVA ENA URA IA LALOA BADA

5. Edena dala ai Iesu ia hahedinaraia ia be Dirava ena ura ia laloa bada?

⁵ Iesu be mai ura ida “Basileia ena sivaraia namona” ia harorolaia, badina ia diba Dirava ia ura unai gaukara do ia karaia. (Luka 4:43) Iesu ena mauri lalonai haroro gaukara be mai anina bada. Iena hua ginigabedia ai ia haroro lalonai, ia be “siti bona hanua ta ta” ai ia lao bona taunimanima ia hadibaia. (Luka 13:22) Danu ia ese hahediba taudia ma haida ia treinia haroro gaukara idia karaia totona.—Luka 10:1.

6. Edena dala ai Iehova totona ita karaia gaukara ma haida ese haroro gaukara ia durua? (Laulau itaia danu.)

⁶ Hari danu, sivarai namona harorolaia gaukarana be mai anina bada, unai dainai Iehova bona Iesu idia ura unai gaukara do ita karaia. (Mat. 24:14; 28:19, 20) Iehova totona ita karaia hesiai gaukara ma haida ese haroro gaukara ia durua. Hegeregere, Kingdom Hall ita haginia eiava Betele ai ita karaia gaukara ese haroro gaukara ia durua. Disasta idia vara neganai ita ura iseda tadikaka bona taihu edia dabu gaudia ita henia, unai amo edia hebou bona haroro gaukara do idia hamatamaia lou. Bema ita laloatao haroro gaukara be mai anina bada bona Iehova ia ura unai gaukara ita karaia, unai ese iseda ura do ia habadaia haroro gaukara ita goadalaia totona. Hungary ai elda ta ladana János ia gwau, “Lau sibona lau hadibaia Iehova ena hesiai gaukara ma haida ese haroro gaukara ena gabu do ia abia lasi, unai be iseda gaukara badana.”

7. Dahaka dainai Iehova ia ura ita haroro noho? (1 Timoteo 2:3, 4)

⁷ Iehova ese taunimanima ia laloa dalana hegeregerena idia ita laloa neganai, mai ura ida iseda haroro gaukara do ita karaia. Ia ura taunimanima momo be sivarai namona do idia kamonai bona abia dae. (1 Timoteo 2:3, 4 duahia.) Unai dainai, Iehova ese ita ia treinia taunimanima hamauria gaukarana ita karaia totona. Hegeregere, Taunimanima Lalokau Henia—Hahediba Taudia ai Halaoa buklet ai heduru herevadia idia noho, unai ita gaukaralaia diba taunimanima ida herevahereva ita hamatamaia bona hahediba taudia ai ita halaodia totona. Ena be hari taunimanima idia kamonai lasi, to hisihisi badana ia do vara lasi neganai nega ia noho do idia kamonai totona. Hari idia dekenai ita gwauraia herevadia idia abia dae lasi, to gabeai unai gaudia do idia laloatao bona do idia ura Iehova idia hesiai henia. To unai ia vara totona haroro gaukara ita karaia noho be namo.

BAIBEL ENA PEROVETA HEREVADIA IA LALOA

8. Edena Baibel ena peroveta herevadia ese Iesu ia durua ena nega ia gaukaralaia namonamo totona?

⁸ Iesu be Baibel ena peroveta herevadia haida do idia guguru dalana ia lalopararalaia. Ia diba lagani toi mai kahana sibona lalonai hesiai gaukara do ia karaia. (Dan. 9:26, 27) Danu ia diba edena negai bona edena bamona do ia mase. (Luka 18:31-34) Iesu be unai gaudia ia diba dainai ena nega ia gaukaralaia namonamo. Unai dainai, mai ura ida haroro gaukara ia karaia ela bona ia abia gaukarana ia hagugurua.

9. Dahaka dainai Baibel ena peroveta herevadia ese ita ia hagoadaia ita haroro goadagoada totona?

⁹ Baibel ena peroveta herevadia ita dibaia karana ese ita ia durua diba, mai ura ida haroro gaukara ita karaia totona. Ita diba inai tanobada oromana be kahirakahira do ia ore. Hari idia vara gaudia bona taunimanima edia kara ese ia hahedinaraia, Baibel ese dina gabedia totona ia perovetalaia gaudia be idia guguru noho. Bona Tanobada Basileia Badana Anglo-America bona Russia bona ena durua tanodia huanai ia vara heiriheiri karana ese Baibel ena peroveta herevana ia hagugurua, unai be “nega dokona ai” saut kahana ena king bona not kahana ena king ena peroveta herevana ita lalopararalaia. (Dan. 11:40) Danu ita laloparara Tanobada Basileia Badana Anglo-America be Daniela 2:43-45 ese ia gwauraia kaivakuku ena aena palapala ese ia laulaulaia. Ita diba momokani, kahirakahira Dirava ena Basileia ese taunimanima edia gavamani ibounai do ia hadikaia ore. Unai peroveta herevadia ibounai ese idia hahedinaraia ita be nega dokona ai ita noho, unai dainai iseda nega ita gaukaralaia namonamo bona sivarai namona ita harorolaia goadagoada.

10. Edena dala ma haida ai Baibel ena peroveta herevadia ese emu ura ia habadaia diba?

¹⁰ Danu Baibel ena peroveta herevadia amo sivarai namona be ma haida dekenai ita hadibaia. Dominican Republic ai ia noho taihu ta, Carrie ia gwau: “Iehova ena gwauhamata vaira nega totona ese lau ia hagoadaia ma haida dekenai hereva momokani lau harorolaia totona. Lau itaia taunimanima be hekwakwanai idia davaria neganai, lau laloparara unai gwauhamata namodia be lau sibona totona lasi, to idia totona danu.” Baibel ena peroveta herevadia ese ita idia hagoadaia, mai ura ida haroro gaukara ita karaia totona, badina ita diba Iehova be unai gaukara ia durua noho. Hungary ai ia noho taihu, Leila ia gwau: “Ena be lau itaia haida be sivarai namona do idia abia dae lasi, to Isaia 11:6-9 ese lau ia hagoadaia idia dekenai sivarai namona lau harorolaia totona. Lau diba Iehova ese taunimanima idauidau ia durua diba edia mauri idia haidaua totona.” Bona Zambia ai tadikaka ta, Christopher ia gwau: “Mareko 13:10 ena hereva hegeregerena, sivarai namona be tanobada ibounai dekenai idia harorolaia noho bona lau moale unai peroveta herevana ia guguru karana lau durua noho.” Edena Baibel ena peroveta herevadia ese oi ia durua oi haroro noho totona?

IEHOVA DEKENAI IA TABEKAU

11. Iesu be mai ura ida ia haroro totona dahaka dainai Iehova dekenai ia tabekau be namo? (Luka 12:49, 53)

¹¹ Iesu be mai ura ida ia haroro totona Iehova ena heduru dekenai ia tabekau. Ena be Iesu be hadibaia tauna namona, to ia diba Basileia ena sivarai namona dainai taunimanima be do idia badu bona do idia dagedage. (Luka 12:49, 53 duahia.) Tomadiho gunalaia taudia be Iesu ese ia harorolaia gaudia idia ura henia lasi, unai dainai nega momo idia ura ia idia hamasea. (Ioa. 8:59; 10:31, 39) To Iesu be ia haroro noho badina ia diba Iehova be ia ida ia noho. Iesu ia gwau: “Lau ia siaia Tauna be lau ida, ia ese lau ia rakatania lasi, badina hanaihanai ia hamoalea gaudia lau karaia.”—Ioa. 8:29.

12. Iesu ena hahediba taudia be dagedage negadia ai idia haroro noho totona, edena dala ai idia ia hegaegaelaia?

¹² Iesu be ena hahediba taudia ia hadibaia Iehova dekenai idia tabekau diba. Ia be idia ia hadibaia loulou hekwakwanai idia davaria neganai Iehova ese idia do ia durua. (Mat. 10:18-20; Luka 12:11, 12) Iesu ia diba momo ese sivarai namona do idia inai henia, unai dainai ena hahediba taudia ia hamaoroa do idia naria namonamo. (Mat. 10:16; Luka 10:3) Danu idia ia hamaoroa bema taunimanima idia ura lasi kamonai, namo lasi idia doria. (Luka 10:10, 11) Bona idia ia hamaoroa dagedage idia davaria neganai, gabu ma ta dekenai idia heau lau be namo. (Mat. 10:23) Ena be Iesu be mai ura ida ia haroro bona Iehova dekenai ia tabekau, to dika gaudia amo sibona ia naria namonamo.—Ioa. 11:53, 54.

13. Dahaka dainai oi diba momokani Iehova be oi do ia durua?

¹³ Dagedage negadia ai mai ura ida ita haroro noho totona Iehova ena heduru ita abia be namo. (Apok. 12:17) Dahaka dainai oi diba momokani Iehova ese oi do ia durua? Ioane karoa 17 ai Iesu ese ia gwauraia guriguri mani ita laloa. Iesu ese Iehova ia noia aposetolo taudia ia naria totona, bona Iehova ese ena guriguri ia haerelaia. Kara bukana ese ia hahedinaraia Iehova ese aposetolo taudia ia durua dagedage negana ai mai ura ida idia haroro totona. Danu Iesu ena guriguri lalonai, Iehova ia noia sivarai namona idia kamonai bona abia dae taudia do ia naria totona. Bona oi danu be idia ta. Hari danu Iehova be Iesu ena guriguri ia do haerelaia noho, ia ese oi do ia durua aposetolo taudia ia durua hegeregerena.—Ioa. 17:11, 15, 20.

14. Edena dala ai ita diba mai ura ida do ita haroro noho? (Laulau itaia danu.)

¹⁴ Nega dokona ia kahirakahira lalonai, do ia auka mai ura ida sivarai namona ita harorolaia totona. To Iesu ese ita ia hamaoroa unai gaukara ita karaia noho totona heduru do ita abia. (Luka 21:12-15) Iesu bona ena hahediba taudia bamona, ita ura lasi taunimanima ita doria idia kamonai totona bona ita ura lasi idia ida ita hepapahuahu. Ena be tano haida ai iseda gaukara idia koua, to tadikaka be Iehova dekenai idia tabekau dainai sivarai namona idia do harorolaia noho. Aposetolo taudia edia nega ai, Iehova ese ena hesiai taudia dekenai goada ia henia hegeregerena, ita ia durua bona goada ia henia, unai amo “sivarai namona [ita] harorolaia guguru” diba. (2 Tim. 4:17) Namona be oi diba bema Iehova dekenai oi tabekau, do oi hegeregere mai ura ida haroro gaukara oi karaia noho totona.

IA ABIA DAE HAIDA BE SIVARAI NAMONA DO IDIA KAMONAI

15. Dahaka ese ia hahedinaraia Iesu ia diba taunimanima be sivarai namona do idia kamonai?

¹⁵ Iesu ia diba momokani taunimanima haida be sivarai namona do idia kamonai. Unai ese ia durua mai ura ida haroro gaukara ia karaia totona. Hegeregere lagani 30 C.E. lalonai, Iesu ia itaia taunimanima momo idia ura sivarai namona idia kamonai, bona idia ia herevalaia neganai ia gwau uma aniani ia hegeregere vadaeni gogoa totona. (Ioa. 4:35) Lagani ta bamona murinai ena hahediba taudia ia hamaoroa: “Uma aniani gogoa gaukarana be bada.” (Mat. 9:37, 38) Gabeai unai hereva ia gwauraia lou: “Uma aniani gogoa gaukarana be bada . . . Gogoa gaukarana ena Biaguna umui noia, ia ese gaukara taudia do ia siaia iena aniani idia gogoa totona.” (Luka 10:2) Iesu ia diba taunimanima be sivarai namona do idia abia dae, bona unai idia karaia neganai ia moale.—Luka 10:21.

16. Edena dala ai Iesu ena parabole rua ese ia hahedinaraia haroro gaukara ese taunimanima momo do ia durua? (Luka 13:18-21) (Laulau itaia danu.)

¹⁶ Iesu ese ena hahediba taudia ia hamaoroa, idia harorolaia sivarai namona ese anina namona do ia havaraia, unai ese idia do ia hagoadaia idia haroro noho totona. Hegeregere, Iesu ena parobole rua mani ita laloa. (Luka 13:18-21 duahia.) Iesu ese mastadi uhena ena parabole amo ia hahedinaraia, Basileia ena sivarai namona be taunimanima momo ese do idia abia dae bona gau ta ese unai do ia koua lasi. Bona ena parabole ma ta lalonai Basileia sivaraina be isti ida ia hahegeregerea. Ia hahedinaraia Basileia sivaraina be tanobada ibounai dekenai do idia harorolaia bona momo edia mauri ia haidaua, ena be idia karaia senisi be taunimanima ese do idia itaia haraga lasi. Unai dainai, Iesu ese ena hahediba taudia dekenai ia hahedinaraia, idia harorolaia sivarai namona ese taunimanima momo do ia durua.

17. Dahaka dainai ita haroro noho be namo?

¹⁷ Tanobada ibounai lalonai haroro gaukara ese taunimanima momo ia durua dalana ita itaia neganai, unai ese ita ia hagoadaia ita haroro noho totona. Lagani ta ta ai, kamonai taudia milioni momo be Memorial dekenai idia mai bona ita ida Baibel idia stadilaia. Taunimanima tausen momo be bapatiso idia abia bona ita ida haroro gaukara idia karaia. Ita haroro noho lalonai ita diba lasi taunimanima hida be sivarai namona do idia abia dae, to ita diba gauna be Iehova be hutuma bada taudia ia do haboua noho, idia be hisihisi badana amo do idia roho mauri. (Apok. 7:9, 14) Iehova be uma ena Biaguna bona ia diba taunimanima momo be sivarai namona do idia abia dae, unai dainai ita haroro noho be namo.

18. Iseda haroro gaukara amo ita ura taunimanima be dahaka do idia itaia?

¹⁸ Iesu ena hahediba taudia korikoridia be hanaihanai mai ura ida sivarai namona idia harorolaia. Taunimanima ese aposetolo taudia edia gari lasi karana idia itaia neganai “idia laloparara, idia be guna Iesu idia bamoa taudia.” (Kara 4:13) Ita danu be mai gari lasi bona ura bada ida sivarai namona ita harorolaia neganai, taunimanima do idia itaia ita be Iesu ita tohotohoa.