“Dirava Kahirakahira Lao Karana be Namo”!

1-2. (a) Ta ena turana namona ai ita lao totona, dahaka ita karaia be namo? (b) Inai atikol ai dahaka do ita herevalaia?

OI BE mai emu turana namona ta, a? Edena dala ai iena turana namona ai oi lao? Reana nega oi atoa ia oi bamoa, iena mauri ai idia vara gaudia oi dibaia bona ia ura henia lasi bona ia ura henia gaudia oi dibaia. Ena kara namodia oi dibaia bona oi ura ia oi tohotohoa. Bena emu turana oi lalokau henia.

² Ta ena turana namona ai oi lao totona, namona be nega oi atoa ia oi bamoa totona. Iehova Dirava ena turana ai ita lao totona unai bamona ita karaia be namo. Inai atikol ai Dirava kahirakahira ita lao dalana bona unai ita karaia ena namo do ita herevalaia. Ginigunana be, iseda Turana namona, Iehova kahirakahira ita lao ena namo do ita herevalaia.

3. Dahaka dainai Iehova kahirakahira ita lao ena badina ita laloa dobu be namo? Haheitalai gwauraia.

³ Iehova ena turana ai ita lao be namo. Bona unai ena badina ita laloa dobu be gau badana. (Sal. 63:6-8) Dahaka dainai? Mani inai haheitalai ita laloa, taunimanima idia diba aniani namona idia ania, idia eksasais, idia mahuta namonamo, bona dina ta ta ai ranu idia inua be namo. Taunimanima momo be unai gaudia idia laloa bada lasi, unai dainai edia helt be namo lasi. To haida be edia helt idia laloa dainai, unai gaudia idia karaia. Unai hegeregerena, ita diba Iehova ena turana ai ita lao be namo, to unai ita karaia ena badina ita laloa namonamo neganai, do ita ura ia kahirakahira ita lao noho.—Sal. 119:27-30.

4. Salamo 73:28 ia torea tauna be dahaka ia gwau?

⁴ Salamo 73:28 duahia. Salamo 73 ia torea tauna be Levi tauna bona idia abia hidi Iehova ena dubu helaga dekenai miusiki ia karaia totona. Reana ia be lagani momo lalonai, mai abidadama ida Iehova ia tomadiho henia. To ia diba namona be ia laloatao “Dirava kahirakahira lao karana” be mai ena namo, bona ia ura ma haida be unai idia laloatao danu. Unai bamona ita karaia ena namo haida be dahaka?

“DIRAVA KAHIRAKAHIRA LAO KARANA” ESE MOALE IA HAVARAIA

5. (a) Dahaka dainai Iehova kahirakahira ita lao karana ese moale ia havaraia? (b) Edena dala ai Iehova ese ia henia aonega ese oi ia durua bona ia gimaia? (Aonega Herevadia 2:6-16)

⁵ Iehova kahirakahira ita lao noho neganai, iseda moale do ia bada ia lao. (Sal. 65:4) Do ita moale ena badina be momo. Hegeregere, Baibel ai Iehova ese ita ia hamaoroa gaudia ita duahia bona badinaia neganai, aonega do ita abia. Unai bamona aonega ita abia neganai, hebamo kereredia bona kara dikadia amo ita ia gimaia. (Aonega Herevadia 2:6-16 duahia.) Unai dainai Baibel ia gwau: “Aonega ia davaria tauna be ia moale bona laloa kehoa ia abia tauna be ia moale.”—Aon. 3:13.

6. Dahaka dainai salamo torea tauna ena moale ia ore?

⁶ Momokani, nega haida Iehova ena turadia idia lalohisihisi danu. Salamo 73 ia torea tauna be lalohadai kereredia ia abia dainai ena moale ia ore. Ia badu, badina ia laloa kara dika taudia be Dirava eiava ena taravatu idia laloa bada lasi, to edia mauri be namo. Ia laloa, dagedage bona hekokoroku taudia be hanaihanai kohu momo idia abia, edia helt ia namo, bona hisihisi idia davaria lasi. (Sal. 73:3-7, 12) Salamo torea tauna be ia lalohekwarahi dainai, ia laloa Iehova ia hesiai henia karana ese namo ta do ia havaraia lasi. Ia lalohisihisi bada bona ia gwau: “Momokani nega ibounai egu kudouna ia goeva, bona lau hahedinaraia lau be kerere lasi.”—Sal. 73:13.

7. Ita lalohisihisi neganai, dahaka ita karaia diba? (Rau 1 ena itaia danu.)

⁷ Ena be salamo torea tauna ia lalohisihisi bada, to gau ta ia karaia ena lalohadai ia haidaua totona. Ia be ‘Dirava ena dubu helaga badana ai ia vareai,’ unuseniai Iehova ese ena lalohadai ia hamaoromaoroa. (Sal. 73:17-19) Ita lalohisihisi neganai, iseda Turana namona Iehova be unai ia diba. Guriguri amo iena hakaua dalana totona ita noinoi. Bona ena Hereva bona kongrigeisen amo ia mai heduru ita abia dae neganai, lalogoada do ita abia ita haheauka totona. Ena be hekwakwanai momo ita davaria, to Iehova ese ita do ia hagoadaia bona lalomaino ia henia.—Sal. 94:19.a

“DIRAVA KAHIRAKAHIRA” ITA LAO NEGANAI HARI BONA VAIRA NEGA AI MAURI NAMONA DO ITA ABIA

8. Dirava kahirakahira ita lao neganai, edena dala rua ai namo ita davaria?

⁸ Dirava kahirakahira ita lao neganai, mai anina bada daladia rua ai namo ita davaria. Ginigunana be, mauri namona ita noholaia. Iharuana be, vaira nega totona helaro ita abia. (Ier. 29:11) Mani unai dala namodia rua ita herevalaia.

9. Edena dala ai, Iehova kahirakahira ita lao karana amo moale korikorina do ita abia?

⁹ Dirava kahirakahira ita lao dainai, iseda mauri ia namo. Hari inai negai, taunimanima momo idia abia dae lasi Dirava ia noho, unai dainai idia laloa mauri be anina lasi bona vaira nega ai taunimanima do idia noho lasi. To ita be Dirava ena hereva ita stadilaia karana amo ita diba momokani, “Dirava be ia noho bona Dirava ese mai momokani ida ia idia tahua taudia edia davana do ia henia.” (Heb. 11:6) Danu, iseda guba Tamana Iehova ese ita ia karaia ia ita hesiai henia totona. Unai dainai ia ita hesiai henia neganai, moale korikorina ita abia.—Deu. 10:12, 13.

10. Iehova idia abidadama henia taudia dekenai dahaka gwauhamata ia henia? (Salamo 37:29)

¹⁰ Taunimanima momo be hari ena mauri sibona idia laloa, hegeregere idia gaukara, idia headava, natuna idia havaraia, bona edia buruka negana totona moni idia haboua. Idia be Dirava ese vaira nega totona ia gwauhamatalaia gaudia idia diba lasi. To ita diba Iehova be ena hesiai taudia ia naria. (Sal. 25:3-5; 1 Tim. 6:17) Ita tura henia Diravana ita abidadama henia bona ita diba ita totona ia gwauhamatalaia gaudia be do ia karaia. Vaira nega ai do ita moalelaia gauna ta be, Paradaiso ai Iehova do ita tomadiho henia ela bona hanaihanai.—Salamo 37:29 duahia.

11. Dirava ena turana ai ita lao neganai dahaka ia vara, bona ena hemami be edena bamona?

¹¹ Dirava kahirakahira ita lao neganai, dala idauidau ai namo ita davaria. Hegeregere, Iehova ia gwauhamata ita helalo-kerehai neganai, iseda kara dika do ia gwauatao. (Isa. 1:18) Unai dainai, guna ita karaia kerere dainai ita laloa momo lasi. (Sal. 32:1-5) Bona Iehova ita hamoalea neganai ita moale danu. (Aon. 23:15) Momokani, Dirava ita tura henia dainai gau namodia momo ita moalelaia diba. To edena dala ai Dirava kahirakahira ita lao noho diba?

“DIRAVA KAHIRAKAHIRA ITA LAO” NOHO DALANA

12. Dahaka oi karaia vadaeni Dirava kahirakahira oi lao totona?

¹² Bema oi bapatiso vadaeni, oi be gau momo oi karaia guna bena Iehova ena turana ai oi lao. Hegeregere, Iehova Dirava bona Keriso Iesu oi dibaia namonamo, emu kara dika gunadia amo oi helalo-kerehai, oi hahedinaraia Dirava oi abidadama henia, bona oi gaukara goada ia oi badinaia totona. To Dirava kahirakahira ita lao totona, namona be unai gaudia ita karaia noho.—Kol. 2:6.

13. Iehova kahirakahira ita lao noho totona, dahaka gaudia ese ita do ia durua?

¹³ Iehova kahirakahira ita lao noho totona dahaka ese ita do ia durua? (1) Namona be Baibel ita duahia bona ita stadilaia noho. Unai ita karaia lalonai, Dirava ita dibaia bona gau ma haida ita karaia be namo. Ita hekwarahi Dirava ena laloa dalana bona ia ura henia gaudia ita lalopararalaia, bona iseda mauri lalonai unai gaudia ita badinaia. (Efe. 5:15-17) (2) Namona be Iehova ese ita ta ta dekenai ena lalokau ia hahedinaraia daladia ita laloa dobu, unai amo iseda abidadama do ita hagoadaia. (3) Namona be Iehova ese ia inai henia gaudia ita dadaraia noho bona unai bamona kara dikadia idia karaia taudia ita tura henia lasi.—Sal. 1:1; 101:3.

14. Dina ta ta ai Iehova ita hamoalea totona dahaka ita karaia diba? (1 Korinto 10:31) (Laulau itaia danu.)

¹⁴ Korinto Iharuana 10:31 duahia. Iehova ese ia moalelaia gaudia ita karaia be mai anina bada. Anina be haroro gaukara bona hebou ita lao sibona lasi, to gau ma haida ita karaia be namo. Dina ta ta ai ita karaia gaudia ese Iehova ia hamoalea be namo. Hegeregere, gau ibounai lalonai ita kara momokani bona ita abia gaudia be ma haida ida ita haria neganai, Iehova ita hamoalea. (2 Kor. 8:21; 9:7) Danu, ia ura ita dekenai ia henia harihari gauna, mauri ita laloa bada. Unai dainai ita ania bona ita inua gaudia dekenai ita naria namonamo, bona iseda helt do ia durua gaudia ma haida ita karaia. Gau ibounai lalonai Iehova ita hamoalea neganai, ia ese ita do ia lalokau henia bada.—Luka 16:10.

15. Iehova ia ura ma haida be edena bamona ita kara henia?

¹⁵ Iehova be kara maoromaoro taudia bona kara maoromaoro lasi taudia dekenai, kara namo ia hahedinaraia. (Mat. 5:45) Ia ura ma haida dekenai unai bamona kara ita hahedinaraia danu. Hegeregere, ta ita “gwauraia dika lasi,” ita “hepapahuahu momo lasi” bona ‘taunimanima ibounai dekenai manau karana do ita hahedinaraia.’ (Tito 3:2) Unai dainai, bema taunimanima be Iehova idia abidadama henia lasi, ita laloa lasi idia ita hereaia. (2 Tim. 2:23-25) Taunimanima ibounai dekenai kara namo ita hahedinaraia neganai, ita be Iehova kahirakahira do ita lao.

ENA BE ITA KERERE TO “DIRAVA KAHIRAKAHIRA” ITA LAO DIBA

16. Salamo 73 ia torea tauna be Iehova ia hesiai henia lalonai, dahaka ia laloa matamaia?

¹⁶ Nega haida oi karaia kerere oi laloa lou dainai, do oi laloa reana Iehova be oi kahirakahira ia noho lasi. To Salamo 73 ia torea tauna ena haheitalai oi laloatao. Ia gwau: “To lau be kahirakahira dala maorona amo lau raka-siri, kahirakahira egu aena ia dedi.” (Sal. 73:2) Ia gwau, ena “kudouna ia hisihisi,” “ia laloa namonamo lasi” bona Iehova ena vairanai ia be “kavakava animal ta bamona.” (Sal. 73:21, 22) To ia laloa ia be kerere ia karaia dainai, Iehova ese ia lalokau henia lasi, a?

17. (a) Salamo torea tauna be ia lalohisihisi bada neganai, dahaka ia karaia? (b) Ena sivarai amo dahaka ita dibaia? (Laulau itaia danu.)

¹⁷ Bema salamo torea tauna ia laloa Iehova ese ia dadaraia, reana unai hemami be nega sisina sibona ia abia. Ena be ia lalohisihisi bada, to ia diba Iehova kahirakahira ia lao be gau badana, ia gwau: “To hari lau be nega ibounai oi [Iehova] ida lau noho. Oi ese egu imana idibana oi dogoatao vadaeni. Emu sisiba amo lau oi hakaua, bona unai murinai hairai dekenai lau do oi hakaua lao.” (Sal. 73:23, 24) Ita danu ita lalohisihisi neganai, namona be Iehova ita noia ita ia hagoadaia totona. (Sal. 73:26; 94:18) Ena be kara dika badadia ita karaia, to Iehova dekenai ita giroa lou diba, bona ita abia dae ia “noho hegaegae” iseda kara dika ia “gwauatao” totona. (Sal. 86:5) Ita lalohisihisi bada neganai, iseda Dirava kahirakahira ita lao be mai anina bada.—Sal. 103:13, 14.

“DIRAVA KAHIRAKAHIRA” ITA LAO NOHO ELA BONA HANAIHANAI

18. Dahaka dainai Iehova kahirakahira ita lao noho diba?

¹⁸ Ita be Iehova kahirakahira ita lao noho diba, bona ia dibaia karana be do ia doko lasi. Baibel ia gwau Iehova ena dala ibounai, ena aonega, bona ena diba “be ta ese ia lalopararalaia diba lasi.”—Roma 11:33.

19. Salamo bukana ese dahaka hagoadaia herevana ia henia?

¹⁹ Salamo 79:13 ia gwau: “Ai, emu taunimanima bona oi naria mamoe oreana unai, be oi do ai tanikiu henia ela bona hanaihanai. Bona uru ta amo ia lao uru ta oi hanamoa herevadia do ai gwauraia.” Oi be Iehova kahirakahira oi lao noho lalonai, oi danu be do oi abia dae hahenamo do oi abia ela bona hanaihanai. Bona do oi gwau diba: “Dirava be egu kudouna ia gimaia, ia be egu nadi badana. Ia be egu ahuna ela bona hanaihanai.”—Sal. 73:26.