Mamoe Oreana Naria Taudia

IESU be tanobada ai ena hesiai gaukara ia karaia lalonai ia hamomokania ia be “mamoe naria tauna namona.” (Ioa. 10:11) Iesu ese iena murinai idia raka hutuma ia itaia neganai, “ia hebogahisi henidia, badina idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” (Mat. 9:36) Petero bona aposetolo taudia ma haida ese iena lalokau karana idia itaia. Iesu be Israela taudia idia naria taudia amo ia idau momokani, idia ese edia mamoe oreana idia naria lasi dainai, mamoe be gabu idauidau dekenai idia lao bona Dirava ena hereva totona idia hitolo bada! (Ese. 34:7, 8) Aposetolo taudia ese Iesu ena hadibaia dalana, mamoe ia naridia dalana, bona idia totona ena mauri ia henia karana ese idia ia hadibaia, abidadama taudia idia durua Iehova, ‘edia mauri ia naria tauna’ dekenai idia giroa lau totona.​​—1 Pet. 2:25.

² Nega ta Iesu be Petero ia hereva henia neganai, ia hahedinaraia mamoe ubua bona naria gaukarana be mai anina bada. (Ioa. 21:15-17) Petero be unai hagoadaia herevana ese ena kudouna ia hamarerea bona gabeai Keristani kongrigeisen ginigunadia dekenai idia noho elda taudia ia hagoadaia, ia gwau: “Dirava ena mamoe oreana, emui henunai idia noho, do umui naria. Naria gaukarana umui karaia, ta ese umui ia doria dainai lasi, to Dirava ena vairanai mai emui ura ida do umui karaia. Koikoi dalanai kohu abia totona lasi, to mai emui ura bada ida do umui karaia. Bona Dirava ese umui henunai ia atoa taudia do umui biagua auka lasi, to mamoe oreana dekenai haheitalai namona do umui hahedinaraia.” (1 Pet. 5:1-3) Hari idia noho kongrigeisen naria taudia dekenai Petero ena hereva be mai anina bada. Iehova ena hesiai gaukara idia gunalaia lalonai, elda taudia ese Iesu idia tohotohoa dainai, mai edia ura ida mamoe idia naria.​​—Heb. 13:7.

³ Ita moale badina Kongrigeisen lalonai lauma helaga amo idia abia hidi naria taudia idia noho. Ita idia naria namonamo dainai hahenamo momo ita abia. Hegeregere, naria taudia ese hagoadaia herevadia idia henia bona kongrigeisen taudia ibounai edia namo idia laloa bada. Wiki ta ta ai, mai ura ida kongrigeisen heboudia idia gunalaia, unai amo ibounai edia abidadama idia hagoadaia. (Roma 12:8) Idia gaukara goada mamoe oreana be taunimanima dikadia amo idia gimaia, unai amo ita noho namonamo diba. (Isa. 32:2; Tito 1:9-11) Idia ese haroro gaukara idia gunalaia dainai, ita idia hagoadaia hua ta ta ai sivarai namona ita harorolaia totona. (Heb. 13:15-17) Iehova ese unai taudia be “harihari gaudia” bamona ia henia, idia amo kongrigeisen ia hagoadaia.​​—Efe. 4:8, 11, 12.

NARIA TAUDIA ESE DO IDIA BADINAIA HAHEGANI

⁴ Kongrigeisen idia naria namonamo totona, idia abia hidi naria taudia ese Dirava ena Hereva ai idia noho hahegani idia badinaia be namo. Bema unai hahegani idia badinaia, ita gwau diba lauma helaga ese idia ia abia hidi. (Kara 20:28) Oibe, Baibel lalonai Keristani naria taudia ese do idia badinaia hahegani be momo, badina mai anina bada maduna do idia huaia. To, Iehova idia lalokau henia momokani bona idia ura Ia ese idia do ia gaukaralaia Keristani tatau ese unai hahegani idia badinaia diba. Unai dainai, namona be taunimanima ese idia itaia elda taudia ese Baibel ena sisiba be edia mauri lalonai idia badinaia.

⁵ Aposetolo Paulo ena revareva gingunana Timoteo dekenai bona Tito dekenai ia siaia revareva ai naria taudia ese do idia badinaia hahegani ia torea. Timoteo Ginigunana 3:1-7 lalonai ia gwau: “Bema ta ia ura naria tauna ena maduna ia abia, ia be gaukara namona ia ura henia unai. Unai dainai namona be naria tauna be kerere ta lasi, ia be hahine tamona ena adavana, ena kara ia biagua, ia laloa namonamo, ia be dala maorona ia badinaia tauna, ia be heabidae tauna, ia hegeregere ia hadibaia totona, ia be kekero tauna lasi, ia be heatu tauna lasi, to ia laloa maoromaoro, ia manau, moni ia ura henia dikadika lasi, dala maorona ai iena ruma bese ia naria, bona iena natudia be mai laloa namonamo ida iena henunai idia noho. (Bema ta be ena ruma bese naria dalana ia diba lasi, edena bamona Dirava ena kongrigeisen do ia naria?) Ia be hahediba tauna matamatana lasi, dika ia hekokoroku bena Diabolo ese ia abia hahemaorona ia abia garina. Danu, namona be murimuri taudia edia vairanai ia be ladana namona tauna, unai amo haida ese ia hadikaia herevadia do idia gwauraia lasi, bona Diabolo ese do ia tarapua lasi.”

⁶ Paulo ese Tito ia tore henia, ia gwau: “Kerete dekenai oi lau rakatania unai amo kerere gaudia do oi hamaoromaoroa bona taoni ta ta ai tau badadia do oi abia hidi, oi dekenai lau hadibaia hegeregerena. Inai bamona tauna do oi abia hidi, ia be haida ese idia samania tauna lasi, ia be hahine tamona ena adavana, iena natudia be abidadama idia hahedinaraia bona ta ese idia ia gwauraia lasi idia be mauri dikana idia badinaia eiava idia gwau-edeede. Naria tauna be Dirava ese ia abia hidi ena gaukara ia naria dainai, namona be ia be haida ese idia samania tauna lasi, sibona ena ura ia badinaia lasi, ia badu haraga lasi, ia be kekero tauna lasi, ia be heatu tauna lasi, bona mai mataganigani ida koikoi dalanai sibona ia durua toho lasi, to ia be heabidae tauna, kara namodia ia ura henia bada, ia laloa maoromaoro, ia kara maoromaoro, Dirava ia abidadama henia bona sibona ena ura ia biagua, ena hadibaia karana lalonai hereva momokani ia dogoatao auka, vadaeni hereva momokani amo haida do ia hagoadaia bona hereva momokani idia gorea taudia do ia sisiba henia.”​​—Tito 1:5-9.

⁷ Matamanai toana be Baibel ena hahegani naria taudia totona badinaia karana be auka, to namona be gau ta ese Keristani tatau ia koua lasi kongrigeisen naria maduna idia huaia totona. Bema naria taudia ese idia hahedinaraia Keristani kara namodia idia badinaia, kongrigeisen taudia ma haida idia durua diba unai bamona idia karaia totona. Aposetolo Paulo ia gwau unai naria taudia be “harihari gaudia” bamona, “unai amo idia ese helaga taudia do idia hamaoromaoroa, hesiai gaukara do idia karaia, bona Keriso ena tauanina do idia haginia, ela bona ita ibounai iseda abidadama do ia tamona, bona iseda diba maoromaoro Dirava ena Natuna dekenai be do ia tamona danu, ela bona tau badana bamona ai ita lao, bona Keriso ena bada hegeregerena ita abia.”​​—Efe. 4:8, 12, 13

⁸ Naria taudia be memero maragidia lasi eiava vanegai sibona orea dekenai idia vareai tatau. To, idia be Keristani mauri dalana idia badinaia, Baibel ena hereva idia diba bona lalopararalaia namonamo bona kongrigeisen idia lalokau henia bada. Ta ia kerere neganai, idia be mai gari lasi ida unai tauna idia hereva henia bona ena kerere idia hamaoromaoroa, unai amo mamoe oreana be dika taudia amo idia gimaia. (Isa. 32:2) Kongrigeisen taudia ibounai idia diba idia be lo taudia bona Dirava ena mamoe oreana idia laloa bada.

⁹ Idia hegeregere naria taudia ai do idia lao taudia be edia mauri lalonai aonega idia hahedinaraia. Bema idia headava vadaeni, namona be Baibel ena taravatu headava dekenai idia badinaia, anina be, ia be hahine tamona ena adavana bona dala maorona ai ena ruma bese ia naria. Bema naria tauna ese iena natudia be mai edia abidadama bona ta ese ia gwauraia lasi idia be mauri dikana idia badinaia eiava idia gwau-edeede, vadaeni kongrigeisen taudia ese mai gari lasi ida ia dekenai idia lao diba, ruma bese bona Keristani mauri dalana dekenai sisiba bona hakaua herevadia abia totona. Naria tauna be kerere ta lasi bona haida ese idia samania tauna lasi bona murimuri taudia edia vairanai ia be ladana namona tauna. Ia ese kerere ta ia karaia lasi kongrigeisen ena ladana namona hadikaia totona. Ia be vanegai sibona kara dika badana ta ia karaia dainai matahakani ia abia tauna lasi. Kongrigeisen taudia ese ena haheitalai namona idia tohotohoa diba bona mai moale ida idia ura edia Keristani maurina lalonai do ia naridia.​​—1 Kor. 11:1; 16:15, 16.

¹⁰ Unai bamona tatau ese Keristani kongrigeisen idia naria, guna Israela ena tatau badadia, mai edia “aonega laloparara, bona diba momo,” idia karaia bamona. (Deu. 1:13) Idia be goevadae lasi taudia, to kongrigeisen bona edia gabu ai idia noho taudia idia diba idia be kara maoromaoro bona Dirava idia gari henia taudia badina edia mauri ibounai lalonai idia hahedinaraia Dirava ena hakaua herevadia idia badinaia. Kara maoromaoro idia badinaia dainai, kongrigeisen taudia vairanai mai hemarai lasi ida idia hereva diba.​​—Roma 3:23.

¹¹ Idia hegeregere naria gaukara idia karaia taudia ese sibodia edia kara bona ma haida kara henia dalana dekenai idia naria namonamo. Idia kara auka lasi. To edia mauri lalonai gaukara idia karaia namonamo, bona sibona idia biagua. Idia ese aniani, inuinu, laga-ani, idia ura dikadika idia karaia gaudia bona moale karadia dekenai laloa maoromaoro idia hahedinaraia. Idia be kekero muramura inua momo lasi taudia unai amo kekero karana dainai idia kerere lasi eiava kekero taudia ai do idia lao lasi. Kekero muramura ese ena lalona ia hadiburaia tauna ese ena kara ia biagua diba lasi bona ia hegeregere lasi kongrigeisen ia naria totona.

¹² Kongrigeisen ia ura naria tauna be gaukara karaia namonamo tauna. Iena kara namodia be ena toana, ena ruma bona dina ta ta ai ia karaia gaudia amo idia hedinarai. Unai bamona tauna be nega korikori ai ena gaukara ia karaia; do ia karaia gaudia ia itaia bona unai hegeregerena palani ia karaia. Bona tiokratik dalana ia badinaia.

¹³ Naria tauna be laloa maoromaoro tauna. Namona be kongrigeisen ena elda oreana danu mai lalotamona ida ia gaukara hebou. Sibona ena kara ia laloa namonamo bona ma haida ia doria lasi. Ia be laloa maoromaoro tauna dainai, ena lalohadai sibona ia badinaia momo lasi bona ia laloa lasi iena lalohadai ese elda ma haida edia lalohadai ia hanaia. Reana ia ese ia karaia diba lasi gaudia be elda ma haida ese idia karaia diba. Elda tauna ese laloa maoromaoro karana ia hahedinaraia diba bema ena lalohadai be Baibel amo ia abia bona ia gaukara goada Iesu Keriso ena haheitalai ia tohotohoa totona. (Fili. 2:2-8) Elda tauna be ia hepapahuahu lasi eiava ia dagedage lasi, to ma haida ia matauraia bona ia laloa ma haida ese ia idia hereaia. Sibona ena ura ia badinaia lasi, bona ia laloa lasi iena dala eiava lalohadai be hanaihanai idia maoro. Ia badu haraga lasi, to maino dalanai ma haida ia kara henia.

¹⁴ Unai hegeregerena, kongrigeisen ai ia hegeregere naria gaukara ia karaia tauna be laloa namonamo tauna. Unai anina be, gau ibounai ia laloa namonamo guna gabeai ia hahemaoro. Ia be Iehova ena hakaua herevadia bona gaukaralaia daladia ia lalopararalaia namonamo. Laloa namonamo tauna be sisiba bona hadibaia hereva do ia abia dae. Ia kara koikoi lasi.

¹⁵ Paulo ese Tito ia hadibaia, naria tauna be kara namo ura henia tauna. Ia be kara maoromaoro bona Dirava badinaia tauna. Unai kara namodia be ma haida ia kara henidia bona kara maoromaoro bona kara namo totona ia gini goada amo ia hahedinaraia. Iehova ia badinaia goadagoada bona hanaihanai hakaua hereva maorodia ia badinaia. Ia be hehuni herevana ia gwauraia hedinarai lasi. Ia be heabidae tauna namona, ena nega bona kohu ma haida dekenai ia henia.​​—Kara 20:33-35.

¹⁶ Naria tauna namona ai ia lao totona, namona be ia hegeregere ma haida ia hadibaia totona. Paulo ena hereva Tito dekenai ese ia hahedinaraia, namona be naria tauna be “ena hahediba dalanai hereva momokani ia dogoatao auka, unai amo hereva momokani amo haida ia hagoadaia, bona hereva momokani idia gwauraia lasi taudia ia sisiba henia.” (Tito 1:9) Namona be gau ibounai edia badina ia laloa namonamo guna, hamomokania gaudia ia hahedinaraia, koua herevadia ia hanaia bona Baibel ena hereva ia badinaia namonamo daladia amo ma haida edia lalona ia veria bona unai ese edia abidadama ia hagoadaia. Naria tauna ese unai hadibaia dalana be nega namodia bona nega dikadia ai ia gaukaralaia. (2 Tim. 4:2) Ia be mai haheauka ida manau dalanai kerere tauna ia sisiba henia eiava daradara tauna ena lalona ia hamarerea mai abidadama ida kara namodia ia karaia totona. Bema ia be taunimanima momo eiava tamona ia hadibaia diba, vadaeni unai ese ia hahedinaraia naria tauna ese unai mai anina bada hahegani ia badinaia namonamo.

¹⁷ Elda taudia ese haroro gaukara idia karaia goadagoada be namo. Unai amo idia ese Iesu idia tohotohoa badina ia ese sivarai namona harorolaia gaukarana ia laloa bada. Danu, Iesu ese ena hahediba taudia ia laloa bada dainai idia ia durua haroro taudia namodia ai idia lao totona. (Mar. 1:38; Luka 8:1) Elda taudia ena be idia bisi to mai ura bada ida haroro gaukara idia karaia neganai, kongrigeisen do idia durua haroro gaukara idia laloa bada totona. Danu elda taudia ese edia ruma bese eiava kongrigeisen taudia ida idia haroro hebou neganai, ta ta do idia “hagoadaia” diba.​​—Roma 1:11, 12.

¹⁸ Toana be naria tauna dekenai unai be maduna badana. Momokani, naria tauna ta be Baibel ese ia gwauraia hahegani ibounai ia badinaia goevagoeva diba lasi, to namo lasi kongrigeisen ai idia abia hidi elda tauna ta ese unai kara ta ia karaia lasi dainai Kongrigeisen taudia idia laloa unai be kerere badana. Elda taudia haida ese idia karaia diba gaudia be ma elda haida ese idia karaia diba lasi. Unai amo elda oreana ibounai ese kara namodia idauidau idia hahedinaraia diba Dirava ena kongrigeisen naria namonamo totona.

¹⁹ Elda oreana ese naria taudia matamatadia idia gwauraia hidi neganai, namona be Paulo ena sisiba idia laloa, ia gwau: “Umui huanai idia noho taudia ta ta lau hamaoroa, namo lasi sibona do ia laloa bada, to ena laloa dalana amo do ia hahedinaraia ia laloa maoromaoro, bona Dirava ese ta ta dekenai ia henia abidadama hegeregerena, unai do ia karaia.” (Roma 12:3) Namona be elda ta ta be sibona ia laloa bada lasi. Namo lasi ia laloa ia sibona be “kara maoromaoro tauna.” (Had. 7:16) Baibel ai naria taudia ese do idia badinaia hahegani idia diba dainai, namona be elda oreana idia tahua bema idia gwauraia hidi tadikaka be unai hahegani ia badinaia diba. Idia laloparara ita be goevadae lasi, to namo lasi sibodia edia ura eiava koikoi dalanai tadikaka idia gwauraia hidi, namona be unai idia karaia badina Iehova ena kara maoromaoro taravatudia idia matauraia bona kongrigeisen ena namo idia laloa. Elda taudia be mai guriguri ida idia gwauraia hidi taudia ta ta idia laloa be namo, bona Dirava ena lauma helaga ena hakaua dalana idia badinaia. Unai be maduna badana dainai, namona be Paulo ena sisiba idia badinaia: “Namo lasi ta oi abia hidi haraga.”​​—1 Tim. 5:21, 22.

LAUMA HELAGA ENA HUAHUA

²⁰ Lo taudia be idia hamomokania lauma helaga ese idia ia hakaua bona edia mauri ai lauma helaga ena huahua idia hahedinaraia. Paulo ese unai lauma helaga ena huahua nain ia herevalaia idia be, “lalokau, moale, maino, boga-auka, hebogahisi, kara namo, abidadama, manau, bona sibona biagua karana.” (Gal. 5:22, 23) Unai bamona naria taudia ese tadikaka idia hagoadaia bona kongrigeisen idia durua mai lalotamona ida hesiai gaukara helagana idia karaia totona. Edia kara bona edia gaukara ena anina amo idia hahedinaraia lauma helaga ese idia ia abia hidi.​​—Kara 20:28.

LALOTAMONA IDIA HAVARAIA TAUDIA

²¹ Elda taudia idia gaukara hebou be gau badana kongrigeisen lalonai lalotamona idia havaraia totona. Edia kara be idauidau, to do idia gaukara hebou totona namona be mai hemataurai idia kamonai heheni, ena be idia herevalaia gaudia ibounai idia abia dae lasi. Bema elda oreana ese idia karaia abia hidi be Baibel ena hakaua hereva ia utua lasi, namona be ta ta ese unai lalohadai idia abia dae bona idia badinaia. Bema ta ese ma haida edia lalohadai abia dae karana ia hahedinaraia, ia be “atai amo ia mai aonegana ia abia” anina be “maino” bona “laloa maoromaoro” karana do ia hahedinaraia. (Iam. 3:17, 18) Namo lasi elda ta ia laloa ia be elda ma haida ia hereaia, bona idia ia biagua toho. Bema elda taudia be kongrigeisen ena namo totona idia gaukara hebou, Iehova ida idia gaukara hebou unai.​​—1 Kor karoa 12; Kol. 2:19.

NARIA TAUNA ENA MADUNA ABIA

²² Lo Keristani tatau ese naria tauna ena maduna idia ura abia be namo. (1 Tim. 3:1) To, naria tauna be do ia gaukara goada bona sibona ena ura do ia dadaraia. Anina be do ia noho hegaegae sibona ia henia, tadikaka taihu durua totona. Naria tauna ai do ia lao totona, namona be ia gaukara goada, Baibel ai naria taudia ese do idia badinaia hahegani, ia badinaia totona.

MAURI DALANA IA IDAU DIBA

²³ Lagani daudau mai ena abidadama ida elda gaukara ia karaia tadikaka ia gorere eiava ena tauanina ia manoka diba. Reana ia buruka dainai, ia hegeregere lasi ena elda maduna ia huaia. Ena be unai ia vara, to namona be kongrigeisen taudia ese ia idia matauraia badina ia be elda tauna. Namo lasi ena gorere dainai ena elda maduna ia atoa diho. Mai edia goada ida mamoe oreana idia naria gaukarana idia karaia elda taudia idia matauraia hegeregerena ia danu do idia matauraia.

²⁴ To bema tadikaka ta ia laloa ena mauri ai gau haida idia idau dainai ia hegeregere lasi ena maduna ia huaia, vadaeni unai bamona ia karaia diba. (1 Pet. 5:2) Namona be kongrigeisen ese idia matauraia noho. Kongrigeisen lalonai gaukara namodia momo ia karaia diba, ena be elda ese idia huaia maduna idauidau ia abia lasi.

KONGRIGEISEN MADUNA IDAUIDAU

²⁵ Elda taudia be kongrigeisen lalonai maduna idauidau idia huaia. Idia haida be elda oreana ena kodineita, seketere, haroro naria tauna, Gima Kohorona Stadi naria tauna, bona Iseda Haroro bona Mauri Dalana naria tauna ia noho. Elda momo be Kongrigeisen ena grup ta ta idia naria. Elda taudia be nega daudau lalonai unai maduna idia huaia diba. To momokani, bema unai maduna ia huaia tadikaka be gabu ma ta dekenai ia lao, gorere dainai ena gaukara ia karaia diba lasi, eiava Baibel ena hahegani naria taudia totona ia badinaia lasi, vadaeni elda ma ta idia abia hidi diba unai gaukara ia karaia totona. Elda be momo lasi Kongrigeisen lalonai, elda ta ese gaukara rua eiava toi do ia karaia ela bona tadikaka ma haida be idia hegeregere elda taudia ai idia lao.

²⁶ Elda oreana ena kodineita be elda oreana edia hebou ena seamani. Unai maduna ia abia dainai, namona be mai manau ida elda ma haida ida ia gaukara hebou, Dirava ena mamoe idia naria totona. (Roma 12:10; 1 Pet. 5:2, 3) Namona be ia be gaukara ia hegaegaelaia namonamo tauna bona ena maduna ia huaia namonamo.​​—Roma 12:8

²⁷ Seketere ese kongrigeisen ena rekodi idauidau ia naria bona mai anina bada hadibaia herevadia be elda taudia ia hadibaia. Bema hegeregere, elda eiava ia hegeregere hesiai tauna ta idia gaukaralaia diba, seketere ia durua totona.

²⁸ Haroro naria tauna ese haroro gaukara bona hesiai gaukara ma haida ia naria. Ia ese sediual ia karaia unai amo hua ta ta ai grup ta ta ia vadivadi henia totona. Kongrigeisen maragidia lalonai grup be momo lasi dainai lagani tamona lalonai nega rua ia vadivadi diba. Iena vadivadi lalonai, unai grup ena haroro hebouna do ia hakaua, idia danu do ia haroro, bona pablisa do ia bamoa edia lou henia bona Baibel stadi idia karaia totona.

GRUP NARIA TAUDIA

²⁹ Kongrigeisen lalonai grup naria tauna ena gaukara be hahenamo ta. Do ia karaia gaudia be (1) iena haroro grup lalonai idia noho pablisa ta ta edia tubu dalana ia laloa bada; (2) idia ta ta ia durua hanaihanai mai moale ida hesiai gaukara idia karaia bona edia gaukara ese anina namona do ia havaraia, bona (3) hesiai taudia ia durua bona treinia unai amo do idia hegeregere elda maduna bona kongrigeisen maduna ma haida idia huaia totona. Elda oreana ese do ia itaia daika be ia hegeregere unai maduna idauidau do ia huaia totona.

³⁰ Grup naria tauna ena gaukara ena bada dainai, namona be elda ese unai maduna idia huaia. Eiava, ia hegeregere hesiai tauna ta ese unai gaukara ia naria diba ela bona elda ta ese unai maduna ia huaia diba. Unai gaukara ia karaia hesiai tauna idia gwauraia grup ena hesiai tauna, badina ia be kongrigeisen naria tauna ta lasi. To, ia be elda taudia edia hakaua henunai unai gaukara ia karaia.

³¹ Grup naria tauna ena gaukara badana ta be haroro gaukara dekenai tadikaka ia gunalaia. Bema hanaihanai mai ena goada bona ura bada ida haroro gaukara ia karaia, iena grup taudia do ia hagoadaia diba. Tadikaka bona taihu be hebamo karana amo goada bona heduru idia abia dainai, grup taudia ibounai idia haroro diba totona sediual namona ta ia karaia bona idia badinaia. (Luka 10:1-16) To hanaihanai idia haroro totona, grup naria tauna ese teritori ia hegaegaelaia be namo. Ia ese haroro gaukara ena hebou do ia gunalaia bona unai dina ena haroro gaukara totona pablisa do ia haria bona hakaua. Bema do ia lao lasi, namona be elda ma ta eiava hesiai tauna ta, o ia hegeregere pablisa ta ia hadibaia unai gaukara ia naria totona, unai amo tadikaka taihu idia hakaua diba.

³² Namona be grup naria tauna be haroro naria tauna ena vadivadi totona do ia hegaegae guna, unai vadivadi totona grup taudia do ia hadibaidia bona ia durudia unai dina do idia naria mai moale ida. Grup taudia ibounai be unai palani idia diba neganai, mai edia ura bada ida unai do idia durua.

³³ Grup ta ta idia maragi be namo. Unai amo grup naria tauna be ena grup taudia ibounai do ia dibaia namonamo. Ia be mamoe naria tauna mai lalokauna dainai, ena grup taudia ta ta edia namo ia laloa. Ia ese idia ta ta ia durua bona hagoadaia haroro gaukara bona kongrigeisen heboudia idia goadalaia. Danu idia ta ta durua daladia ia tahua edia hetura karana Iehova ida ia goada noho totona. Mai edia gorere eiava lalometau taudia ia vadivadi henia dainai namo idia abia. Heduru hereva namona ta o sisiba hereva ta ese haida ia durua diba, kongrigeisen ai maduna ma haida idia tahua unai amo tadikaka idia durua bada. Momokani grup naria tauna ia gaukara goada ena grup taudia ia durua totona. To ia be elda bona mamoe naria tauna dainai, kongrigeisen taudia ibounai ia laloa be namo bona ia noho hegaegae heduru idia ura abia taudia ia durua totona.​​—Kara 20:17, 28.

³⁴ Grup naria tauna ena maduna ta be, ena grup taudia edia haroro ripoti ia gogoa. Unai ripoti be seketere dekenai ia henia. Pablisa ta ta ese grup naria tauna idia durua diba, bema edia haroro ripoti idia henia haraga. Unai idia karaia diba bema hua ta ta edia dokona ai, maoromaoro grup naria tauna dekenai edia ripoti idia henia eiava Kingdom Hall ai haroro ripoti totona idia makaia maua lalonai idia udaia.

KONGRIGEISEN HESIAI KOMITI

³⁵ Kongrigeisen Hesiai Komiti ese gaukara haida idia naria, unai komiti lalonai elda oreana ena kodineita, seketere, bona haroro naria tauna idia noho. Hegeregere, hesiai komiti ese headava o fineral totona Kingdom Hall do idia gaukaralaia ena gwaumaoro ia henia bona kongrigeisen ena grup ta ta dekenai pablisa idia haria. Danu, ia ese regula painia, heduru painia bona hesiai gaukara ma haida edia aplikeisen idia hamomokania bona siaia. Hesiai komiti be elda oreana henunai idia gaukara.

³⁶ Hesiai komit taudia, Gima Kohorona Stadi naria tauna, Iseda Haroro bona Mauri Dalana naria tauna, bona elda oreana lalonai idia noho tadikaka ma haida edia gaukara be brens ofesi ese idia siaia revareva lalodiai idia hahedinaraia.

³⁷ Elda oreana be lagani ta lalonai nega haida idia hebou, kongrigeisen durua daladia idia kikilaia totona. Elda taudia ese sekit naria tauna ena vadivadi lalonai hebou ta idia abia, bena hua toi bamona murinai elda oreana be hebou ma ta idia karaia be namo. To, bema gau ta ia vara, elda taudia be hebou ta idia karaia diba.

HAKAUA TAUDIA KAMONAI HENIA

³⁸ Hakaua taudia be goevadae lasi; to Baibel ese kongrigeisen taudia ibounai ia hagoadaia idia do idia kamonai henia badina unai be Iehova ena dala. Iehova ese idia ta ta edia kara hegeregerena davana do ia henia. Idia ese Iehova bona ena tiokratik lohia dalana idia hahedinaraia. Heberu 13:17 ia gwau: “Umui idia hakaua taudia do umui kamonai henia, bona idia henunai do umui noho, badina idia ese umui idia naria noho, gabeai Dirava ena vairanai edia gaukara ena anina do idia gwauraia hedinarai. Idia henunai umui noho neganai, mai moale ida edia gaukara do idia karaia, bona do idia lalohisihisi lasi, badina bema mai lalohisihisi ida idia karaia, namo ta do umui davaria lasi.” Iehova ese ena lauma helaga ia gaukaralaia ta ia abia hidi hegeregerena, unai lauma helaga do ia gaukaralaia ta be naria tauna ena maduna amo ia kokia diba, bema ia ese lauma ena huahua ia hahedinaraia lasi bona Baibel ai naria taudia ese do idia badinaia hahegani ia badinaia lasi.

³⁹ Kongrigeisen naria taudia edia gaukara goada karana bona edia haheitalai namona ita laloa bada, ani? Paulo ese Tesalonika kongrigeisen ia tore henia neganai, ia ese tadikaka ia hagoadaia: “Tadikaka e, umui ai noia umui huanai idia gaukara goada bona Lohiabada ena gaukara lalonai umui idia naria bona umui idia sisiba henia noho taudia, do umui matauraia. Bona edia gaukara dainai, idia do umui lalokau henia bona do umui lalodia bada.” (1 Tes. 5:12, 13) Kongrigeisen naria taudia idia gaukara goada dainai, iseda hesiai gaukara Dirava dekenai ita karaia diba bona ita moalelaia. Danu, Paulo ena revareva ginigunana Timoteo dekenai ia siaia neganai, kongrigeisen naria taudia laloa bada karana ia herevalaia, ia gwau: “Dala maorona ai naria gaukarana idia karaia tau badadia ita matauraia bada be namo, bona gau badana be mai edia goada ida Dirava ena hereva idia herevalaia bona idia hadibaia taudia dekenai, unai bamona ita karaia.”​​—1 Tim. 5:17.

MADUNA MA HAIDA OREA LALONAI

⁴⁰ Nega haida, elda taudia haida idia abia hidi Gorere Taudia Vadivadi Henia Grup idia karaia totona. Haida be Hospital Liesen Komiti gaukara idia karaia, hospital bona doketa idia vadivadi henia unai amo Iehova ena Witnes taudia dekenai hanaihanai rara lasi medikol heduru idia gaukaralaia. Naria taudia ma haida be Basileia ena gaukara idia habadaia totona, Kingdom Hall haginia komiti eiava Assembly Hall Komiti lalonai idia noho. Unai dala ai inai tadikaka ese edia nega bona goada idia gaukaralaia dainai, ita ibounai ese edia gaukara idia laloa bada. Momokani, “unai bamona taudia laloa bada karana” ita hadokoa lasi.​—Fili. 2:29.

SEKIT NARIA TAUNA

⁴¹ Hakaua Oreana ese idia hegeregere elda taudia idia abia hidi sekit naria taudia ai idia lao totona. Brens ofesi ese edia gaukara ia henia, lagani tamona ai edia sekit lalonai idia noho kongrigeisen be nega rua idia vadivadi henia totona. Danu, nega ta ta ai daudau gabudia ai idia noho painia taudia idia vadivadi henia. Idia ese edia vadivadi ena palani idia karaia, bona kongrigeisen ta ta idia hadibaia guna, unai amo kongrigeisen ese namo bada do ia abia.

⁴² Elda orea ena kodineita be unai vadivadi totona gau ibounai do ia hegaegaelaia, unai amo tadikaka bona taihu do ia hagoadaia. (Roma 1:11, 12) Elda oreana ena kodineita be unai vadivadi ena nega bona sekit naria tauna bona ena adavana (bema ia headava) edia dabu gaudia ia diba neganai, tadikaka idauidau danu ia herevahereva mahuta gabuna bona gau ma haida abia totona. Kodineita ese unai palani be heduru do idia henia taudia bona sekit tauna dekenai do ia hadibaia.

⁴³ Sekit naria tauna be kodineita dekenai kongrigeisen heboudia bona haroro gaukara ena sediual do ia hadibaia. Unai be sekit naria tauna ena lalohadai, bona brens ofesi ese idia siaia revareva hegeregerena ai do idia karaia. Namona be nega bada lalonai tadikaka ibounai dekenai kongrigeisen ena hebou, painia edia hebou, elda bona hesiai taudia edia hebou negadia idia hadibaia, haroro gabudia bona negadia danu.

⁴⁴ Tuesday adorahi ai, Sekit naria tauna ese akaun, Kongrigeisen Pablisa rekod, hebou atendens rekod, bona teritori rekod do ia sekea. Unai amo sekit naria tauna ese kongrigeisen ena manoka gaudia ia diba bona unai rekod idia naria taudia ia durua diba. Nega bada lalonai kodineita ese unai rekod ibounai be sekit naria tauna do ia henia.

⁴⁵ Sekit naria tauna ia vadivadi neganai, bema nega ia hegeregere, hebou, haroro gaukara bona aniani hebou negadia ai tadikaka idauidau ia hereva henia. Danu, elda bona hesiai taudia ida ia hebou, bona idia dekenai Baibel ena sisiba namodia, heduru herevadia, bona hagoadaia ia henidia, unai amo mamoe oreana naria gaukarana dekenai edia maduna idia huaia namonamo totona. (Aon. 27:23; Kara 20:26-32; 1 Tim. 4:11-16) Ia be painia taudia danu ia hebou unai amo idia ia hagoadaia bona durua edia hesiai gaukara lalonai idia abia noho hekwakwanai idia haheaukalaia totona.

⁴⁶ Bema hekwakwanai haida idia ura hamaoromaoroa haraga totona, sekit ia vadivadi lalonai unai ia hamaoromaoroa toho. Bema ena vadivadi lalonai unai hekwakwanai idia hamaoromaoroa haraga lasi, ia ese elda taudia o unai hekwakwanai idia davaria taudia ia hagoadaia Baibel lalonai unai kerere hamaoromaoroa daladia idia tahua totona. Bema brens ofesi ese unai hekwakwanai idia ura sekea lou totona, ia bona elda taudia ese revareva ta amo unai kerere ibounai be brens ofesi do idia hadibaia.

⁴⁷ Sekit naria tauna be kongrigeisen ia vadivadi henia neganai, kongrigeisen hebou ibounai dekenai ia lao be namo. Nega ta ta ai, unai hebou negadia idia haidaua karana be brens ofesi amo idia mai revareva ai do idia hahedinaraia. Sekit naria tauna ese tok do ia henia, kongrigeisen ia durua, hagoadaia, bona hadibaia totona. Ia gaukara goada tadikaka ese Iehova bona Iesu Keriso do idia lalokau henia bona Iehova ena orea idia laloa bada totona.

⁴⁸ Sekit naria tauna ena vadivadi ena badina ta be tadikaka do ia hagoadaia idia haroro goadagoada totona, bona idia dekenai heduru hereva namodia do ia henia. Tadikaka momo ese edia sediual idia haidaua diba, unai wiki lalonai edia haroro gaukara idia habadaia totona, reana haida be unai vadivadi ena hua lalonai heduru painia gaukara be hora 30 o 50 ai idia karaia diba. Bema ta ia ura sekit naria tauna eiava ena adavana danu idia gaukara hebou, namona be apointment ia karaia. Tadikaka bona taihu ese sekit naria tauna o ena adavana be edia Baibel stadi bona lou henia dekenai idia hakaua lao karana ese anina namona ia havaraia diba. Iseda heduru unai vadivadi ena wiki ai be mai anina bada.​​—Aon. 27:17.

⁴⁹ Lagani ta ta ai, sekit hebouhebou be nega rua idia karaia sekit ta ta totona. Unai hebouhebou rua lalonai, sekit naria tauna ese gaukara ibounai do ia naria. Sekit naria tauna ese tadikaka haida ia gwauraia hidi bona brens ofesi ese unai tadikaka idia abia hidi hebouhebou naria tauna bona ena durua tauna edia maduna idia huaia. Idia be sekit naria tauna ida idia gaukara hebou, hebouhebou lalonai gaukara idauidau idia hegaegaelaia bona naria. Unai amo sekit naria tauna be hebouhebou ena program do ia laloa bada. Sekit naria tauna ese idia hegeregere tadikaka ma haida ia abia hidi, hebouhebou ena dipatmen idauidau idia naria totona. Danu, dala ia karaia sekit hebouhebou ta ta murinai, sekit ena akaun idia sekea totona. Lagani ta lalonai sekit hebouhebou tamona be brens ese ia siaia tadikaka do ia naria. Danu gabu haida be daudau o hebou gabuna be maragi dainai, sekit haida be idia haria unai amo idia ta ta ese edia sekit hebou idia karaia diba.

⁵⁰ Hua ta ta edia dokona ai, sekit naria tauna ese ena haroro ripoti be maoromaoro brens ofesi dekenai ia siaia. Danu, bema sekit tauna ese ia vadivadi henia kongrigeisen ese ena loaloa, aniani, mahuta gabuna, bona ma gau haida edia davana idia karaia diba lasi, vadaeni brens ese unai moni idia henia lou diba. Loaloa naria taudia ese Iesu ena gwauhamata idia abidadama henia, bema Iehova ena Basileia idia tahua guna, vadaeni Iehova ese tauanina dalanai do ia naridia. (Luka 12:31) Namona be kongrigeisen ese unai bamona gaukara goadagoada elda taudia idia abia dae karana idia laloa bada.​​—3 Ioa. 5-8.

BRENS KOMITI

⁵¹ Tanobada hegegemadai, Iehova ena Witnes taudia edia brens ofesi ta ta ai, Baibel ena hahegani idia badinaia lo tadikaka toi eiava haida be Brens Komiti ena gaukara idia karaia, idia ese unai tano eiava edia brens henunai idia noho tano edia haroro gaukara idia naria. Unai komiti tauna ta be Brens Komiti ena kodineita.

⁵² Brens Komiti taudia ese edia teritori lalonai idia noho kongrigeisen ibounai edia gaukara idia naria. Idia ura edia teritori lalonai Basileia ena sivarai namona be gabu ibounai idia harorolaia, danu idia ese kongrigeisen bona sekit idia haginidia unai amo haroro gaukara idia naria namonamo. Danu, Brens Komiti taudia ese misinari, spesel, regula, bona heduru painia edia gaukara idia laloa. Hebouhebou badadia bona maragidia idia karaia neganai, unai komiti ese dala idia karaia bona gaukara haida idia haria, unai amo ‘gau ibounai do idia karaia namonamo bona dala maorona ai do idia karaia.’​​—1 Kor. 14:40.

⁵³ Brens Komiti ta ese idia naria tano haida dekenai Tano ena Komiti ta idia haginia. Unai amo unai Tano Komiti ese ia naria tanona ena gaukara do idia naria namonamo diba. Idia ese Betele Ruma bona ofesi, revareva bona ripoti, bona haroro gaukara idia naria. Tano Komiti be Brens Komiti ida ia gaukara hebou Basileia ena gaukara habadaia totona.

⁵⁴ Hakaua Oreana ese Brens Komiti bona Tano Komiti ia abia hidi.

HEDIKWOTA ESE IA SIAIA TADIKAKA

⁵⁵ Nega ta ta ai, Hakaua Oreana ese idia hegeregere tadikaka haida idia siaia, tanobada hegegemadai brens ta ta idia vadivadi henia totona. Unai gaukara ia karaia tadikaka idia gwauraia hedikwota ese ia siaia tadikaka. Ena gaukara badana be Betele taudia ia hagoadaia, bona Brens Komiti ese haroro bona hahediba gaukara idia naria lalonai idia davaria hekwakwanai bona henanadai idia hamaoromaora totona. Danu, inai tadikaka be idia abia hidi sekit naria taudia bona nega ta ta ai misinari taudia ida do idia hebou. Unai bamona ia karaia negnai, edia hekwakwanai eiava do idia abia be namo gaudia idia herevalaia, bona edia gaukara badana, Basileia harorolaia bona hadibaia taudia halaoa gaukarana, idia karaia totona hagoadaia hereva ia henia.

⁵⁶ Danu, hedikwota ese ia siaia tadikaka be Basileia harorolaia gaukarana bona kongrigeisen edia gaukara ma haida lalonai idia hagugurua gaudia ia laloa bada. Bema nega ia hegeregere, reana Betele amo ia daudau transleisen ofesi (remote translation office) ia vadivadi danu. Unai tadikaka be brens ia vadivadi neganai, bema ia hegeregere Basileia harorolaia gaukarana lalonai ia vareai danu.

LALOKAU DALANAI GAUKARA NARIA

⁵⁷ Keristani lo tadikaka edia gaukara goada bona mai lalokau danu ita idia naria dainai, namo ita davaria. Bema mamoe naria taudia ita kamonai henia, kongrigeisen ena Kwarana, Keriso Iesu danu ita lalotamona. (1 Kor. 16:15-18; Efe. 1:22, 23) Unai amo, Dirava ena lauma helaga be kongrigeisen iboudiai lalonai do ia noho, bona Dirava ena Hereva ese ita do ia hakaua tanobada ibounai dekenai hesiai gaukara ita karaia totona.​​—Sal. 119:105.