Baibel Ena Hahediba Herevadia ese Oi Ia Durua Diba, A?

1. Baibel ena hahediba herevadia oi dibaia neganai, edena dala ai emu mauri ia haidaua?

BAIBEL ita stadilaia matamaia neganai, Baibel ena hahediba herevadia ese iseda mauri ia haidaua. Hegeregere, Dirava ena ladana Iehova ita diba neganai, ita ura iena turana ai ita lao. (Isa. 42:8) Danu mase taudia dekenai ia vara gauna ita diba dainai, mase taudia dekenai ita gari lasi. (Had. 9:10) Bona Dirava be ena gwauhamata inai tanobada be Paradaiso ai do ia halaoa ita dibaia neganai, do ita laloa momo lasi. Danu ita abia dae ita be lagani 70 eiava 80 sibona do ita mauri lasi, to do ita mauri ela bona hanaihanai.—Sal. 37:29; 90:10.

2. Edena dala ai lo Keristani taudia be Baibel ena hahediba herevadia ese ia durua? (2 Petero 1:12, 13.)

² Nega ginigunana Baibel amo ita dibaia hahediba herevadia be mai anina bada. Aposetolo Petero be ‘hereva momokani idia dogoatao auka’ Keristani taudia dekenai ena revareva iharuana ia torea. (2 Petero 1:12, 13 duahia.) To unai nega ai hahediba koikoi taudia bona Dirava badinaia lasi taudia haida be idia ura kongrigeisen lalonai tadikaka bona taihu be hereva momokani amo idia hakaua siri. (2 Pet. 2:1-3) Petero ia ura ena tadikaka bona taihu ia hagoadaia, unai amo hereva koikoidia idia gwauraia taudia idia dadaraia diba. To unai ia karaia totona, ia ese idia dibaia vadaeni hahediba hereva badadia ia hadibaia lou. Unai hahediba herevadia ese idia do ia durua idia haheauka noho ela bona dokona.

3. Dahaka dainai Keristani taudia ibounai be Baibel ena hahediba herevadia idia laloa dobu be namo? Haheitalai gwauraia.

³ Ena be Iehova ena orea lalonai lagani momo ita noho, to Baibel ena hahediba hereva badadia amo diba matamatadia ita do abia noho. Inai haheitalai ita laloa: Nanadu ia diba namonamo sina ta be supu namona ia karaia ingredient ia diba bona ena natuna kekeni danu be unai supu ia nadua neganai, ia danu be unai ingredient ia gaukaralaia, to lagani idia hanaia lalonai sinana be nanadu daladia matamata ia dibaia dainai, unai supu ia karaia namonamo diba. Unai hegeregerena, lagani momo lalonai Iehova idia hesiai taudia bona Baibel stiuden taudia be Baibel ena hahediba herevadia be dala idauidau ai idia lalopararalaia diba. Bapatiso ita abia negana amo ema bona hari, iseda noho dalana eiava Iehova ena hesiai gaukara lalonai gau haida idia idau. Bema guna ita dibaia hahediba herevadia ita laloa neganai, gau matamatadia bona ita idia durua diba gaudia ma haida do ita dibaia. Hari lo Keristani taudia ese Baibel ena hahediba herevadia toi amo do idia dibaia gaudia mani ita herevalaia.

IEHOVA BE HAVARAIA TAUNA

4. Ita diba Iehova be Havaraia Tauna neganai, unai ese edena dala ai ita ia durua?

⁴ Ita diba iseda tanobada bona mauri gaudia ibounai be aonega bona siahu bada Havaraia Tauna ese ia karaia. Baibel ia gwau: “Gau ibounai ia karaia tauna be Dirava.” (Heb. 3:4) Ia ese ita ia havaraia dainai, ita ia diba namonamo. Ia be ita ia laloa bada bona ia diba dahaka gaudia ese ita do ia durua. Ita diba Iehova be Havaraia Tauna neganai, unai ese ita ia durua bada. Unai dainai ita diba iseda mauri be mai ena badina.

5. Dahaka ese ita do ia durua manau karana ita hahedinaraia totona? (Isaia 45:9-12)

⁵ Iehova be Havaraia Tauna ita diba dainai, unai ese ita ia durua ita manau totona. Hegeregere, Iobu be nega sisina lalonai Iehova dekenai hereva kereredia ia gwauraia. Ia be mai anina bada gaudia ia laloaboio bona sibona ia laloa bada dainai ia laloa ia be maoro. To Iehova ese ia hadibaia daika be Havaraia Tauna Badana. (Iobu 38:1-4) Unai ese Iobu ia durua ia laloparara totona, Dirava ese ia karaia gaudia ibounai be hanaihanai idia maoro. Unai dainai peroveta tauna Isaia be gabeai inai hereva ia torea, ia gwau: “Raro be Uro Karaia Tauna dekenai do ia gwau lasi: ‘Oi be dahaka oi karaia noho?’”—Isaia 45:9-12 duahia.

6. Edena bamona negana ai ita laloatao diba Iehova be aonega bona siahu bada Havaraia Tauna? (Laulau itaia danu.)

⁶ Bema Keristani tauna ta be lagani momo lalonai Iehova ia hesiai henia, reana sibona ena lalohadai dekenai do ia tabekau to Iehova bona Baibel edia hereva do ia laloa bada lasi. (Iobu 37:23, 24) To bema ta be Havaraia Tauna ena aonega bona siahu bada ia laloa dobu be edena bamona? (Isa. 40:22; 55:8, 9) Unai ese ia do ia durua ia manau bona Iehova ena lalohadai do ia abia dae.

7. Rahela be dahaka ia karaia, unai amo orea ese ia karaia senisi ia abia dae?

⁷ Slovenia ai ia noho taihu ta ladana Rahela be Havaraia Tauna laloa noho karana ese ia durua orea ese idia karaia senisi idauidau ia abia dae totona. Rahela ia gwau: “Nega haida, ia auka ita idia gunalaia taudia ese idia karaia abia hidi lau abia dae totona. Hegeregere, 2023 Hakaua Oreana Ena Ripoti #8 ai, lau itaia tok ia henia tadikaka be mai ena besoso neganai lau hoa. Unai dainai Iehova dekenai lau guriguri lau ia durua unai senisi lau abia dae totona.” Rahela ia laloparara Iehova be guba bona tanobada ena Havaraia Tauna dainai, iena orea be dala maorona ai ia hakaua noho. Bema nega haida ia auka orea ese ia karaia senisi haida oi abia dae totona, namona be mai manau ida Havaraia Tauna ena aonega bona siahu bada oi laloa dobu.—Roma 11:33-36.

DIRAVA ESE HISIHISI IA KOUA LASI ENA BADINA

8. Edena dala ai Iehova ese hisihisi ia koua lasi ena badina ita dibaia karana ese ita ia durua?

⁸ Dahaka dainai Dirava ese hisihisi ia koua lasi? Haida be unai henanadai ena haere idia davaria lasi dainai, Dirava dekenai idia badu eiava idia laloa Dirava be ia noho lasi! (Aon. 19:3) To, ita diba Iehova ese hisihisi ia havaraia lasi. Ita be kara dika bona goevadae lasi taudia dainai hisihisi ita davaria. Danu ita diba Iehova be ia haheauka dainai, taunimanima milioni momo be ia idia dibaia bona idia abia dae Iehova ese hisihisi ibounai do ia haorea. (2 Pet. 3:9, 15) Unai ita diba dainai, ita ura Iehova kahirakahira ita lao.

9. Edena bamona negadia ai Iehova ese hisihisi ia koua lasi ena badina ita laloa be namo?

⁹ Ita laloparara namona be mai haheauka ida Iehova ese hisihisi do ia haorea negana ita naria noho. To, bema ita eiava iseda lalokau taudia be kara gageva dainai ita lalometau eiava hisihisi ita davaria o ta ia mase, do ita laloa dahaka dainai Iehova be hisihisi ia koua haraga lasi. (Hab. 1:2, 3) Unai bamona negadia ai, namona be Iehova ese kara maoromaoro tauna ia davaria hisihisi ia koua lasi ena badina ita laloa.a (Sal. 34:19) Danu Iehova ena ura ita laloa, unai ura be hisihisi ibounai do ia haorea.

10. Edena dala ai Anne be ena sinana ena mase ia haheaukalaia?

¹⁰ Hisihisi idia vara ena badina ita diba neganai, unai ese ita do ia durua ita haheauka totona. Mayotte motumotu ai, taihu ta ladana Anne, ia gwau: “Lagani haida gunanai egu sinana ia mase dainai lau lalohisihisi bada. To, lau sibona lau hadibaia Iehova be hisihisi ia havaraia lasi. Iena ura badana be hisihisi do ia haorea bona idia mase vadaeni lalokau taudia do ia hatorea isi lou. Unai hereva namodia lau laloa dobu neganai, lau moale bona lalo maino lau abia.”

11. Iehova ese hisihisi ia koua lasi ena badina haida be dahaka, bona edena dala ai unai ese ita ia durua ita haroro noho totona?

¹¹ Dirava ese hisihisi ia koua lasi ena badina ita dibaia neganai, ita ia hagoadaia ita haroro noho totona. Petero be Iehova ena haheauka dainai idia helalo-kerehai taudia be mauri do idia abia ia herevalaia murinai, ia gwau: “Namona be emui kara idia helaga bona Dirava badinaia karadia umui hahedinaraia.” (2 Pet. 3:11) “Dirava badinaia karadia” ta be iseda haroro gaukara. Iseda guba Tamana bamona, ita be taunimanima ita lalokau henia. Ita ura idia danu be tanobada matamata dekenai do idia noho. Iehova be mai haheauka ida nega ia henia, unai amo iseda gabu ai idia noho taudia be ia idia tomadiho henia taudia ai idia lao diba. Dirava ida ita gaukara hebou be hahenamo badana bona dokona ia do ginidae lasi neganai, taunimanima ita durua Iehova idia dibaia totona!—1 Kor. 3:9.

ITA BE “DINA GABEDIA” AI ITA NOHO

12. Ita diba ita be “dina gabedia ai” ita noho ese edena dala ai ita ia durua?

¹² Baibel ese “dina gabedia ai” taunimanima ese do idia karaia karadia ia herevalaia namonamo. (2 Tim. 3:1-5) Hari ita itaia gaudia ese unai peroveta herevadia ia hagugurua noho. Taunimanima edia kara be ia dika ia lao noho, unai dainai ita diba momokani Dirava ena hereva be momokani.—2 Tim. 3:13-15.

13. Iesu ese ia gaukaralaia haheitalai ese edena dala ai ita ia durua? (Luka 12:15-21)

¹³ Ita diba ita be dina gabedia ai ita noho dainai, unai ese ita ia durua iseda nega ita gaukaralaia namonamo totona. Iesu ese Luka 12:15-21 ai ia gwauraia haheitalai ese unai ia hahedinaraia. (Duahia.) Unai siri ai dahaka dainai taga tauna ia gwauraia “kavakava tauna”? Unai tau ena moni bona kohu momo dainai lasi, to ia karaia abia hidi dainai unai hereva ia gwauraia. Unai tau be “sibona totona dava bada kohu ia haboudia, to Dirava ena matanai ia [be] ogogami tauna.” Ia be ena nega ia gaukaralaia namonamo, a? Dirava ese unai tauna ia hamaoroa: “Inai hanuaboi ai emu mauri do idia kokia.” Edena dala ai inai sivarai ese ita ia durua? Inai nega oromana be kahirakahira do ia ore dainai, namona be iseda nega ita gaukaralaia namonamo. Sibona dekenai ita henanadai: ‘Lau karaia abia hidi ese ia hahedinaraia lau be egu nega lau gaukaralaia namonamo, a? Egu natudia lau durua edena bamona tahua gaudia idia atoa totona? Lau be egu goada, nega, bona kohu lau gaukaralaia inai tanobada ena ura lau atoa guna totona eiava guba ai do idia dika lasi kohu lau haboua noho?’

14. Miki ena ekspiriens hegeregerena, dahaka dainai namona be ita laloatao ita be nega dokona ai ita noho?

¹⁴ Bema ita abia dae ita be nega dokona ai ita noho, unai ese ita do ia durua mauri ai edena bamona abia hidi ita karaia totona. Taihu ta ladana Miki dekenai unai ia vara. Ia gwau: “Sikuli lau haorea murinai, lau ura animal stadilaia gaukara do lau karaia. Danu lau ura regula painia gaukara do lau karaia bona pablisa momo lasi gabuna dekenai do lau lao. Kongrigeisen ai tadikaka bona taihu haida ese lau idia hagoadaia dainai, unai lau lalohadailaia. Moni gaukara bona painia gaukara do lau karaia diba eiava? Danu lau idia hadibaia inai nega oromana be kahirakahira do ia ore. To, tanobada matamatana ai, do ita mauri hanaihanai dainai animal idauidau lau stadilaia diba. Unai dainai nega kwadogina ai do lau karaia kosi ta lau abia hidi. Unai ese lau ia durua moni gaukara ta lau abia bona regula painia gaukara lau karaia noho totona, bona gabeai pablisa momo lasi gabuna Ecuador, dekenai lau lao.” Miki bona ena adavana be hari unai gabu ai sekit gaukara idia karaia noho.

15. Edena dala ai taunimanima be sivarai namona idia do abia dae noho? Haheitalai gwauraia. (Laulau itaia danu.)

¹⁵ Bema taunimanima be sivarai namona idia kamonai lasi, ita lalomanoka lasi. Badina gabeai iseda hereva do idia kamonai diba. Mani Iesu ena tadina Iamesi ena haheitalai ita laloa. Ia be Iesu ida ia tubu daekau, ia itaia Iesu be Mesia ai ia lao, bona ia itaia ena hadibaia dalana be taunimanima edia amo ia idau. To, lagani haida lalonai Iamesi be Iesu murinai ia raka lasi. Iesu ia toreisi lou murinai ena tadina be hahediba tauna goadana ai ia lao!b (Ioa. 7:5; Gal. 2:9) Emu varavara be idia ura lasi Basileia ena sivarai namona idia kamonai, oi hesiku lasi bona idia oi haroro henia noho. Laloatao ita be nega dokona ai ita noho, unai dainai iseda haroro gaukara be mai anina bada. Idia dekenai oi gwauraia gaudia be gabeai do idia laloatao, reana hisihisi bada ia matamaia negana ai do idia laloatao.c

BAIBEL ENA HAHEDIBA HEREVADIA LALOA BADA

16. Iehova ena hadibaia herevadia ese edena dala ai oi ia durua? (Maua ladana “Haida Durua Totona Gaukaralaia” itaia.)

¹⁶ Iehova ena orea ese ia printaia pablikeisen haida be Baibel ena hereva idia diba lasi taudia totona. Hegeregere, wiki ta ta idia henia pablik tok, jw.org ai idia noho atikol bona vidio haida, bona iseda pablik magasin be witnes lasi taudia totona idia karaia. To unai pablikeisen ai idia noho hadibaia herevadia ese ita ia durua danu. Badina unai amo iseda lalokau Iehova dekenai ita habadaia, Baibel dekenai iseda abidadama ia hagoadaia bona ita ia durua mai aonega ida ma haida dekenai Baibel ena hereva ita hadibaia totona.—Sal. 19:7.

17. Edena bamona negadia ai Baibel ena herevadia do oi laloa?

¹⁷ Ita be Iehova ena Witnes taudia dainai, ita moale bema Baibel ena hereva momokani dekenai diba matamata ita abia. To, danu guna Baibel ita stadilaia matamaia neganai, ita abia diba ita laloa bada badina unai ese ita ia durua Iehova kahirakahira ita lao totona. Ita dibaia hereva momokani ese ita ia durua bada. Bema ita laloa ita karaia gaudia be maoro bona Iehova ena orea amo ia mai dala ita dadaraia bona sibona iseda diba dekenai ita tabekau, namona be mai manau ida ita laloatao Iehova be ena orea ia gunalaia noho—Ia be siahu ibounai Diravana bona Havaraia Tauna mai aonega. Bema ita eiava iseda lalokau taudia be hahetoho idia haheaukalaia noho, namona be ita haheauka bona dahaka dainai Iehova ese hisihisi ia koua lasi ena badina ita laloatao. Bona namona be iseda nega bona kohu ita gaukaralaia namonamo, badina ita be nega dokona ai ita noho. Namona be Iehova ena hadibaia herevadia ese ita ia durua bona hagoadaia noho, bona ita dekenai aonega ia henia.