Edena Dala ai, Baibel ese Oi Ia Durua Diba Drag Abia Karana Oi Hadokoa Totona?

Lagani ta ta ai, taunimanima milioni be drag idia abia bona gaukaralaia kerere dainai idia mase. COVID-19 pendemik negana ai, unai problem ia bada herea. Baibel ena aonega hereva ese momo ia durua unai kara idia hadokoa totona. Bema unai kara dainai oi hekwarahi noho, Baibel ese oi ia durua diba.a

Inai atikol ai

Dahaka dainai Baibel ena heduru oi tahua be namo drag abia karana oi hadokoa totona?

Tahua gaukarana ese ia hahedinaraia taunimanima be drag idia abia badina idia mamia idia be sibona idia noho, idia lalohekwarahi bona lalometau. Baibel ese oi do ia durua emu abidadama oi hagoadaia, unai amo oi davaria metau idauidau do oi hanaia. Baibel ese Dirava tura henia dalana ia hadibaia. (Salamo 25:14) Dirava ena heduru amo emu hekwakwanai oi hamaoromaoroa diba.—Mareko 11:22-24.

Drag abia karana oi hadokoa ena dala foa

1. Iehova Dirava oi dibaia. b (Ioane 17:3) Ia be Havaraia Tauna bona iena Siahu be ia doko diba lasi. Danu, ia be emu lalokau guba Tamana. Ia ura oi ia tura henia bona ena siahu ia gaukaralaia oi durua totona. (Isaia 40:29-31; Iamesi 4:8) Bema iena lalokau karana oi abia dae, ia gwauhamatalaia vaira nega namona do oi abia.—Ieremia 29:11; Ioane 3:16.
2. Iehova ena heduru oi noia. Dirava ena heduru totona oi guriguri, drag abia karana oi hadokoa totona, unai amo oi “helaga [o goeva], bona Dirava ese [oi] ia moalelaia.” (Roma 12:1) Iena lauma helaga, eiava gaukarana siahuna amo, oi dekenai “taunimanima edia siahu ia hereaia gauna” do ia henia. (2 Korinto 4:7; Luka 11:13) Unai siahu ese oi do ia durua drag oi gaukaralaia kerere lasi bona Dirava ia hamoalea “mauri matamata” oi hahedinaraia totona.—Kolose 3:9, 10.
3. Dirava ena laloa dalana oi abia. (Isaia 55:9) Ia ese oi do ia durua ‘emu lalona oi hamatamataia noho’ eiava laloa dalana oi haidaua, unai amo drag abia karana do oi hadokoa. (Efeso 4:23) Dirava ena lalohadai be Baibel ai, bona hanaihanai oi duahia be mai anina bada. (Salamo 1:1-3) Momo be Baibel ena hahediba hereva lalopararalaia totona ma haida amo heduru idia tahua. (Kara 8:30, 31) Iehova ena Witnes taudia be oi ida davana lasi Baibel stadi kosi idia karaia diba. Danu emai hebou dekenai oi mai diba, unuseniai, iseda mauri ai Baibel ena hereva badinaia daladia ai herevalaia.
4. Tura namodia oi abia hidi. Tura namodia ese oi idia durua, drag abia karana oi hadokoa totona. (Aonega Herevadia 13:20) Dirava ese oi durua totona ia idia tomadiho henia turadia ia henia. (Salamo 119:63; Roma 1:12) Namona be moale karadia dekenai, oi itaia, kamonai, bona duahia gaudia oi abia hidi namonamo. Oi do ia durua lasi gaudia oi dadaraia, badina unai ese oi karaia abia hidi maorona ia hadikaia diba.—Salamo 101:3; Amosa 5:14.

Oi do ia durua Baibel siridia

Salamo 27:10: “Ena be egu tamana bona sinana ese lau idia rakatania, to Iehova ese lau do ia abia dae.”

“Egu tamana korikorina lau diba lasi, bona toana be lau boio. To Iehova Dirava be Tau korikorina ta bamona lau ia lalokau henia bada lau dibaia neganai, lau mamia egu mauri be mai anina bada bona drag abia karana lau hadokoa.”—Wilby, Haiti amo.

Salamo 50:15: “Hisihisi negadia ai lau dekenai umui boiboi. Lau ese umui do lau hamauria.”

“Lau dekenai drag abia karana ena hahetoho ia vara neganai, nega momo unai siri ese lau ia hagoadaia. Iehova ese ena gwauhamata hegeregerena lau ia durua.”—Serhiy, Ukraine amo.

Aonega Herevadia 3:5, 6 “Mai emu kudouna ibounai ida Iehova oi abidadama henia, bona sibona emu diba dekenai oi tabekau lasi. Oi karaia gaudia ibounai lalonai Dirava oi laloa, bona ia ese emu raka dalana do ia hamaoromaoroa.”

“Inai siri ese lau ia durua sibona dekenai lau tabekau lasi, to Iehova dekenai. Iena heduru amo egu mauri lau haidaua momokani.”—Michele, Italy amo.

Isaia 41:10: “Oi gari lasi, badina lau be oi ida. Oi laloa momo lasi, badina lau be emu Dirava. Lau ese oi do lau hagoadaia, oibe, oi do lau durua, egu kara maoromaoro imana idibana amo oi do lau dogoatao.”

“Drag lau abia lasi neganai, egu lalohekwarahi be ia bada herea. To, unai siri amo lau diba momokani, Dirava ese lau ia durua egu lalohekwarahi lau hanaia totona. Oibe, lau ia durua.”—Andy, South Africa amo.

1 Korinto 15:33: “Namo lasi haida ese umui idia koia. Hebamo dikadia ese ta ena kara namodia idia hadikaia diba.”

“Hebamo dikadia dainai drag lau abia bona unai lau manadalaia. Hebamo dikadia lau rakatania neganai unai kara lau hadokoa. Tura namodia lau bamoa edia kara lau moalelaia.”—Isaac, Kenya amo.

2 Korinto 7:1: “Namona be tauanina bona lalona hamiroa gaudia ibounai amo ita goeva.”

“Unai hereva ese lau ia durua egu tauanina hamiroa gaudia amo sibona lau hagoevaia bona egu mauri idia hadikaia gaudia lau rakatania.”—Rosa, Colombia amo.

Filipi 4:13: “Badina lau dekenai siahu ia henia tauna amo goada lau abia gau ibounai lau karaia totona.”

“Lau diba sibona egu goada amo drag abia karana lau hadokoa diba lasi dainai, Dirava ena heduru totona lau guriguri. Ia ese lau ia durua.”—Patrizia, Italy amo.

Baibel ena heduru amo haida be drag idia dadaraia ena ekspiriens ma haida

Joseph Ehrenbogen be dagedage maurina lalonai ia tubu daekau bona nega momo ia kekero, kuku, mariuana, heroin o drag ia abia. Drag ia abia momo dainai kahirakahira ia mase. To, Baibel ena hereva ia abia dae dainai ena mauri ia haidaua diba. Iena sivarai oi duahia diba unai atikol ai “I Learned to Respect Women and Myself.”

Dmitry Korshunov be alkohol abia karana dadaraia totona ia hekwarahi bada. Inai vidio ‘Egu Mauri Lau Hesikulaia’ ese heduru ia abia dalana ia hahedinaraia.

Drag abia karana hadokoa totona ita abia medikol heduru be Baibel ese ia taravatua, a?

Lasi. Baibel ia gwau “Gorere lasi taudia be doketa idia tahua lasi, to gorere taudia sibona ese idia tahua.” (Mataio 9:12) Unai hegeregerena U.S. National Institute on Drug Abuse ia gwau : “Drag idia abia taudia edia gorere lalopararalaia be auka. Bona drag idia abia karana hadokoa totona lalohadai maorona bona lalogoada ida unai idia karaia be namo.” Momokani, Dirava ia henia heduru ese ta ena ura o goada ia hereaia. To unai kara idia rakatania taudia momo ese Baibel ena sisiba idia badinaia bona medikol heduru idia abia.c Hegeregere tau ta ladana Allen ia gwau: “Inuinu kekero karana lau rakatania neganai egu tauanina dekenai hisihisi bada lau abia. Unai negai lau laloparara Baibel amo heduru lau abia sibona lasi, to medikol heduru danu lau abia be namo.”

Gorere hanamoa totona ita abia muramura o drag be Baibel ese ia taravatua, a?

Lasi. Gorere bona ta ia mase gwauraia neganai ia abia hisihisi hamaragia totona, alkohol idia gaukaralaia sivaraina be Baibel ese ia herevalaia. (Aonega Herevadia 31:6; 1 Timote 5:23) To, hisihisi hamaragia totona drag idia gaukaralaia momo taudia be unai kara dekenai idia manada. Unai dainai ena be drag o muramura ita abia hisihisi hamaragia totona, to ena dika ita diba be namo.—Aonega Herevadia 22:3

a Ena be inai atikol ese drag abia karana hadokoa ia herevalaia, to Baibel ena hakaua hereva haida ese alkohol, kuku, aniani, laki gadara, ponografi o social media ena hahetoho hanaia totona idia hekwarahi taudia ia durua diba.

b Iehova be Dirava ena ladana korikorina. (Salamo 83:18) Inai atikol itaia “Iehova be Daika?”

c Drag abia taudia ese hospitol o unai bamona gabudia dekenai, heduru idia abia diba. To namona be idia tahua namonamo bona medikol heduru maorona idia abia hidi.—Aonega Herevadia 14:15.