Dirava Ena Lalokau be Ia Noho Hanaihanai

1-2. Keristani taudia momo be dahaka hahetoho idia davaria?

LAI GUBANA ia toa neganai, mani davara ai ia hure noho bouti ta oi laloa. Hurehure badadia ese bouti idia hamarerea. Bouti be hurehure ese ia doria lao bona doria mai, to ta be dogo ia atoa neganai unai ese bouti ia dogoatao diba.

² Hahetoho oi davaria neganai, oi mamia oi be unai bouti bamona. Emu hemami ia senisi haraga. Hegeregere dina ta oi abia dae Iehova ese oi ia lalokau henia bona oi ia durua diba, to dina ma ta ai oi daradara bema Iehova ese oi davaria hahetoho ia itaia eiava lasi. (Sal. 10:1; 13:1) Danu emu turana ese oi ia hagoadaia neganai, nega sisina lalonai emu hemami do ia namo. (Aon. 17:17; 25:11) To gabeai oi daradara lou bona oi laloa Iehova ese oi ia laloa bada lasi. Hahetoho ita davaria neganai, edena bamona Iehova ena lalokau bona heduru amo goada ita abia diba, dogo ese bouti ia dogoatao hegeregerena?

3. Noho hanaihanai lalokauna ena anina be dahaka? (Salamo 31:7; 136:1, ftn.) Dahaka dainai unai lalokau hahedinaraia karana dekenai Iehova be haheitalai hereadaena? (Laulau itaia danu.)

³ Hahetoho lalonai oi gini goada totona, dala ta be Iehova ena noho hanaihanai lalokauna oi laloatao. (Salamo 31:7; 136:1 duahia.) Unai hereva “noho hanaihanai lalokauna” be ta badinaia momokani karana ia hahedinaraia. Iehova be noho hanaihanai lalokauna ena haheitalai hereadaena. Baibel ia gwau Iehova “ena lalokau be bada herea.” (Eso. 34:6, 7) Danu Baibel ese Iehova be inai bamona ia herevalaia: “Emu ladana ai idia boiboi taudia dekenai emu lalokau be bada herea.” (Sal. 86:5) Mani inai oi laloa: Iehova ese ena abidadama hesiai taudia ia rakatania lasi! Unai ita laloatao karana ese ita ia durua hahetoho lalonai ita gini goada totona.—Sal. 23:4.

IEHOVA ENA LALOKAU BE BAIBEL ENA HAHEDIBA HEREVA BADANA TA

4. Baibel ena hahediba hereva badadia haida be dahaka? Bona dahaka dainai unai hahediba herevadia ita abia dae?

⁴ Hahetoho lalonai oi gini goada totona, dala ma ta be Iehova ena lalokau be Baibel ena hahediba hereva badana ta bamona oi laloa. Oi dekenai inai hereva “Baibel ena hahediba hereva badana” ena anina be dahaka? Reana Baibel amo oi dibaia hereva momokani oi laloa, hegeregere Dirava ena ladana be Iehova, Iesu be Dirava ena Natuna korikorina bona mase taudia be gau ta idia diba lasi bona taunimanima be tanobada paradaisona ai do idia mauri hanaihanai. (Sal. 83:18; Had. 9:5; Ioa. 3:16; Apok. 21:3, 4) Unai hahediba herevadia oi abia dae neganai, do oi daradara lasi. Dahaka dainai? Badina oi laloparara unai hahediba herevadia be momokani. Iehova ena lalokau be Baibel ena hahediba herevana ta bamona oi abia dae neganai, Iehova ese oi ia laloa lasi lalohadaina oi dadaraia diba. Edena dala ai? Mani unai ita herevalaia.

5. Ta ese hahediba hereva koikoidia ia dadaraia dalana mani oi gwauraia.

⁵ Baibel oi stadilaia matamaia neganai, dahaka ese oi ia durua hahediba hereva koikoidia oi dadaraia totona? Reana emu tomadiho gunana ai oi dibaia gaudia be Baibel ida oi hahegeregerea. Haheitalai ta be: Guna oi laloa Iesu be Siahu Ibounai Diravana. To Baibel oi stadilaia matamaia neganai, sibona oi nanadaia, ‘Unai hahediba herevana be momokani, a?’ Baibel oi stadilaia murinai, oi hamomokania unai hahediba herevana be koikoi. Baibel ena hereva hegeregerena oi abia dae, Iesu be “Dirava ese ia havaraia gaudia ibounai amo ia be ginigunana” bona “Dirava ena Natuna korikorina.” (Kol. 1:15; Ioa. 3:18) Momokani, hahediba hereva koikoidia be “goada momokani gaudia” bamona bona ia auka ita kokia totona. (2 Kor. 10:4, 5) To hereva momokani oi abia dae murinai, guna oi abia dae hahediba hereva koikoidia oi dadaraia momokani.—Fili. 3:13.

6. Dahaka dainai oi abia dae diba ‘Iehova ena lalokau be do ia noho hanaihanai’?

⁶ Baibel ese Iehova ena lalokau ia herevalaia dalana dekenai unai bamona oi karaia diba. Hahetoho oi davaria neganai, bema oi daradara Iehova ese oi ia lalokau henia eiava lasi, namona be sibona oi nanadaia, ‘Egu laloa dalana be ia maoro, a?’ Bema oi daradara Iehova ese oi ia lalokau henia eiava lasi, inai stadi ena siri badana Salamo 136:1 ena hereva oi laloa. Bona oi henanadai, ‘Dahaka dainai Iehova ia gwau ena lalokau be ia noho hanaihanai?’ Dahaka dainai inai hereva “iena lalokau be ia noho hanaihanai” be unai karoa lalonai ia gwauraia momo? Ita herevalaia bamona, Baibel ena hahediba hereva badana ta be Iehova ese ena taunimanima ia lalokau henia. Unai dainai Iehova ese oi ia lalokau henia lasi eiava oi ia laloa lasi lalohadaina be koikoi. Namona be unai lalohadai oi dadaraia momokani, hahediba hereva koikoidia ibounai oi dadaraia hegeregerena!

7. Iehova ena lalokau ia herevalaia Baibel siri haida oi gwauraia.

⁷ Baibel ena hereva haida ese idia hamomokania Iehova be ita ia lalokau henia. Hegeregere, Iesu ese ena hahediba taudia ia hamaoroa: “Umui ese unai manu maragidia ibounai umui hereaia.” (Mat. 10:31) Bona Iehova ese ena taunimanima ia hamaoroa, ia gwau: “Lau ese oi do lau hagoadaia, oibe, oi do lau durua, egu kara maoromaoro imana idibana amo oi do lau dogoatao.” (Isa. 41:10) Unai siri edia hereva be momokani. Badina Iesu ia gwau lasi, ‘Reana manu maragidia ibounai umui hereaia,’ to ia gwau “Unai manu maragidia ibounai umui hereaia.” Bona Iehova ia gwau lasi, ‘Reana umui do lau durua,’ to ia gwau, “Oi do lau durua.” Bema hahetoho oi davaria lalonai oi daradara bema Iehova ese oi ia lalokau henia eiava lasi, unai siri namodia ese oi do idia hagoadaia bona danu do oi abia dae Iehova ese oi ia lalokau henia bada. Mai guriguri ida 1 Ioane 4:16 ena hereva oi laloa dobu, ia gwau: “Ita diba bona abia dae Dirava ese ita ia lalokau henia.”a

8. Bema oi daradara Iehova ese oi ia lalokau henia eiava lasi, dahaka oi karaia diba?

⁸ Bema oi daradara Iehova ese oi ia lalokau henia eiava lasi be edena bamona? Oi laloa gauna be oi dibaia gauna ida oi hahegeregerea. Iseda lalohadai be nega haida ia maoro lasi, to Iehova ena lalokau be Baibel amo ita dibaia gauna bona ia be momokani. Bema ita laloa Iehova ese ita ia lalokau henia lasi, ita be Iehova ena kara badana lalokau ita dadaraia unai.—1 Ioa. 4:8.

IEHOVA ESE OI IA LALOKAU HENIA KARANA OI LALOA

9-10. Ioane 16:26, 27 ai Iesu ia gwau: “Tamana be umui ia lalokau henia,” ena hereva ena anina be dahaka? (Laulau itaia danu.)

⁹ Iesu ese ena hahediba taudia ia hamaoroa, ia gwau: “Tamana be umui ia lalokau henia.” Unai hereva ita laloa neganai, Iehova ena lalokau do ita lalopararalaia. (Ioane 16:26, 27 duahia.) Iesu be unai hereva ia gwauraia lasi, ena hahediba taudia hamoalea totona. Badina unai siri ena badina siridia ita duahia neganai, ia hahedinaraia unai nega ai Iesu be edia hemami ia herevalaia lasi, to ia be guriguri ia herevalaia.

¹⁰ Iesu ese ena hahediba taudia ia hadibaia, idia be ia amo Iehova idia guriguri henia diba, to ia dekenai lasi. (Ioa. 16:23, 24) Unai idia diba be mai anina bada. Iesu ia toreisi lou murinai, reana idia ura Iesu idia guriguri henia, badina Iesu be edia turana namona. Idia laloa Iesu be idia ia lalokau henia dainai ia ura edia noinoi ia kamonai bona ena Tamana ia noia idia ia durua totona. To Iesu ia gwau unai bamona idia laloa lasi be namo. Dahaka dainai? Badina Iesu ia gwau: “Tamana be umui ia lalokau henia.” Unai be guriguri karana ena hahediba hereva badana ta. Oi dekenai unai ena anina oi laloa: Baibel oi stadilaia neganai Iesu oi dibaia bona Iesu oi lalokau henia. (Ioa. 14:21) To hahediba taudia ginigunadia bamona, Dirava oi guriguri henia diba badina oi abia dae ia be oi ia lalokau henia. Iehova oi guriguri henia negadia ta ta ai oi hahedinaraia unai hereva oi abidadama henia.—1 Ioa. 5:14.

OI DEKENAI DARADARA IDIA HAVARAIA GAUDIA OI DIBA

11. Bema Iehova ena lalokau dekenai ita daradara, dahaka dainai Satani ia moale?

¹¹ Oi dekenai daradara idia havaraia gaudia be dahaka? Reana oi gwau diba Satani ese ia havaraia gaudia, bona unai be momokani. Diabolo be laiona bamona ita ia tahua noho ia ania ore totona, bona Iehova ena lalokau ita daradaralaia neganai ia moale. (1 Pet. 5:8) Iehova be ita ia lalokau henia dainai mauri davana ia henia. To Satani ia ura ita laloa mauri davana be hegeregere lasi iseda dika gwauatao totona. (Heb. 2:9) Bema unai bamona ita laloa, bona bema ita lalohisihisi dainai iseda hesiai gaukara ita hadokoa, Satani do ia moale. Unai dainai ena “koikoi karadia” amo ia ura ita laloa Iehova ese ita ia lalokau henia lasi bona iseda dika do ia gwauatao lasi. (Efe. 6:11) To unai be koikoi. Laloatao, Iehova ese Satani ia inai henia. Iseda inai tauna ia ura karaia gauna ita lalopararalaia neganai, iseda lalona do ita hadaia ‘Diabolo ita inai henia’ totona.—Iam. 4:7.

12-13. Ita be kara dika taudia dainai, edena dala ai Iehova ena lalokau ita daradaralaia diba?

¹² Ita be kara dika taudia dainai Iehova ena lalokau ita daradaralaia diba. (Sal. 51:5; Roma 5:12) Kara dika ese iseda hetura karana iseda Havaraia Tauna ida ia hadikaia. Danu iseda laloa dalana, iseda hemami, bona iseda helt ia hadikaia.

¹³ Ita abia kara dika dainai ita mamia kerere ita karaia diba, ita lalohisihisi, ita gari bona hemarai. Kara dika ita karaia neganai, unai bamona hemami ita abia diba. To unai bamona hemami ita abia badina hanaihanai do ita laloa ita be kara dika taudia, unai be Dirava ese taunimanima ia karaia dalana hegeregerena lasi. (Roma 8:20, 21) Motuka ta ena taia ia dika neganai, do ia heau namonamo lasi. Unai hegeregerena, ita be goevadae lasi taudia dainai, gau haida ita karaia namonamo lasi. Unai dainai ita hoa lasi, bema Iehova ese ita ia lalokau henia lasi lalohadaina ita abia. Bema unai ia vara, namona be ita laloatao, Iehova ‘be Dirava badana bona hoa kara badadia ia karaia, ia idia lalokau henia bona ena oda hereva idia badinaia taudia dekenai ena lalokau ia hahedinaraia noho bona ena gwauhamata ia hagugurua.’—Neh. 1:5.

14. Edena dala ai mauri davana ita laloa dobu karana ese ita ia durua Iehova ese ita ia lalokau henia lasi lalohadaina ita dadaraia totona? (Roma 5:8) (Maua ladana, “‘Kara Dika Ena Koikoi Siahuna’ amo Sibona Ita Gimaia” itaia.)

¹⁴ Oibe, nega ta ta ai do ita laloa ita hegeregere lasi Iehova ese ita ia lalokau henia totona. Laloatao, ita be gau ta ita karaia diba lasi Iehova ese ita ia lalokau henia totona, to ia ese ita ia lalokau henia dainai, mauri davana ia henia kara dika amo ita ia hoia totona. (1 Ioa. 4:10) Danu, Iesu ia mai kara dika taudia ia hamauria totona. (Roma 5:8 duahia.) Ita ibounai be kerere ita karaia diba, bona Iehova be unai ia diba. Iseda lalona ai ia noho kara dika dainai inai bamona ita laloa diba, ita be hegeregere lasi Iehova ese ita ia lalokau henia totona. To bema unai lalohadai kererena ita lalopararalaia, do ita ura unai lalohadai ita dadaraia.—Roma 7:24, 25.

IEHOVA BADINAIA NOHO

15-16. Bema Iehova ita badinaia noho, namona be dahaka ita diba, bona dahaka dainai? (2 Samuela 22:26)

¹⁵ Iehova ia ura abia hidi maorona ita karaia, unai be ‘ia do ita badinaia noho.’ (Deu. 30:19, 20) Bema unai bamona ita karaia, ita diba ia ese ita do ia rakatania lasi. (2 Samuela 22:26 duahia.) Iehova ita badinaia noho neganai, ita abia dae iseda mauri ai herevana dahaka ia vara, ia ese ita do ia durua.

¹⁶ Ita herevalaia bamona, badina momo idia noho hahetoho ita haheaukalaia totona. Baibel ese ia hahedinaraia Iehova be ita ia lalokau henia bona ita do ia durua, bona unai ita abia dae. Bema ita daradara Iehova ese ita ia lalokau henia eiava lasi, namona be ita diba gaudia ita laloa, to iseda hemami dekenai ita trast lasi. Ita ura ita abia dae Iehova ese ita do ia lalokau henia ela bona hanaihanai, Baibel ese ita ia hadibaia hegeregerena.