7
Dirava Ena Palani be Kahirakahira Do Ia Hagugurua
1 Ena be nega daudau lalonai Dirava ese dika bona hisihisi ia koudia lasi, to do ia hadokodia. Baibel ia gwau do ia koudia lasi ela bona ia gwauraia hidi guna negana do ia ginidae.
2 “Gau iboudiai be mai edia nega korikori.” (Kohelete 3:1) Dirava ese kara dika bona hisihisi ia koudia lasi negana do ia ore neganai, do ia haoredia, bena matamanai ia lalohadailaia palanina do ia hagugurua. Taunimanima goevadaedia mai moaledia ese tanobada do idia hahonua; Paradaiso lalonai maino ai do idia noho namonamo.
Dirava ena Hahemaoro Karadia
3 Dirava ese taunimanima do ia kara henidia karadia, iena hahemaoro karadia, be Baibel ena peroveta herevadia momo ese idia gwauraidia. Mani idia haida oi lalodia:
4 “Kara maoromaoro taudia be tanobada do idia noholaia, bona kerere lasi taudia be ia lalonai do idia noho. To kara dika taudia be tanobada amo do ia negedia, bona kerere taudia be tanobada amo do ia ragadia oho.”—Hereva Lada-isidia 2:21, 22.
5 “Kara dika taudia do ia haoredia, to Iehova idia naria taudia be tanobada do idia abia. Nega sisina murinai, kara dika tauna do ia noho lasi. . . . To manau taudia ese tanobada do idia abia, bona maino bada do idia moalelaia dikadika.”—Salamo 37:9-11.
6 “Iehova oi naria, iena dala ai oi raka, bena oi do ia abia dae, tano do oi abia oiemu. Kara dika taudia do ia haoredia neganai, unai do oi itaia. Kerere lasi tauna oi raraia bona kara maoromaoro tauna oi itaia noho, badina be dina vairai ia ese maino do ia abia. To kara dika taudia do ia hamasedia ore; dina vairai do ia utudia oho.”—Salamo 37:34, 37, 38.
7 Siahu Ibounai Diravana ena lohia siahuna idia abia dae taudia edia nega vaira do ia namo herea. Unai dainai ita ia sisiba henia, ia gwau: “Natugu e, egu taravatu oi laloaboio lasi, bona emu lalona ese egu hahegani do ia badinadia, badina be idia ese emu mauri dinadia bona emu mauri laganidia do idia hadaudaudia bona maino oi do idia henia.” Momokani, Dirava ena ura idia karaia taudia be mauri hanaihanai do ia henidia! Unai dainai Baibel ese ita ia sisiba henia, ia gwau: “Iehova oi abidadama henia mai emu lalona ibounai ida, bona oi sibomu emu lalo-parara oi abidadama henia lasi. Emu dala iboudiai lalodiai ia oi laloa, bena ia ese emu dala do ia hamaoromaorodia.”—Hereva Lada-isidia 3:1, 2, 5, 6.
Dirava be Guba amo Do Ia Lohia
8 Dirava ese gavamani namo hereana amo tanobada do ia hagoevaia. Hari gavamani ese guba aonegana ia hahedinaraia, badina be guba amo ia lohia, Dirava ena siahu henunai. Taunimanima edia gavamani iboudiai tanobada amo do ia kokidia, bena sibodia edia lohia daladia do idia haginidia lou diba lasi, ela bona hanaihanai.
9 Daniel 2:44 ia gwau: “Unai pavapava [hari idia noho gavamanidia] edia negai guba Diravana ese basileia ta [guba ai] do ia haginia, nega ta ai do idia hadikaia ore diba lasi gauna. Bena ena lohia siahuna do ia hanai lasi bese idauna ta dekenai [taunimanima be Dirava ena lohia siahuna do idia dadaraia lou diba lasi]. Unai basileia iboudiai [hari idia noho] be do ia hamakohidia maragimaragi bona do ia haoredia, bena ia sibona do ia gini ela bona hanaihanai.”—Apokalupo 19:11-21; 20:4-6 danu itaia.
10 Anina be, taunimanima ese lohia daladia kereredia do idia abidia lou lasi, badina be Dirava ese inai nega do ia hadokoa murinai, taunimanima be sibodia edia gavamani do idia haginidia lou diba lasi. Bona guba amo do ia lohia Basileiana do idia hakererea lasi, badina be Dirava ese ia havaraia bona ia naria. Unai Basileia ese taunimanima do ia hanamodia bada. Dirava ena ura be tanobada ai do idia karaia, guba ai idia karaia bamona. Unai dainai Iesu ese ena hahediba taudia ia hadibadia Dirava do idia guriguri henia, do idia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mataio 6:10.
Ia Kahirakahira A?
11 Nega ede daudauna do ita naria bena inai nega dikana do ia doko bona Dirava ena tanobada matamatana do ia vara? Baibel ena peroveta herevadia ese ita idia hadibaia goevagoeva. Iesu ese toa ta ia gwauraia, do ita itaia neganai do ita diba “tanobada dokona” be kahirakahira. Iena hereva be Mataio karoa 24 bona 25, Mareko 13, bona Luka 21 lalodiai. Bona 2 Timoteo karoa 3 lalonai aposetelo Paulo ese ‘nega dokona’ ia perovetalaia, unai negai do idia vara gaudia do idia hahedinaraia dokona be kahirakahira.
12 Iesu ia gwau, inai nega ena matamana ai “bese ta ese do ia toreisi, bese ta do ia tuari henia . . . Gabu idauidau dekenai hitolo bada do ia vara, tano danu do ia mareremarere.” (Mataio 24:7) Ma ia gwau “ta ta dekenai do ia hanaia gorerena do idia vara” bona “kara dikadia danu do idia vara gabu idauidau dekenai.”—Luka 21:11; Mataio 24:12.
13 Aposetolo Paulo ia gwau: “Nega dokonai metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea.”—2 Timoteo 3:1-5, 13.
14 Iesu bona Paulo ese idia perovetalaidia gaudia be iseda negai idia vara vadaeni a? Oibe. Tanobada Ibounai Tuarina Ginigunana ese tuari gunadia iboudiai ia hereadia bona tanobada ia haidaua vaitani. Unai tuari murinai, doe, dai-hanai goreredia, bona hisihisi ma haida idia vara. Lagani 1914 amo unai gau be “hisihisi nega ena hamatamaia sibona.” (Mataio 24:8) ‘Nega dokona’ idia hamatamaia, Dirava ese kara dika bona hisihisi ia koudia lasi negana ena dokona unai.
15 Hanaia laganidia 90 bamona lalodiai idia vara gaudia be oi diba reana. Taunimanima 100 milion be tuari ai idia aladia mase. Milion momo be hitolo bona gorere dainai idia mase. Tano-laga ese momo herea idia hamasedia. Ala-ala bona henaohenao dainai taunimanima idia gari. Kara maoromaoro idia negea. Idia momo daekau haraga dainai idia vara hekwakwanaidia be idia haoredia diba lasi. Hodahoda, ranu, bona tano idia hamirodia dainai dika idia davaria. Momokani, lagani 1914 amo ema ita be nega dokona lalonai ita noho, bona eda nega perovetalaia herevadia hamomokanidia guguru negana be ia kahirakahira.
16 Inai nega dokona be ede daudauna? “Hisihisi nega ena hamatamaia,” lagani 1914 amo ia hedinarai, be Iesu ese ia gwauraia, ia gwau: “Inai nega idia noho taudia do idia mase ore lasi neganai be inai gaudia ibounai do idia vara.” (Mataio 24:8, 34-36) Anina be, nega dokona gaudia iboudiai be uru tamona ena nega lalonai do idia vara, lagani 1914 uruna unai. Lagani 1914 ai idia mauri noho taudia haida be do idia mauri noho ela bona inai nega do ia doko. Hari inai negai unai uru taudia be idia buruka momokani; unai ese ia hahedinaraia Dirava ese inai nega do ia hadokoa negana be kahirakahira.
17 Peroveta herevana ma ta ese ia hahedinaraia inai nega ena dokona be ia kahirakahira momokani. Aposetolo Paulo ia gwau: “Lohiabada ena Dina be do ia mai, henaoa tauna hanuaboi neganai ia mai bamona. Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae . . . Do idia roho mauri diba lasi.”—1 Tesalonika 5:2, 3; ma Luka 21:34, 35 danu itaia.
18 Hari inai negai America bona Russia edia inai heheni karana ia ore dainai, reana tanobada besedia idia laloa tuari badana ta do ia vara lasi, bona tanobada naria dalana matamatana be kahirakahira do idia davaria. To do idia laloa idia kwalimu noho neganai, idia laloa lasi gauna be do ia vara, badina be unai be toa ginigabena, do ia hahedinaraia Dirava ese inai tanobada ena orea do ia hadikadia ore negana be kahirakahira momokani. Mani oi laloa, politikol gwauhamatadia ese taunimanima idia haidaudia momokani lasi. Unai gwauhamata dainai idia lalokau heheni lasi. Bona tanobada gunalaia taudia ese raskol karadia, gorere, bona mase idia haoredia lasi. Unai dainai, maino bona noho namo idia havaradia toho taudia oi abidadama henidia lasi, oi gwau lasi tanobada ena hekwakwanai do idia haoredia. (Salamo 146:3) Unai bamona boiboina ena anina be tanobada ena dokona be kahirakahira momokani.
Sivarai Namona Harorolaia
19 Iesu ena peroveta herevana ma ta ese ia hahedinaraia lagani 1914 amo ema ita be nega dokona lalonai ita noho. Ia gwau: “Sivarai Namo bese ibounai dekenai be do idia haroro henia guna.” (Mareko 13:10) Eiava Mataio 24:14 hegeregerena: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”
20 Hari inai negai, tano iboudiai lalodiai, Iehova ena Witness taudia milion milion ese sivarai namona idia harorolaia noho, idia gwau inai tanobada do ia doko bena Dirava ena Basileia henunai Paradaiso be tanobada matamatana ai do ia vara.
21 Iehova ena Witness taudia ese danu edia kara amo idia hahedinaraia idia be Keriso ena orea taudia momokanidia, badina be ia gwau: “Taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” Tanobada hegegemadai lalokau ese Iehova ena Witness taudia ia kwatudia hebou.—Ioane 13:35; ma Isaia 2:2-4; Kolose 3:14; Ioane 15:12-14; 1 Ioane 3:10-12; 4:20, 21; Apokalupo 7:9, 10 danu itadia.
22 Iehova ena Witness taudia ese Baibel ena hereva idia abia dae: “Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.” (Kara 10:34, 35) Edia orea taudia tano iboudiai lalodiai be edia tadikaka bona edia taihu idia gwauraidia, edia bese o edia kala be herevana. (Mataio 23:8) Bona inai bamona oreana be tanobada hegegemadai ia noho ese ia hahedinaraia kahirakahira Dirava ese ena palani do ia hagugurua.
[Study Questions]
1, 2. Dahaka dainai ita diba momokani Dirava ese kara dika bona hisihisi do ia haoredia?
3, 4. Hereva Lada-isidia bukana ese Dirava ena hahemaoro karadia edena bamona ia gwauraidia?
5, 6. Salamo 37 ese Dirava ena kara ena anina edena bamona ia hahedinaraia?
7. Dirava ena sisiba herevana namona be dahaka?
8, 9. Dahaka amo tanobada do ia hagoevaia?
10. Dahaka dainai ita diba momokani Dirava ena guba Basileiana henunai lohia dalana do idia hakererea lou diba lasi?
11. Edena karoa Baibel lalonai ese idia hahedinaraia inai nega ena dokona be kahirakahira?
12, 13. Iesu bona Paulo ese nega dokona edena bamona idia gwauraia?
14, 15. Idia vara gaudia ese edena bamona idia hamomokania ita be nega dokona lalonai ita noho?
16. Nega dokona be ede daudauna?
17, 18. Edena peroveta herevana ese ia hahedinaraia tanobada dokona be kahirakahira momokani?
19, 20. Edena peroveta herevana, nega dokona ena haroro gaukarana herevana, be hari ia momokani?
21, 22. Dahaka ese ia hahedinaraia Iehova ena Witness taudia be Keristen taudia momokanidia?
[Picture on page 26]
Dirava ena guba gavamani goevadaena mo sibona ese taunimanima do ia lohiadia