Duahia Taudia Edia Henanadai

Kahirakahira Iehova ese dahaka “lalohadai” be bese idauidau edia kudouna ai do ia atoa?

Apokalupo 17:​16, 17 ese hisihisi badana ena matamana ia herevalaia neganai, ia gwau: “Oi itaia vadaeni doana 10 bona dagedage animal ese ariara hahine do idia inai henia bona ena gau ibounai do idia kokia bona kopina kavakava do idia rakatania. Vadaeni iena tauanina do idia ania, bona lahi dekenai do idia gabua ore. Badina Dirava ese iena palani [“lalohadai,” BHḡ] be edia kudouna dekenai ia atoa, iena ura idia hagugurua totona, oibe, edia lalohadai tamona hagugurua totona, idia ese dagedage animal dekenai edia basileia do idia henia.” Guna iseda pablikeisen idia gwau, Iehova ese bese idauidau edia kudouna dekenai do ia atoa “lalohadai” be tomadiho koikoi do idia hadikaia ore.

To, diba matamata ita abia. Unai be Iehova ese bese idauidau edia kudouna dekenai do ia atoa “lalohadai” be idia ese “dagedage animal dekenai edia basileia do idia henia.” Unai ena guguru dalana ita lalopararalaia totona, inai henanadai haida do ita laloa.

Peroveta herevana lalonai daidia ia herevalaia? “Ariara hahine” be idia gwauraia danu “Babulonia Badana”; unai be tanobada ena tomadiho koikoi orea ibounai ia laulaulaia. “Dagedage animal kakakakana” be lagani 1919 ai ia gaukara matamaia maino oreana ta, League of Nations bona hari idia gwauraia United Nations. (Apok. 17:​3-5) “Doana 10” be dagedage animal idia durua gavamani oreadia ia laulaulaia.

Ariara hahine bona dagedage animal kakakakana be edena dala ai idia gaukara hebou? Ariara hahine be dagedage animal “latanai ia helai,” anina be ariara hahine ese ia durua bona ia biagua.

Ariara hahine dekenai dahaka do ia vara? Dagedage animal bona ia do ia durua doana 10 ese “ariara hahine do idia inai henia.” Unai dainai hahine ena kohu ibounai do idia kokia bona ena kara dika do ia hedinarai. Bena idia ese ia do idia hadikaia ore. Iehova ese ia gwauraia gauna do ia guguru. (Apok. 17:1; 18:8) Unai nega ai tomadiho koikoi oreadia ibounai do idia ore. To, unai ia do vara lasi neganai, Iehova ese bese idauidau do ia gaukaralaia, guna ia vara lasi gauna ta do idia karaia totona.

Iehova ese bese idauidau do ia gaukaralaia dahaka idia karaia totona? Iehova ese doana 10 ena kudouna ai ena lalohadai do ia atoa, unai lalohadai be edia goada bona siahu be unai dagedage animal kakakakana, United Nations dekenai idia henia. (Apok. 17:13) Unai ena anina mani oi laloa. Taunimanima edia gavamani be sibona edia lalohadai amo edia goada bona siahu be dagedage animal dekenai do idia henia, a? Lasi! Peroveta herevana ese ia hahedinaraia, Dirava sibona ese idia do ia gaukaralaia unai idia karaia totona. (Aon. 21:1; Isaia 44:28 hahegeregerea.) Unai be metairametaira do ia vara, a? Lasi! To, do ia vara haraga! Bena dagedage animal be siahu ia abia dainai Iehova ena hahemaoro karana be tomadiho koikoi oreadia ibounai latanai do ia mailaia bona do ia haorea momokani.

Vaira nega ai dahaka do ia vara? Namo lasi ita laloa gavamani be metairametaira United Nations do idia durua. Badina unai be do ia vara haraga. Iehova be bese idauidau edia kudouna ai ena lalohadai ia atoa, unai amo edia goada bona siahu be dagedage animal dekenai do idia henia. Unai ia vara neganai, do ita diba kahirakahira hisihisi badana do ia matamaia. Hari, “namona be ita noga noho bona ita laloa maoromaoro noho.” Badina kahirakahira unai senisi be karaharaga do ia vara!—1 Tes. 5:6.